Tofu i le falepuipui se alii 25 tausaga i lona tau faamata’u i se tamaitai talavou

Pago Pago - AMERIKA SAMOA

O le aoauli o le aso 11 o Setema, 2024, na agai atu ai sui malu o le malo mai i le Ofisa Leoleo i Fagatogo, i se aoga maualuga, ina ua ripotia mai e se Faufautua (counselor) a le aoga ia le a’afia o se tamaitai a’oga e 17 tausaga, i gasegase o le mafaufau, ina ua lafoina atu e sana uo tama ni faamatalaga taufa’amatau, i luga o le telefoni.

Ma na avea lea tulaga ma auala na fefe ai le tamaitai 17 tausaga, e toe fo’i i lona aiga.

Ina ua taunu’u leoleo i le a’oga, sa mafai ona o latou talatalanoa ma le Faufautua, le puleaoga faapea ma le tamaitai na a’afia.  Ma na fa’ailoa mai iai e le Faufautua ma le puleaoga lo la atugaluga ona e foliga mai ua a’afia le tamaitai 17 tausaga, i gasegase o le mafaufau, ona o le tulaga na tula’i mai i le va o ia ma le uo tama, e 25 tausaga.

I le taimi atoa sa talatalanoa ai leoleo ma taitai o le aoga, faapea le tamaitai 17 tausaga, sa tatagi ai lava le telefoni a le tamaitai na a’afia ma va’aia ai le igoa o le ua molia, i luga o le telefoni.

Na ta’ua e le pulea’oga lo la ave’esea o le telefoni a le tamaitai a’oga, mai ia te ia, ona o le tatagi so’o i totonu o le vassega.  Ma sa ia faitauina foi faamatalaga po o feau na alu atu i luga o le telefoni a le tamaitai aoga mai i le ua molia, o lo’o ia tu’ua’ia ai ma fa’afefeina le tamaitai a’oga.

Na musu le tamaitai a’oga e tali mai i fesili a leoleo, i le amataga o le latou talanoaga, ae ua na o le tagi, ae na mulimuli ane, ia tu’uina atu loa le numera telefoni a lona tua’a.

Sa faapea loa ona fa’afeso’ota’ia e leoleo ia le tua’a o le tamaitai a’oga ma faatonuina o ia e agai atu i le ofisa leoleo i Fagatogo e tusa ai ma lenei mataupu ua tula’i mai i lona alo.

E tusa ai ma le molimau tusia a le Faufautua, na alu atu le tamaitai a’oga ia te ia, a’o iai o ia i le ofisa a le puleaoga ma na ia fesiligia le tamaitai po o iai se mea ua tupu, ma ia faatonuina le tamaitai e faatali se’ia maua sona avanoa.

Ina ua mae’a lea, sa o la aumaia ma le puleaoga le tamaitai i totonu o le ofisa ma amata ona su’esu’eina o ia, lea na i’u ai ina fa’aali atu e le tamaitai a’oga ia lana telefoni, o lo’o talanoa mai ai lana uo tama.

Na fesiligia e le Faufautua ia le tamaitai a’oga e uiga i lana uo tama ma ina ua aveina atu e le Faufautua ia le tamaitai a’oga i lona ofisa, o iina na amata ai ona valavalaau mai le uo tama a le tamaitai a’oga, i luga o lana telefoni.

Sa faapea ona tago atu le Faufautua i le telefoni ma talanoa atu i le alii o lo’o iai ma sa ta’ua e le Faufautua, e foliga mai e le o mautu le mafaufau o le alii lea sa ia talanoa iai.  Ma na fa’apea mai le alii, e le iloa e le tamaitai a’oga se mea.  Ma sa faatonuina le alii e le Faufautua e a’ua ne’i toe vala’au mai ona o lea o le a alu le tamaitai a’oga i lana vasega. E ui ina sa tali mai le alii, ua lelei, ae peitai, e le’i umi foi ae toe tatagi le telefoni.

Ma sa ta’ua foi e le Faufautua lona va’aia o le tele o feau po o faamatalaga mai i le ua molia, sa faapea ona atili ai ona tagi le tamaitai aoga.  Ma o nei feau po o faamatalaga, e fai sina malolosi toe le lelei, o lea na manatu ai le Faufautua, e fa’ailoa atu le mea o tupu i le pulea’oga.  Ma na o la taumafai foi e a’apa atu i le tua’a o le tamaitai, ae peitai, sa le’i faamanuiaina lea taumafaiga.

Ae o le taimi lea, ua na o le tagi o le tamaitai a’oga ona e musu e iloa e lona tama le mea o tupu.  O le mafuaaga lea na valaau ai loa le puleaoga i le Ofisa a Leoleo mo se fesoasoani.

Sa faapea loa ona aveina atu e leoleo ia le tamaitai a’oga i le latou ofisa mo le fa’aauauina o a latou suesuega, ae a’o agai atu leoleo ma le tamaitai a’oga, sa valaau mai iai lona tama e fa’ailoa mai iai le alu atu o se alii i le latou fale.

Na su’esu’eina e le tua’a o le tamaitai a’oga ia le mea o iai le tamaitai, ona sa ia manatu, o lo’o la iai faatasi ma le alii lea, i totonu o le fale.  Sa fa’ailoa atu e le tamaitai a’oga i lona tua’a, o ia o lo’o i le ofisa a leoleo.

Ma o iina na fa’ailoa atu ai loa e le tua’a o lenei tamaitai a’oga, i leoleo, le iai o ni alii se toalua, sa molimauina e le tama matua o le tamaitai a’oga, o lo’o i totonu o le latou fale, e aunoa ma se fa’atagana.

Sa faapea loa ona agai atu ia leoleo i le fale o le aiga a le tamaitai a’oga, ae ua tu’uina le tamaitai a’oga i le ofisa a leoleo mo le fa’aauauina o a latou suesuega.  

Na fa’ailoa atu foi e leoleo i le tua’a o le tamaitai a’oga, le valaau mai i le Faufautua o le aoga, e tusa ai ma le faalavelave o lo’o tupu i lona afafine.

Sa vala’auina ai foi ma le aufaigaluega a le Matagaluega o Auaunaga Lautele (DHSS), e tusa ai ma lenei mataupu.

Ae ina ua taunu’u leoleo i le fale o le aiga o le tamaitai a’oga, sa va’aia e leoleo ia se alii o fealua’i mai i fafo o le fale.

Ina ua ulufale atu leoleo i totonu o le fale, sa o latou feiloai ai ma le tama matua a le tamaitai a’oga.  Ma na faamatalaina e le tama matua lona valaau i lona atalii (le tua’a o le tamaitai aoga) e tusa ai ma le o’o atu o se alii i le latou fale.

Ae o le taimi lea, sa fealuai ai seisi alii i fafo o le fale ma faasinosino i le taualuga o le fale, ma ia fa’ailoa atu i leoleo, o lo’o iai se tagata o lo’o lafi i le taualuga o le fale.

Na faapea ona tauvalaau atu leoleo i le tagata lea, e sau i lalo.  Ae peitai, na i’u ina fa’aaogaina e leoleo se apefa’i e fepe’ei ai i luga o le fale.  Ae e leai seisi na iai i luga o le taualuga o le fale.  Ae toe fa’asino e le alii lava lea e tasi ia leoleo, i leisi itu o le taualuga o le fale.  Ma na su’esu’e foi e leoleo lea itu, ae e leai seisi na iai.

Sa fa’atalanoaina e leoleo ia le tama matua ma sa fa’ailoa mai iai e le tama matua i leoleo, o le alii lea o lo’o i totonu o le fale, o lona suafa o Mapu Laetigaga, ma o lo’o fai se la faigauo ma lona ‘granddaughter’.  Sa ta’ua foi e le tama matua, le alu atu o Leatigaga ma fa’ailoa atu ia te iai, le iai o ni tagata o lo’o osofa’ia lo latou fale ma lalafi i luga o le taualuga o le fale.

Mulimuli ane, sa faapea ona su’esu’eina e leoleo ia le alii lea sa i totonu o le fale ma na ia fa’ailoa mai foi i leoleo, o lona igoa o Mapu ma o ia o le uo tama a le tamaitai a’oga.

Sa fesiligia e Leatigaga ia leoleo po o fea o iai le tamaitai a’oga, ma sa fa’ailoa atu iai e se tasi o leoleo, o lo’o iai o ia i le ofisa a leoleo i Fagatogo.  Ae na mana’o Leatigaga e fa’amaonia lea tulaga, ma ia fesiligia pe fia tausaga o le tamaitai lea o lo’o i le ofisa a leoleo.

O iina na ave faapagotaina ai e leoleo ia Leatigaga, ae ina ua taumafai leoleo e tuuina o ia i totonu o le taavale, sa taumafai le ua molia, e sola ese mai i fafo, ma i’u ina pa’u mai ai se naifi faapata falaoa, mai totonu o le taga o lona ofu.

Ma a’o agai atu le taavale a leoleo i le ofisa a leoleo, sa fa’aauau ona ‘e’e le ua molia ma faatonu leoleo, e valaau le latou faifeau.

Ina ua o’o atu le taavale a leole i luga o se mati’e, sa taumafai le ua molia, e oso i fafo mai i le faamalama o le taavale.  Ae na mafai ona faatu e leoleo le taavale ma toe pu’eina o ia.  Ma na fai sina faigata ona toe tu’uina o ia e leoleo, i totonu o le taavale.  Lea na i’u ina fesoaoani mai ai nisi o le aumaga, ma tu’uina loa le ua molia i totonu o le taavale a leoleo ma agai atu ai loa i le ofisa a leoleo.

Sa musu le alii ua molia e fai sana molimau tusitusia.

Ma na fa’apea foi ona toe ave i tua e le tua’a o le tamaitai aoga ia sana tagi sa faia e faasaga i le ua molia.

Ua molia nei ia Leatigaga i faitauga e lua, e aofia ai ai le tete’e i le ave faapagotaina o ia faapea ma le faia o uiga taufa’amata’u, o ia moliaga, o vaega ‘A’ o soligatulafono mama, e mafai ona nofosala ai se tasi i le falepuipui, i le tausaga atoa, po o se sala tupe e $1,000; po o faasalga uma e lua.

E $5,000 se vaegatupe na faatulagaina e mafai ona tatalaina ai i tua ia le ua molia, e faatalitali ai lona faamasinoga.