Osofaia e le au gaoi ia se fale ae ave na’o se ato

Pago Pago - AMERIKA SAMOA

O le taeao o le aso 13 o Setema, na valaau mai ai le pule o se fale nofo totogi, i le ofisa a leoleo, e ripotia le osofaia e nisi, po o se tasi, o sona fale nofo totogi.

Na agai atu leoleo i le nofoaga na tupu ai le faalavelave ma talatalanoa ma le pule o le fale nofo totogi.  Ma sa faamatalaina e le alii pule i leoleo, le fa’afeso’ota’i atu o ia e se tasi o ana ‘tenants’ po o se tagata o lo’o nofo totogi i ona fale, ma fa’ailoa atu le osofa’ia o lona fale e se tagata.

Sa faasino ifo e le pule o le fale nofo totogi, ia le faitotoa lea na oso atu ai le gaoi faapea ai ma le vaneina e se tagata o le pa o le fale.

Na saunoa le alii pule, sa fa’ailoa atu e le tamaitai lea o lo’o nofo totogi i lona fale, e na’o le pau lava le mea na gaoia, o se ato.  Ma sa taumateina foi e le alii pule le tagata sa faia lenei gaioiga, o se alii e suafa ia Asuelu Moalele.

Ma e foliga mai na masani leoleo ia Moalele, ona o nisi foi faalavelave na tutupu i taimi tuanai.

Ina ua mae’a ona tapu’eina e leoleo ata o vaega o le fale na faaleagaina, sa faapea loa ona o latou agai atu i le fale o le aiga a Moalele, lea e i tua o le fale nofo totogi lea na osofaia.

Na mua’i talatalanoa leoleo ma le uso matua a le ua molia ma sa tu’uina atu e le uso matua ia le faatagana i leoleo, e ulu fale ai i totonu o lona fale ma o atu i le potu o le ua molia.

Ina ua ulufale atu leoleo i totonu o le potu a le ua molia, sa vaaia ai se ato e tali tutusa ma le ato lea na faamatalaina e le tamaitai na a’afia, sa gaoia mai lona potu.  Sa faapea loa ona aveina e leoleo ia lea ato ae ave faapagotaina ia le ua molia.

Ina ua su’esu’eina le ua molia, i le ofisa a leoleo, sa ia fa’aalia lona le iloa po o ai e ana le ato lea sa maua i totonu o lona potu.  Ae na ia masalomia, o se ato a lona uso matua.  Ma sa ta’ua foi e le ua molia ia le faia o sana inuga apa pia i lea po.

Ina ua fesiligia e leoleo ia le uso matua a le ua molia, e uiga i le ato, sa ta’ua e le uso matua, e le o sana ato.

Na fa’afeso’ota’i e leoleo ia le tamaitai na aafia ma na ia famaonia o lana ato lea sa maua mai i totonu o le potu a le ua molia, ma o mea totino sa iai i totonu, e pe a ma le $120 lo latou tau.

Ua molia ai nei le alii 24 tausaga o Moalele i faitauga e tolu, e aofia ai;

Faitauga 1 & 2:  Faomea i lona tulaga e lua ma le Gaoi, o se vaega ‘C’ o solitulafono mamafa, e mafai ona faafalepuipui ai i le le silia ma le fitu tausaga, po o se sala tupe e le silia ma le $5,000; po o faasalaga uma e lua.

Faitauga 3:  Solivale o fanua ma fale; o se vaega ‘B’ o solitulafono mama, e mafai ona nofosala ai i le o’o atu i le ono masina, po o se sala tupe e $500; po o faasalaga uma e lua.

E $10,000 se vaegatupe na faatulagaina, e tatalaina ai le ua molia, e faatalitali ai lona faamasinoga.