TALA I VAIFANUA

Pago Pago - AMERIKA SAMOA

MASALOMIA SE ALII I LE TITINAINA O LONA TINA E FA’ASAO MAI AI I SE AGAESE

O lo’o ua molia nei se alii e suafa ia Jared Mageo, i le fa’ao’olima, ina ua ripotia o ia e lona tuafafine, i le Ofisa a Leoleo, ina ua masalomia o ia, i le titinaina o lona tina, ona e le’i mana’o e fa’aaoga e lona tina se agaese, e fai ai aga galuega i le faatoaga.

O le tuafafine a Mageo sa fa’afeso’ota’ia le Ofisa Leoleo e tusa ai ma le gaioiga a Mageo sa faia.

O le taeao o le aso 11 o Setema, 2024, o lo’o ta’ua ai i faamaumauga a le malo, sa tupu ai lenei faalavelave.

Ina ua taunu’u leoleo i le nofoaga na tupu ai le faalavelave, sa faasino ifo iai e le tina na a’afia i leoleo, ia lona alo, o lo’o faia sana malologa i totonu o le fale.

Sa faapea ona ave faapagotaina ai loa o ia e leoleo.  Ma sa taumafai leoleo e faia sona su’esu’ega i le Ofisa a Leoleo i Fagatogo, ae peitai, sa musu le ua molia, e faia sana faamatalaga.

Ae e tusa ai ma le molimau tusitusia a le tina, sa ia ta’ua ai e faapea, o le aso 10 o Setema, sa ia fa’ailoa atu ai i le ua molia, o le a ia fa’aaogaina se agaese e faia ai ana galuega i le fa’ato’aga.

Ae peitai, na fa’atonu le tina e le ua molia, e aua ne’i tago i le agaese.  

Ma sa ta’ua e le tina, e foliga mai ua le fa’aaloalo atu le ua molia, ma o lea na oso ai lona le fiafia ma otegia le ua molia, ae oso atu le ua molia, i le taumafai e titina o ia.

O le moliaga o a Mageo, o le Fa’ao’olima i lona tulaga e tolu (sauaga i totonu o le aiga), o se vaega ‘A’ o soligatulafono mama, e mafai ona nofosala ai i le falepuipui, i le o’o atu i le tausaga atoa, po o se sala tupe e $1,000; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia, e faatalitali ai lona faamasinoga.

PASIA E LE MAOTA O SUI A AMERIKA IA PILI E FESOASOANI I PENEFITI O LE SAOGALEMU

Ua fa’aalia e le afioga i le Sui Faipule o le teritori, i totonu o le Konekeresi, le afioga Uifa’atali Amata, ia le agaga fiafia ma le faafetai, i le pasiaina e le Maota o Sui a Amerika, ia se pili sa ia fesoasoani i le lagolagoina (Social Security Fairness Act, H.R. 82).

O lenei pili, o le a ave’esea ai ni vaega se lua, o lo’o fa’aitiitia ai peneiti mo le silia ma le to’a 2 miliona tagata Amerika, ua ritaea mai i auaunaga i totonu o galuega, e aofia ai Ofisa a leoleo, Vaega Tineimu, Faiaoga ma tagata faigaluega a le Malo.

O lenei pili sa taitai e afioga i Faipule ia Garret Graves mai i Louisiana, o le itu Ripapilikana ma Abigal Spanberger mai Virginia, mai i le itu Temokalasi.

Sa mafai ona pasia i le vaiaso ua mavae, e le Maota o Sui, ia lenei pili, i se palota 327-75.  Ma ua fa’ao’oina atu nei le pili i le Maota o Senate, lea o lo’o lagolagoina e Senatoa e to’a 62.

E pei ona sa saunoa Amata, e to’atele ni tagata Amerika i Samoa ma isi motu o le Pasefika ua mae’a ona ritaea mai i auaunaga lautele i totonu o Amerika.  Ma o nei tagata Amerika e 2 miliona, e tatau ona o latou mauaina penefiti atoatoa o a latou Saogalemu.  Ma o lenei pili, o se tasi o ala e momoli atu ai le agaga faafetai i nei tagata faigaluega ua ritaea, mo la latou tu’uto i la latou auaunaga, ma o se tulaga sa’o e tatau ona fai.

FAANOANOA SE TUFUGA TATAU I LE FA’AAOGAINA O LE LA’EI SAMOA A TAMAITAI (MALU)

Sa fa’aalia e le afioga Su’a Sua Suluape Alaivaa, lona faanoanoa tele ona ua loa ona ia taumafai ona fa’aulufaina se pili e mafai ona puipuia ai le mamalu o la’ei fa’aSamoa moni, le tatou ma le malu, aua tupulaga fai a’e o le atunu’u.

Sa ta’ua e le afioga i le Tufuga Tatau, o lona faanoanoaga e fa’atatau tonu lava I le fa’atauina o mea sina a le atunu’u (e pei o le tatau Samoa) i tagata e le o ni Samoa.

Na fa’aleoina e le afioga Su’a lona to’atama’i i tala ua salalau nei i luga o upega tafa’ilagi, mai i se tamaitai pese mai i le motu o Tonga, ia melenau Lino, lea ua faapea, ua ta ina sona malu faa Tonga.  Ae o lona malu na ta e se tufuga tatau mai Samoa, le susuga ia Tulouena Mareko.

Sa saunoa le afioga Su’a, e le o se malu le pe’a a Tonga, e ese le latou igoa mo lea tulaga.  Ae ua mafua lenei tulaga, ona o tufuga tatau a Samoa, ma o se tulaga, o lo’o ia taumafai e taofi.

E pei ona sa ia fa’asoa atu ai i le Samoa Observer, sa saunoa ai le afioga Su’a, o lo’o ia taumafai, ma o lo’o taumafai foi le Asosi a le Malofie, e saili se auala, e mafai ai ona fofoina nei ituaiga faafitauli.

O le tatau faa Tonga, e ta’ua o le tatatau, ma ua loa ona le toe fa’aaogaina pe toe taina.