Molia se alii na fa’ao’olima i lana uo teine ona o le faalavelave a’o inu ‘ava

Pago Pago - AMERIKA SAMOA

O le aso 28 o Setema, na valaau atu ai se tamaitai i le Ofisa a Leoleo i Tafuna, e ripotia ai se faalavelave na tula’i mai i le va o sona tausoga tamaitai ma lana uo tama.

E tusa ai ma fa’amaumauga a le malo, o lenei faalavelave sa tupu i le taeao o le aso 28 o Setema ma ina ua taunu’u leoleo i le nofoaga na tupu ai le faalavelave, sa molimauina ni manu’a i le fatafata o le tamaitai na a’afia.

Sa faasino e le tamaitai i leoleo le mea o iai le ua molia, le susuga ia Penehuro Siaki ma o lo’o iai se la pepe e tolu masina ae ua fai so’o le amio a lana uo tama, o le inu ‘ava.

Na te’ena foi e le na a’afia ia se auaunaga mai i le EMS.

Sa fa’atalanoaina e leoleo ia le tamaitai na valaau atu i le ofisa a leoleo ma sa ia faamatalaina e faapea, e na te le iloa tonu le mea na tupu ae na mafua ona ia valaau atu i le ofisa a leoleo, ona ua manaomia se fesoasoani e lona tausoga.

Ina ua manino le mata o le vai, sa iloa ai le faia o se inuga pia a le ua molia i lena taeao, i le fale a sana uo.  Ma alu atu iai le tamaitai na a’afia ma o la toe fo’i fa’atasi mai i lo la fale, i se pasi.

Ina ua o la taunu’u i le fale, sa pisa le tamaitai na a’afia e gasese se taumafataga a lana uo tama, ae peitai, sa le’i fia tausami le alii.  Ma amata ai loa se la taugaupu ma i’u ai lava ina kola mai e le ua molia ia le tamaitai na a’afia ma u’una’i i luga o se moega.

Ua molia nei le alii o Siaki i moliaga, e aofia ai;

Faitauga 1:  Faatupu Vevesi i totonu o aiga (sauaga i totonu o aiga), o se vaega ‘C’ o solitulafono mama, e mafai ona nofosala ai i le o’o atu i aso e sefululima, po o se sala tupe e $300; po o faasalaga uma e tolu.

Faitauga 2:  Fa’ao’olima i lona tulaga e tolu (sauaga i totonu o aiga), o seisi foi vaega ‘C’ o solitulafono mama, e mafai ona loka ai mo aso e sefululima, po o se sala tupe e $300; po o faasalaga uma e tolu.

E $3,000 se vaegatupe na faatulagaina e mafai ona tatalaina ai le ua molia, e faatalitali ai lona faamasinoga.