Sainia se maliliega i le va o Amerika ma Fiti i le agai i luga o atugaluga o motu o le Pasefika ona o Saina

PASEFIKA

Ina ua feiloai ia le Palemia o Tifi, ia Sitiveni Rabuka ma le Failautusi o Vaega’au a le Iunaite Setete, o Lloyd Austin, i luma o vaega fa’asalalau i le faaiuga o le vaiaso na se’i mavae atu nei, sa faapea ai se tala ula a Rabuka, e talosia e le o se faailoga lea o ni vaitaimi leaga o le a foufou mai.

Sa saunoa ai lea o Rabuka, ua o tatou potopoto e talanoa e uiga i le filemu, ma auala e mafai ona puipuia ma atina’eina ai le filemu.

O le saunoaga a Rabuka ua faaleoina ai lagona le mautonu o lo’o feagai ma taitai o le Pasefika, a’o taumafai e tautai ma le saogalemu o latou sa i le va o malo tetele ia o lo’o taumafai e fa’amautu a latou tulaga i totonu o le Pasefika.

O Austin, o le uluai failautusi o Vaega’au a le malo tele, ua malaga atu i Fiti ma o se fa’aaliga lea o tulaga o lumanai.

A’o fa’aauau ai pea ona molimauina le fa’atuputeleina o vaega’au a Saina, o lo’o fa’apea foi ona talifuaitau atu iai Amerika, e ala i le fa’ato’ateleina o ana vaega’au i totonu o le Pasefika.

Ma e le na’o vaega o Melanesia lea ua molimauina ai lea tulaga, e pei. Fiti.  Ae ua faapea foi i atumotu o Micronesia, lea ua va’aia ai foi le fa’ato’ateleina o fitafita o vaega’au.

I le fonotaga i le va a Austin ma Rabuka sa faapea ona fa’alauiloaina ai se fesoasoani tau tupe, e lata i le $5 miliona, mai i le malo tele, mo vaega’au a le militeri a Fiti, o le a faafaigofie ai ia Amerika ona fesoasoani ia Fiti i taimi o faalavelave faafuase’i, ina ia vave maua mai ai tulaga e pei o suau’u ma vailaau.

Sa faaleoina e le Palemia o Fiti le tele o faamanuiaga ua maua e Fiti e ala mai i le fegalegalea’iga i le va ma le Malo Tele, aemaise i polokalama mo le puipuiga o tuaoi o le malo o Fiti, faapea alagamanuia i le gataifale, atoa ai ma fesoasoani i faalavelave tutupu ona o soligatulafono faavaomalo.

Na mafai ona fa’amaonia e taitai o malo e lua le amataina o se feutagaiga mo se maliliega e mafai ona faatulagaina ai tulafono ma aiaiga mo le iai o ni vaega’au a le Iunaite Setete i totonu o Fiti ma o le a avea lea ma auala e fa’ateleina ai gaioiga faalemiliteri o le a faatinoina i le va o le malo tele ma Fiti.

Ae peitai, sa ta’ua e Austin e faapea, e le o iai se manatu i le Iunaite Setete i le taimi nei, mo le faamautuina o so latou laumua tumau (base) i totonu o Fiti, e pei ona faia i isi atunu’u e pei o Filipaina ma Iapani.

Ma sa fa’aalia e Austin i sui o vaega fa’asalalau, e le i soalaupuleina lea mataupu.