Molia ni alii se toalua ua masalomia i le gaoia o le ma’umaga a le Land Grant

Pago Pago - AMERIKA SAMOA

O lo’o ta’ua i faamaumauga a le malo e faapea, o le taeao o le aso 17 o Setema, o le tausag nei, na valaau atu ai se leoleo po a le Kolisi Tu’ufaatasi a Amerika Samoa (ASCC), i le Ofisa a Leoleo, ma ripotia atu ai le iai o se masalosaloga, ua gaoia o le ma’umaga a le Land Grant i Malaeimi.

Ma sa ta’ua ai e faapea, e foliga mai na feosofi le au gaoi, i luga o le pa/neti lea o lo’o puipui ai le ma’umaga.

Na aga’i atu leoleo i Malaeimi ma talatalanoa atili ma le leoleo po, ma na fa’ailoa iai e le leoleo po ia le iai o se tagata faigaluega a le Land Grant, o lo’o faatalitali mai i tafatafa o le alatele i le maketi lea o lo’o i le isi itu auala o le faleoloa a le ACE.

Ma sa faapea ona agai atu iai leoleo ma sa fa’ailoa iai e le alii faigaluega a le Land Grant, lona taunu’u atu i le galuega i lea taeao, ma iloa ai le gaoia o le ma’umaga.  Ma sa iai sona masalosaloga ua faatauina atu ia talo ia na tase’i i se maketi lata mai.  Ma na mafai ona faamaonia, o talo ia mai i le maumaga a le Land Grant, ona o le lanu o le ‘a’ano o le talo.

Na liliu loa leoleo i le fa’atalanoa ia le au fa’atau talo Saina ma sa faamatala e le alii Saina le o’o atu o ni alii se to’alua i lona maketi i lea vaveao ma faatauina atu ia talo ia te ia.

Sa faapea foi ona fa’aali ifo e le faatau talo Saina ia se ata vitio na pu’eina, o lo’o maua ai ata o alii ia na o atu ma talo faapea ai ma le laisene o le la taavale ‘rental’, na malaga atu ai.

O se taimi lava o lea taeao, na toe fo’i atu ai leoleo i le Land Grant e aoina mai ata sa tapueina ai iina.

O le aoauli o lea aso, a’o faataunuuina tiute a leoleo i le alatele i Iliili, na va’aia ai le taavale lea sa i totonu o le ata vitio a le Saina, o lo’o agai atu i Sasa’e i tafatafa o le malumalu Katoliko.

Sa faapea loa ona faatuina e leoleo ia le taavale ma maua atu ai le susuga ia William Asiata (lea ua molia) ma lona faletua.

Na faatonuina e leoleo ia le ulugalii ina ia malaga mai i fafo ma le taavale.  Ma a’o lokaina mai Asiata, sa ia tu’uina atu se mea i lona toalua, lea na taofi e leoleo ma iloa ai, o se tamai taga pepa iila, e foliga mai o lo’o iai totonu se pauta (aisa), ae o lo’o ta’ai i se pepa tala ($1).

Sa tu’uina atu e leoleo i le faletua a Asiata ia le tupe ae o latou aveina ia le taga pepa iila ma logoina loa lo latou ofisa e mataituina ia vaega o Fualaau Faasaina.

Na lokaina mai ai loa e leoleo ia a’ao o Asiata ma tu’uina i totonu o le taavale sa o la malaga atu ai ma lona faletua, ae tu’uina lona faletua i totonu o le taavale a leoleo, ma faafeaoina atu i le Ofisa a Leoleo i Tafuna.

Ina ua taunu’u le faigamalaga i le Ofisa a Leoleo, sa faapea ona tu’uina atu Asiata i le vaega leoleo e mataituina Fualaau Faasaina mo a latou su’esu’ega, ae ua aveina atu le taga pepa iila ma su’esu’eina vaega sa iai totonu, lea na fa’amaonia o se vaega o Fualaau Faasaina o le Aisa.

Na ta’ua e le vaega a leoleo o lo’o mataituina vaega o Fualaau Faasaina le faia o se faamatalaga a Asiata ma sa ia faamatalaina ai mea sa tutupu, mai le taimi na taofia ai le la taavale e leoleo, se’ia o’o lava ina aumaia i la’ua i le Ofisa a Leoleo.

Sa faamatalaina foi e Asiata le faalavelave e faatatau i le ma’umaga a le Land Grant, lea sa ia ta’ua e faape, o le 6:00 o lea taeao, na valaau atu ai se tagata e suafa ia Pouvi Telefoni, ma faatonu o ia e sau e piki mai o ia i autafa o le auala, i tafatafa o le pa a le Land Grant.

Sa ta’ua e Asiata, ina ua taunuu atu i le nofoaga lea na ta’u atu e Telefoni, sa ia va’aia ni taga talo tetele se lua ma sa fa’amaonia e Asiata, o talo na gaoia e Telefoni.

Ina ua pikiina e Asiata ia Telefoni, na fa’ailoa atu iai e Asiata ia Telefoni, e na te iloa se tagata e mafai ona faatauina atu iai ia taga talo ma o la agai atu loa i le fale o le faatau talo Saina.

Na faamatala e Asiata lo la mauaina o se vaegatupe e $140 mai i le alii faatau talo Saina ma sa alu loa o ia e o ma lona to’alua e ave le la fanau i le aoga, i lea taeao.

O le 3:00 o lea afiafi na lokaina ai loa Asiata i le to’ese i Tafuna, ae agai atu leoleo e saili mai ia le susuga ia Telefoni.  Lea na faamatala ifo iai e se tuaoi, o Telefoni, e nonofo faatasi ma Asiata.

Na fiu leoleo e faatalitali ia le toe fo’i atu o Telefoni i le fale, ae peitai, na fiu e faatalitali.  O lea na faatonuina ai loa e leoleo ia le to’alua a Asiata, ina ia valaau atu le ofisa a leoleo, pe a toe fo’i atu Teefoni.

O le 5:00 o lea lava afiafi, na maua ai e le Ofisa a Leoleo se telefoni mai i le to’alua a Asiata, lea na fa’ailoa atu ai i leoleo le lafi o Telefoni i totonu o le latou fale.

Ina ua taunu’u atu leoleo, ua tumu mai tagata i luma o le fale ma sa o latou faasino ifo i leoleo le mea o lo’o lafi ai Telefoni.  Ae ina ua taumafai leoleo e ave faapagotaina ia Telefoni,  sa ia taumafai e osofa’i leoleo i se seleulu e tatala ai atigi pusa (box cutter) ma manu’a ai le a’ao o se tasi o sui malu o le malo.

Na taumafai foi Telefoni e sola ese ma tau’ai mai ona tuaoi i ni ma’a, ae peitai, sa fesoasoani tuaoi i le tuliloaina o Telefoni agai i totonu o le togavao ma leiloa atu ai lava.

Ae o le aoauli o le aso 18 o Setema, na valaau mai ai se tagata i le Ofisa a Leoleo ma ripotia mai ai ia Telefoni o lo’o i luga o le alatele i Fagaima ma sa faamatalaina mai ai foi e le tagata lea, ia la’ei a Telefoni, o lo’o ia la’eiina.

Ina ua taunu’u leoleo i le nofoaga na faasino ifo o lo’o iai Telefoni, ma iloa mai e Telefoni le agai atu o le taavale a leoleo, sa amata foi ona ia toe tamo’e ese ma tuliloaina ai o ia e leoleo.  

Sa fa’aaogaina e Telefoni ia se kalapu ta polo (golf club) e tete’e mai ai le taumafaiga a leoleo e lokaina mai o ia, faatasi ai ma lona tau’aia o leoleo i ma’a.  Sa faamanu’alia nisi o sui malu o le malo, i le taumafaiga e lokaina mai ia Telefoni.

Ina ua aveina atu Telefoni i le ofisa a leoleo ma su’esu’eina ai o ia, sa ia faamaonia lona gaoia o talo pe a ma le 50, mai i le Land Grant.  Ma lona valaauina o Asiata, e alu atu e piki mai o ia ma taga talo gaoia.  Lea na o la aveina ma faatau atu i le alii Saina mo le $140.

E lima faitauga o moliaga o le alii o Pouvi Telefoni, e aofia ai;

Faitauga 1 & 2: Tete’e atu i leoleo a’o latou taumafai e ave faapagotaina o ia; o se vaega ‘D’ o soligatulafono mamafa, e mafai ona lokaina ai i le falepuipui, i le le sili atu ma le lima tausaga, po o se sala tupe e le silia ma le $5,000; po o faasalaga uma e lua.

Faitauga 3:  Gaoi; o se vaega ‘C’ o soligatulafono mamafa, e mafai ona faafalepuipupi ai i le le silia ma le fitu tauaga, po o se sala tupe e le silia ma le $5,000; po o sa aofaiga e tali tutusa, pe a faaluaina le tau aofia o le tupe na maua mai i le solitulafono na faia, e o’o atu lava i le $2,000; po o faasalaga uma e lua.

Faitauga 4:  Solivale o fanua; o se vaega ‘B’ o solitulafono mama, e mafai ona faafalepuipui ai i le o’o atu i masina e ono, po o se sala tupe e $500; po o faasalaga uma e lua.

Faitauga 5:  Fa’ao’olima i lona tulaga e lua; o se vaega ‘D’ o soligatulafono mama, e mafai ona loka ai mo le lima tausaga, po o se sala tupe e o’o atu i le $5,000 po o faasalaga uma e lua.

E $80,000 se vaegatupe na faatulagaina e mafai ona tatalaina ai le ua molia, e faatalitali ai lona faamasinoga.

Ae mo William Asiata, o ona moliaga, na aofia ai;

Faitauga 1:  Gaoi; o se vaega ‘C’ o soligatulafono mamafa, e mafai ona nofosala ai i le falepupui, i le le silia ma le fitu tausaga, po o se sala tupe e le silia ma le $5,000.

Faitauga 2:  Solivale o laufanua, o se vaega ‘B’ o soligatulafono mama, e mafai ona faafalepuipui ai i le o’o atu i le ono masina, po o se sala tupe e $500; po o faasalaga uma e lua.

Faitauga 3:  Umia o vaega o Fualaau Faasaina (Aisa); o se vaega o solitulafono mamafa, e mafai ona nofosala ai i le falepuipui, i le va o le lima ma le sefulu tausaga, po o se sala tupe i le va o le $5,000 ma le $20,000; po o faasalaga uma e lua.

E $20,000 le vaegatupe faatulagaina mo Asiata, e mafai ona tatalaina ai o ia i tua e faatalitali ai lona faamasinoga.