O OE O LO’U TAMA?

VAEGA 127

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’igama le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai onao tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atule soso’oga o le tatou Fagogo, O OE O LOU TAMA?

****************************************

Sa faagata mai le tatou Fagogo i le vaiaso ua mavae, ina ua to’otuli le tamaitai o Salome i luma o Naomi ma ‘ai’oi iai e fa’amagalo mai o ia.

Ua matua’i fa’ate’ia lava le tamaloa o Alesana ma lona toalua o Eseta, i le tagi aueue o Salome ma ia ‘ai’oi atu ia Naomi e faamagalo mai o ia.

Ae o le taimi lena, ua na o le punou o Naomi ua leai sana tala e faia.

“Salome, o le a le uiga o lau tala ia Naomi e faamagalo atu oe?” o le oso atu lea o le fafine o Eseta ma saofa’i atu i tafatafa o lana ui’i.

“Naomi, o le a le mea lea o lo’o fa’ato’ese mai ai Salome?” o le toe fesili atu lea a Eseta ia Naomi.

Ua le tautala Naomi, ua na o le punou ae ua faapea mai Salome. “Faamolemole faamagalo mai a’u i lo’u laititi ma lo’u aivalea na iai i vaitaimi sa ta a’o’oga ai.  Ua ou talitonu ai nei i le faamatalaga ‘e le iloa lava ala o vae’.  Ua ou iloa lo’u faavalevalea ma lo’u leaga sa iai i na vaitaimi a’o ta talavou.  Sa ou manatu faamaualuga i lo’u malosi na iai, ae galo ia te a’u, e fai aso le Alii.”

Ua na o le fetilofa’i solo o le ulugalii o Alesana ma Eseta ma taumatemate po o le a le uiga o lenei mea ua tupu.

“Ruta! Suga Ruta! savali mai i’i!” o le valaau atu lea a Eseta i lana ulumatua.

Ua faatopetope atu Ruta ma saofa’i ifo i leisi itu o le nofoa, ae ua liliu mai iai le fafine o Eseta ma faapea mai.  “Faamatala e oe, o le a le mea lea e tupu?  O le a le mea lea o lo’o fa’ato’ese ai Salome ia Naomi?”

“Mom, e sili ona faamatala atu lava e Naomi le mea lena,” o le tali mai lea a Ruta.

“Faamatala mai e oe!” ua amata ona leotele le ‘ava’avau a le fafine o Eseta.  “O lea e fai mai Salome, o se mea na tupu i taimi o latou talavou ai.”

“Mom, onosa’i ma aua e te so’ona to’atama’i ma le alu i luga o lou suka,” o le tala lea a Naomi i lona tina.

“Eseta, ou te faato’ese atu foi ia te oe le tina.  Talu lava ona ou sau i totonu o le tou aiga, sa e le fai’esea lava lo’u tagata,” o le toe lauga mai lea a Salome, ae o lo’o to’otuli lava i luma o Naomi.

“E faamatala mai e seisi le mea lea o lo’o tupu?” o le toe fesili atu lea a le fafine o Eseta.

I lona leo toeititi a le lagona atu, sa amata loa ona faamatala mai e Salome ia le faamatalaga atoa o le la mafutaga ma Naomi, a’o la a’o’oga faatasi.  Atoa ai ma lona sauaina o Naomi, se’ia lava ina o la fa’au’u.

[E FAIA PEA]