POU TIUTE A LEOLEO

LOKA E LEOLEO ONA O LE FIA KISI FUA

E tusa ai ma faamaumauga a le malo, o le aoauli o le aso 14 o Setema, na lokaina ai se alii e 37 tausaga le matua, e suafa ia Daniel Lauama, ina ua ia taumafai e sogi atu i ni tamaitai se to’alua, i totonu o se faleoloa.

Ina ua taunu’u leoleo i le faleoloa, sa faamatalaina ifo iai e le tamaitai na valaau mai i le Ofisa a Leoleo ia le gaioiga a le ua molia.  Ma na fa’aali foi i leoleo ia ata o le vitio a le faleoloa sa pu’eina.

E pei ona sa faamatalaina e se tasi o nei tamaitai, a’o tu o ia i luma o le faatauoloa, sa fa’ate’ia o ia ina ua tago mai se tagata i ona tua, u’u atu lona ulu ae sogi atu i lona alafau tauagavale.

Ma sa faapena foi ona faia e le ua molia lea lava tulaga, i leisi tamaitai.  Ae na liliu mai le tamaitai lona lua ma tu’i le ua molia, ae tago le ua molia ma futi le ulu o le tamaitai lona lua ma tatu’i o ia.  Ae na mafai ona feosofi atu le aufaigaluega a le faleoloa faapea le faatauoloa ma taofiofi le ua molia.

Sa faamatala a le tamaitai lona lua lea na osofa’ia e le ua molia, na ia molimauina le gaioiga a le ua molia, lea na fai i le tamaitai muamua.  Ma na oso atu foi le ua molia ma u’u mai lona ulu ma taumafai foi e sogi atu ia te ia, ae na ia tago i le u’una’i ese le ua molia, ma tu’i o ia.  O iina na tago ai le ua molia i le tu’i le ulu ma foliga o le tamaitai.  

Na tau saili e leoleo ia le ua molia, i lea taimi, ae peitai, sa le’i maua o ia.  Ae o le 4 i le afiafi, na va’aia ai le toe alu atu o le ua molia i le faleoloa lava lea e tasi ma ave faapagotaina ai loa o ia e leoleo.

Ua molia nei Lauama i Faitauga e lima, e aofia ai:

Faitauga 1:  Faatupu vevesi i nofoaga faitele, o se vaega ‘B’ o soligatulafono mama, e mafai ona nofosala ai i le falepuipui i le o’o atu i le ono masina, po o se sala tupe e $500; po o faasalaga uma e lua.

Faitauga 2 & 3:  Fa’ao’olima i lona tulaga e tolu (o se vaega ‘C’ o solitulafono mama), e mafai ona fa’afalepuipui ai i le o’o atu i aso e 15 po o se sala tupe e $300; po o faasalaga uma e lua.

Faitauga 4 & 5:  Fa’ao’olima i lona tulaga e tolu (o se vaega ‘A’ o solitulafono mama), e mafai ona faafalepuipui ai i le o’o atu i le tausaga atoa, po o se sala tupe e $1,000; po o faasalaga uma e lua.

E $8,000 se vaegatupe na faatulagaina e tatalaina ai le ua molia, mai i le falepuipui, e faatali ai lona faamasinoga.

TU’UA’IA E SE FAFINE LONA TO’ALUA I LONA FA’AO’OLIMA ATU IA TE IA

O le 4:14 i le aoauli o le aso 13 o Setema, na o’o atu ai se valaau i le Ofisa Leoleo i Tafuna, mai i se tina o lo’o fia maua se fesoasoani, ona ua fa’ao’olima lona to’alua ia te ia.

Na aga’i atu leoleo i le nofoaga na tupu ai le misa ma fa’atalanoaina ai le tina ma fa’asino iai e le tina i leoleo le mea o iai lona to’alua - i totonu o lona potu.

Na faapea ona aveina e leoleo ia le tamaloa i le latou ofisa mo le fa’aauauina o a latou su’esu’ega.

Ma sa faatonuina foi e leoleo ia le tina, e agai atu foi ma ia i le ofisa a leoleo mo le faia o sana molimau tusitusia.

E tusa ai ma le molimau a le tina, sa ia valaau atu i lona to’alua e sau e kuka le meaai a le fanau ma fesoasoani i lona (tina) ‘uncle’.  Ae peitai, e pei ona sa molimau le tina, na savali atu lona to’alua ma palauvale atu ia te ia ma lau o ia i ni igoa eseese.

Ma sa ta’ua e le tina, le fa’aauauina o le la taugaupu ma i’u ai ina u’una’i o ia e lona toalua ma po faafa o ia, ma tu’i lona mata.  Ma ina ua fa’aauau pea ona palauvale atu lona to’alua ia te ia, o lea na valaau ai loa e le tina ia le ofisa a leoleo.

Ae i le molimau a le ua moia, sa ia ta’ua ai le fealua’i solo o le tina o le aiga ma tauvala’au lona igoa ma palauvale.  Sa ta’ua e le ua molia ia le faapea atu a le tina o le aiga, o le tiute a le faiava, o le kuka o meaai a le aiga.  Ma ona o lona maasiasi, na ia savali atu ai i le tina o le aiga, ae o lo’o tau’ai e le tina ia ona lavalava i luma o le fale.

Sa ta’ua e le ua molia ia lona savali atu ma piki i luga ona lavalava ma toe ave i totonu.  Ae o le taimi lea na toe alu atu ai le tina ma aumai isi ona lavalava ma o iina na ia u’una’ia ai loa le tina mai totonu o le potu, ma ia faatonuina le tina e alu i fafo, e le o fia misa o ia.

Ua molia nei le tamaloa i le faitauga e tasi o le Fa’ao’olima i lona tulaga e tolu, o se vaega e ‘C’ o solitulafono mama, e mafai ona nofosala ai i le falepuipui i le o’o atu i aso e 15, po o se sala tupe e $300; po o faasalaga uma e lua.

E $300 na faatulagaina e mafai ona tatalaina ai le ua molia, e faatalitali ai lona faamasinoga.