E FAI O LENEI AE O LENA

O LE GAOI I TOTONU O LE POTU TEU AI MEA’AI

I se faatoaga i se atunu’u mamao lava, sa nonofo ai se tamaloa ma sona to’alua.  O se ulugalii fealofani ma le alolofa o leisi i le tasi.

Ae peitai, o lenei tamaloa, e iai nai ona uiga na e oso fa’avaitaimi, e le fiafia ai tele le tina o le aiga.

O le tasi aso, na fo’i mai ai le tamaloa mai lana galuega ma tilotilo solo i totonu o le fale ma faapea atu i lona to’alua, “Oka se mesi o lenei fale.”

Ua oso fia fusu mai le tina ma faapea mai, “Ia o le a lou manatu, e fai o le tagamea, o le auli, o le tausiga o le pepe, o le kukaina o sau mea’ai.  E le faigofie.”

Ae oso atu le tamaloa ma faapea atu, “Oka, e le o ni feau na mea. E le mafai ona faatusatusa mai na galuega laiti i a’u galuega o lo’o fai i le faatoaga.”

Ua avea le faamatalaga a le tamaloa ma tulaga ua le fiafia ai tele le tina o le aiga ma ia faapea atu loa, “Afai e faigofie, ia nofo mai la i se aso e te tago e tapena le fale, fai le meaai ma tausi le ta pepe, ae ou alu atu e tausi lau faatoaga.”

Ua ata le tamaloa ma faapea mai, “O oe pei ua leaga lou ulu.”

Na o’o i le aso na soso’o ai, na manava mai ai foi galuega a le tamaloa, ma toe fai foi lana tala lava lea e tasi.

Ae ua faaopoopo iai ma lana ote e uiga i le le suia o le povi.

O le ita tele o le fafine na ia faapea atu ai loa, “Ia ua lelei.  Nofo taeao i le fale e te tago e fai tatou feau o le fale, ona e faigofie.  Ma fai sau malologa.  Ae o le a ou alu e fai lau faatoaga.”

Ua faapena loa ona fai.  Ua usupo lava le fafine ma agai atu i le faatoaga.  

Ae o le taimi lena i le tamaloa, ua fiafia lava i le sasa’o o lana moe, ona ua le usu i le faatoaga i lena taeao.

Ma na fa’ate’ia o ia, ina ua tagi leotele le pepe.  Ma ia tu a’e ai i luga ma tautevateva atu e fai le susu a le pepe.

E tu le mata o le la, ae faato’a toe te’i ifo i luga le tamaloa ma ia tamo’e atu i le si’i mai le pepe, o lo’o fa’ataitai o i le toe fia ‘ai.

Ina ua mae’a ona fafaga ma fa’ata’ele le pepe ma toe faamoe, na saofa’i ane ai le tamaloa e to lona sela.  Ae ia vaai atu i le uati, ua toeititi o’o i le taimi lea e masani ona ia sau ai i le fale e fai lana taumafataga o le aoauli.  Ae o lea e leai ma se feau o le fale ua faia, e leai foi se meaai ua kukaina.

Ua fetamoea’i le tamaloa i le tapenaga o le fale, faamama ipu, ave a latou lavalava palapala i le paipa. 

E tau tamo’e atu le tamaloa e sui le pova lea e i fafo o le fale, ae toe au’e’e atu le pepe, ua ala.

Ua faatopetope mai le tamaloa, ma si’i atu le pepe ma sui lona ofu, fai lana fagu susu ma taumafai e toe faamoemoe.

Ua moe le pepe, ae lagona e le tamaloa le pa’o mai o luma o le fale ma le alu atu i luma, ia le povi lea ua so’a mai le faitoto’a o le fale, i le su’ega o sana meaai.

Na le mafai ona to le sela a le tamaloa, ae ua tamo’e atu i le toso le povi agai i tua o le fale i se mea o iai le vao, ma nonoa ai.

Ona amata lea ona fai le kuka a le tamaloa, ae toe ala mai luga le pepe.

Ua tu’u le meaai ae toe alu atu le tamaloa e toe vaai ma faamoemoe le pepe.  E le’i moe lelei atu le pepe, ae sosogi mai e le tamaloa se mea e pei ua manogi mu.

Ma le tamo’e mai o le tamaloa, ia lea ua talali atu le ulo i luga o le ogaumu, ua galo ia te ia ona tape le ogaumu.

Ae matala atu ma le faitoto’a ua taunu’u atu le tina mo le taumafataga o le aoauli.

[IA MANUIA LE ALO ATU I PALOTAGA I LENEI ASO]