Taumafai se alii e nana vaega o fualaau faasaina i totonu o se faleoloa

Pago Pago - AMERIKA SAMOA

O le po o le aso 23 o Setema, 2024, na taunu’u ai se valaau i le Ofisa a Leoleo i Fagatogo mai i le Ofisa Leoleo i Tafuna, mo se fesoasoani e tusa ai ma se mataupu e faatatau i vaega o fualaau faasaina.

E tusa ai ma fa’amaumauga a le malo, sa talosagaina e le Ofisa a Leoleo i Tafuna ia se fesoasoani mai i le vaega a leoleo e mataituina ia mataupu e a’afia ai vaega o fualaau faasaina (Vice & Narcotics).

Ina ua taunu’u sui o lea ofisa i le Ofisa a Leoleo i Tafuna, sa taua’aoina iai e le taitai leoleo i Tafuna ia se paipa mata’eta’e, lea e masani ona fa’aaoga e ula ai le vaega o fualaau faasaina, o le Aisa.

Ma e tusa ai ma se ripoti mai i sui malu o le malo i Tafuna, na ta’ua ai le va’aia o se taavale i luga o le alatele i Iliili, o feseta’i solo i itu uma e lua o le alatele.  Ma na taofia ai loa e leoleo lea taavale i luma o se faleoloa i Iliili.

Ae ina ua o’o atu leoleo i le mea o paka mai ai le taavale na faatu, sa molimauina le oso i fafo o le ua molia, le susuga ia Alefosio Lauvele, mai totonu o le taavale, ma savali agai i totonu o le faleoloa.  Ma e le’i umi ae toe savali mai i fafo.

Ma a’o fa’amalamalama atu iai e leoleo i le ua molia le mafuaaga na taofia ai lana taavale, ae savali mai se tamaitai mai totonu o le faleoloa ma vala’au atu i leoleo mo se fesoasoani.

Ina ua ulufale atu leoleo i totonu o le faleoloa, sa fa’ailoa ifo iai e se alii, lona molimauina le savali atu i totonu o Lauvele ma tu’u se mea i totonu o le pusa o lo’o iai pepa afifi meaalofa.  Ma sa mafai foi ona faamaonia lea faamatalaga e seisi tagata na iai i totonu o le faleoloa, i lea taimi.

Na maua e leoleo ia le mea lea sa tu’u e le ua molia i totonu o le atigipusa, o se mea e foliga mai o se paipa mata’eta’e, o lo’o iai totonu se vaega o fualaau faasaina, o le Aisa ma o lo’o saisai i totonu o se pepa pa’epa’e.

Sa ta’ua foi le leai o se ID po o se tulaga e faamaonia ai le ua molia ma o lea na aveina atu ai loa o ia i le Ofisa a Leoleo i Tafuna mo le fa’aauauina o ona su’esu’ega.

Na mafai ona maua mai se ata vitio mai i le faleoloa, sa fa’amaonia ai le ulufale atu o le ua molia i le faleoloa i lea po, ma tu’u se mea i totonu o le atigipusa o lo’o iai pepa afifi meaalofa.

Ona toe ulufafo atu lea o le ua molia mai i le faleoloa, ae mulimuli ane, ulufale atu se leoleo ma talanoa ma molimau sa i totonu o le faleoloa ma alu atu ai loa le leoleo i le se’i mai i fafo ia le mea le sa tu’uina e le ua molia, i totonu o le atigipusa.

Ina ua mae’a ona su’esu’eina ma faamaonia o se vaega o fualaau faasaina, o le Aisa, lea sa i totonu o le paipa mata’eta’e, na faapea loa ona molia ia Lauvele i moliaga o le Umia fa’asolitulafono o se vaega o fualaau faasaina (Aisa), o se solitulafono mamafa e mafai ona nofosala ai i le falepuipui i le va o le lima ma le 10 tausaga, po o se sala tupe e i le va o le $5,000 ma le $20,000; po o faasalaga uma.e lua.

E $5,000 na faatulagaina e mafai ona tatalaina ai i tua le ua molia, e faatalitali ai lona faamasinoga.