TALA I VAIFANUA

Pago Pago - AMERIKA SAMOA

FAAMANUIAINA ASCC I SE VAEGATUPE E SILIA MA LE $282 AFE

Sa fa’aleoina e le afioga i le sui Faipule o Amerika Samoa i le laumua i Uasigitone, ia Uifa’atali Amata, ia le agaga faamalo i le Kolisi Fa’atasi a Amerika Samoa (ASCC), ina ua maua mai tala i se vaegatupe feterale e $282,335 o le a faapea ona fa’amanuiaina ai le ASCC, mai i le Matagaluega  Fa’atoa’ga a le Iunaite Setete (USDA).

O lenei vaegatupe ua ta’ua o le ‘Community Facility Disaster Grant’, e mo le toe faatauina ai o masini ma meafale fou, e sui ai masini ma meafale na faaleagaina i le lologa ia Iulai 2022.

Sa momoli atu le agaga faamalo a Uifa’atali i le peresetene o le ASCC, le faletua ia Dr. Rosevonne Pato, ona o lana taitaiga aemaise ai le faamautuina o le mauaina e le kolisi o lenei vaegatupe e mafai ona fesoasoani i la latou auaunaga mo le atunu’u.

Na fa’aleoina foi e Uifa’atali lona agaga fa’afetai i le USDA i le tali mai i manaoga a le kolisi, e ala i lenei vaegatupe, aua o lo’o ave lava le faamuamua i le lagolagoina o aoaoga a fanau a’oga.  Ma sa faapea ona fa’aalia ai le agaga faafetai o le sui Faipule ia i latou uma o lo’o galulue punoua’i i totonu o le ASCC.

E ui i le fa’aleagaina o meafale faapea ma masini a le ASCC talu mai le lologa, ae peitai, sa le’i taofia ai le fa’aauauina pea o la latou galuega fa’aleaoaoga.

Ae o le a aoga nei vaegatupe i le vaega o aoaoga mo faiaoga, le ofisa o Financial Aid, o le ofisa lesitala a le kolisi faapea le vaega a le ‘Institutional Effectieness’.

TOE ALU I LUGA TAU O FUAMOA

Ua fa’aalia mai i faamaumauga ia Novema 2024, le iai o se siitaga (0.2%) i oloa mea taumafa (BIF) i totonu o Amerika Samoa.  Mai i oloa e 20 na tagataga’i iai ia le BFI, e iva na molimauina le si’itia o a latou tau.

Ae o lo’o tumau pea tau mo isi taumafa, mo lenei masina, e aofia ai i’a ($5.18), apa pisupo ($5.45), vai (.50¢), spareribs pua’a ($1.86), apa tuna ($2.36) ma falaoa ($3.58).

O oloa taumafa ua va’aia le pa’u o a laatou tau i lenei masina, e aofia ai fa’i (-9.6%) $1.50, taro (-6.1%) $2.17, suka (-2.6%) $3.79, alaisa (-0.9%) 5 i le pauna $5.50, ma le susu (-0.8%) $2.52. 

O le masina o Oketopa na toe agai ai i luga ia tau o fuamoa, i le silia ma le 5% seia o’o i le 6.4%, lea na $3.12 ai le tau o fuamoa laiti, ia Oketopa ae o’o mai ia Novema, ua $3.32.

O isi taumafa na va’aia le agai i luga o tau, na aofia ai sosisi (5.8%), pata (4.5%) $4.68, saimini (1.8%) 56¢, aisi kulimi (1.6%) $9.74, moa (1.1%) $19.89 i le pusa, o apa inu (0.9%) $1.13, siusiu pipi (0.5%) $2.07, ma mayonnaise (0.6%) $4.71.

TUFATUFAINA E LE ASCC A LATOU SIKOLASIPI LOTOIFALE MO LE TAU MAFANAFANA 2024

Ua fa’alauiloa mai e le Kolisi Tu’ufa’atasi a Amerika Samoa (ASCC) ia ana sikolasipi e lua mo le Fall 2024, e aofia ai le sikolasipi a le Peresetene ma le Sikolasipi a le Saili le Atamai Non-Pell.

O nei sikolasipi o lo’o tatalaina mo so’o se alo ma fanau a’oga o lo’o fia apalai iai,e. aofia ai i latou e le o agava’a mo fesoasoani mai vaegatupe feterale (federal financial aid), lea o lo’o agava’a ai le toatele o fanau aoga sa fananau i totonu o Amerika Samoa.

Ma o sikolasipi lotoifale e lua a le ASCC ua fa’amanuiaina ai tamaitai o Falesoa AJ Tufi ma Mavy F. Tuipala (President’s Merit Scholarship) ae sa faamanuiaina ia Pearl Eunice Munoz ma Rhea M. Salamata, i le sikolasipi a le Saili le Atamai.

O le a faapea ona agava’a i latou uma nei, i le to’esea o le ta’i $500 mai i a latou pili a’oga, i totonu o le ASCC.

Mo i latou o lo’o fia apalai mo le ‘President’s Merit Scholarship’, e tatau ona atoa ana vasega(full-time) i le ‘semester’ ua tuanai ma le taimi nei, ma ausia ia averesi o togi 3.60 pe sili atu foi.

E tatau foi ona faamae’aina togi e 24 agai i se ‘Associate Degree’ i le ASCC, e aofia ai vasega o le Igilisi 150, Igilisi 151 ma le Numera 90.

O le tamaitai o Tufi AJ Falesoa ia ua na ia ausia le tasi o sikolasipi a le Peresetene, o lo’o tausinio mo sona fa’ailoga ‘Associate of Science’, i le ‘Civil Engineering Technology’. 

Sa fa’au’uina mai o ia mai i le aoga maualuga a le Matata Eseese i Nu’uuli.ma sa avea o ia ma peresetene o le Asosi Faalemalo a fanau aoga faapea foi ma le Sosaiete o le National Honor.  Sa avea foi o ia ma taitai i totonu o le Asosi Tekonolosi a fanau aoga ma le kalapu 4H.  Ma na avea foi o ia ma peresetene o le HOSA (Health Occupation Students of America).  

Sa galue lenei tamaitai o se fesoasoani i faiaoga i totonu o le polokalama mo le gaosia o kitara a le ASCC.

O le tamaitai lona lua ua faamanuiaina i le sikolasipi a le Peresetene, sa faau’uina mai i le aoga maualuga a Tafuna, ma o lo’o tausinio o ia mo se fa’ailoga o le ‘Associate of Science’ i ni mataupu se lua.

O le tamaitai ia Mavy F. Tiapula o lo’o tausinio mo ni ona faailoga i le ‘Accounting’ ma le ‘Automotive Technology’.  O lenei kuata fa’aleaaoga, sa avea ai o ia ma sui o le Honor Society a le ASCC (Phi Theta Kappa).  E le gata i lea, sa avea o ia ma totino o le faalapotopotoga o faipisinisi o le lumanai a Amerika faapea le Rotary.