TALA O LE PASEFIKA

PASEFIKA

OSOFAIA SE TINA MA SONA ALO I PAPUA NIU KINI

Na fa’aleoina e le Minisita o ‘Art and Culture’ a Papua Niu Kini lona to’atama’i tele ona o se fa’alavelave sa tulai mai i luga o se va’a turisi na taula i Papua, lea na osofa’ia ai se tina ma si ona alo tamaitai aua se taumafaiga e gaoia a la mea totino.

O lenei fa’alavelave na ripotia e se tasi o vaega fa’asalalau lotoifale i Papua, ma sa tupu i Rabaul, East New Britain, i le masina ua tuanai.

Ua fa’aalia le nofo popole o ofisa va’a turisi e tusa ai ma le saogalemu o a latou pasese, ma ua o latou taga’i nei i le taofia o a latou faigamalaga i Papua.

O lo’o fa’aauau pea ona saili e leoleo ia le po o i latou, na faatupuina lenei faalavelave.

FAIGA TAUFA’AMATA’U E FAASAGA IA NICOLAS METZDORF MA LONA AIGA

E to’afitu ni tagata ua mae’a ona fa’atulagaina a latou faamasinoga i Niu Kaletonia ia Aperila 2025, talu ai ni faiga taufa’amata’u, e o’o lava i le oti, sa faia e faasaga ia Nicolas Metzdorf ma lona aiga.

O Metzdorf o se tasi o taitai o le itu e ta’ua o le “New Caledonian Anti-Independence”.

E tusa ai ma ripoti a vaega fa’asalalau i totonu o Niu Kaletonia, o i latou ia ua molia, sa o latou tu’ufa’atasia ni tusitusiga e fa’ailoa mai ai lo latou pulea o fanua a le aiga i Poya, talu mai fetauaiga fa’avaomalo ia Me o le tausaga nei.

Ma i se ata vitio sa fa’asalalauina i luga o a’upega tafa’ilagi, ua fa’aleoina ai e nisi o i latou ia ni tulaga tau fa’amata’u, e o’o lava i le oti.

O lea na lokaina ai ni tagata se to’afitu i le aso Faraile o le vaiaso ua tuanai.

Ae peitai, o lo’o te’ena e i latou ia nei tu’uaiga ma le faamatalaga, e le o le uiga tonu lea o a latou tusitusiga na faia, ae o le uiga o le oti, o le oti faaleagaga.

LAPATA’IA SAMOA E TUSA AI MA LAPISI E GAOSIA I UGA

Ua fa’aalia mai e le sui faapitoa a le faalapotopotoga o Malo ‘Aufa’atasi (Special Rapporteur) e gafa ma mataupu e a’afia ai aia tatau o tagata, faapea ma tulaga e ona o’o ai le maliu i se tagata ona o vaila’au o’ona, le feagai ai o Samoa ma se a’afiaga tele ona o faaputuga o lapisi e gaosia i uga.

Ma ua talosagaina e Marcos Orellana ia le taofia vave o le toe fa’aaogaina o vailaau o’ona (paraquat & glyphosate).

I sana asiasiga lata mai nei i Samoa, na ripotia mai ai e vaega fa’asalalau i totonu o Samoa le faaleoina e Orellana o se lapataiga e faasaga i lenei mataupu taua.

Ma na ta’ua e Orellana, e ui lava o lo’o taumafai le atunu’u e taofia le toe fa’aaogaina o oloa e gaosia i le uga, ae peitai, e le o mafai ona taofia le fa’aogaina pea o ia ituaiga oloa.