Loka matua i le fufusu i luma o le fanau

Pago Pago - AMERIKA SAMOA

E tusa ai ma fa’amaumauga a le malo, o le aoauli o le aso muamua o Setema, na fa’afeso’ota’i atu ai e se tamaitai le Ofisa a Leoleo i Tafuna, ona o se misa a se ulugalii tuaoi, o lo’o fai ae o lo’o fetagisi le fanau.

Ua molia uma ai nei le tamaloa ma lona to’alua i moliaga o le Faaleagaina o mea totino, i lona tulaga e lua (sauaga i totonu o le aiga), o se vaega ‘A’ o soligatulafono mama, e mafai ona loka ai le gata i le o’o atu i le tausaga, po o se sala tupe e $1,000; po o faasalaga uma e lua.

Na molia foi le tina o le aiga i le Faatupu Vevesi i totonu o le aiga (sauaga i totonu o le aiga), o se vaega ‘C’ o soligatulafono mama, e mafai ona nofosala ai i le falepuipui, i le o’o atu i aso e 15, po o se sala tupe e $300; po o faasalaga uma e lua.

E $1,000 sa faatulagaina e mafai ona tatalaina ai le ulugalii mai i le falepuipui, e faatalitali ai a la faamasinoga.

(O le a le lomia e le Samoa News suafa o i latou na a’afia ma e ua molia, aua le puipuiga o fanau iti.)

O lo’o ta’ua i faamaumauga a le malo, e tusa ai ma le faamatalaga a le tuaoi lea na valaau i le ofisa a leoleo, sa ia lagonaina le tau’alaga a le fafine, e foliga mai o lo’o sauaina o ia.

Ina ua taunu’u leoleo i le nofoaga na tupu ai le faalavelave, sa faamatalaina ifo iai e le tuaoi lea na valaau i le ofisa a leoleo, o lona fale e pe a ma le 15 futu le mamao mai i le fale o lo’o pisa mai ai le ulugalii.  Ma na faamatala e le tamaitai lona lagonaina o se tauvaga ‘e’e ma palauvale a le tamaloa ma le fafine, ae o lo’o fetagisi le fanau.

(O le fanau e 2 ma le 6 tausaga.)

Sa ta’ua foi e le tamaitai tua’oi lona lagonaina o le tau’ai ma le ta’ei mai o meafale.  Ma na ia taumafai e telefoni le tamaloa i totonu o le fale, ae peitai, sa le’i tali mai lana telefoni.  Ona ia faatalitali lea mo ni nai minute, ae ua faateteleina ai le pisa a le ulugalii.

O lea na ia valaauina ai loa le ofisa a leoleo, ona o lona popole tele i tamaiti.

Ina ua agai atu leoleo i le fale a le ulugalii, sa o latou valaauina le tamaloa e sau i fafo ma le fale.  E savali mai le tamaloa, o lo’o fa’asausau ma na iloa atu e leoleo ia ma’osia i luga o lona fatafata, ua ma lona manava.

Na fesiligia le tamaloa e leoleo, po o le a le mea na tupu.  Ae tali le tamaloa, e leai se mea o tupu, o le la taugaupu lava ma lana uo tamaitai.

Sa faapea loa ona tu’uina le tamaloa ma lona afafine laititi i leisi taavale, ae o le tina ma leisi teineititi i totonu o leisi taavale a leoleo, ma aveina atu loa i latou i le ofisa a leoleo, mo le fa’aauauina o su’esu’ega.

I le ofisa a leoleo, sa faamatalaina ai e le tamaloa ua molia e faapea, sa o la pisa ma lana uo tamaitai (po o le tina o le aiga), ona o lona (tamaloa) moe ae le kukaina se meaai mo le fanau.  

Na ta’ua foi e le tamaloa ua molia le malepe o lana telefoni feava’i, ma ina ua ia fesiligia lona to’alua, sa fa’amaonia mai e lona to’alua, o ia na talepeina le telefoni.

Ma o le mea lea na fai ai le la tauvaga ‘e’e ma palauvale, i luma o le la fanau.  

Na faamatalaina foi e le tamaloa, lona taumafai e savali i fafo, ae mau lona to’alua i lona mitiafu ma una’i o ia agai i le pa sima ma ina ua ia maua le avanoa e sola ese atu ai mai le fale, sa ia tago i le tata’e ia le iPad a lana fanau.

I le faatalanoaina e leoleo, o le tina a le aiga, sa ia ta’ua ai le fesiligia o ia e lona to’alua, pe aisea o latou momoe ai i luga o le moega ae o lo’o moe o ia (tamaloa) i le foloa o le fale.

Sa ta’ua e le tina le fa’aauau ona tomumu lona to’alua, ae ona (tina) tago atu i le u’u mai lana telefoni ma togi i lalo ma ta’e ai.  Ma sa fa’aauau ai le la taugaupu, ma o’o atu i le palauvale o leisi i leisi, i luma o le fanau.

Na ta’ua foi e le tina ia le u’u mai e lona to’alua o le ‘iPad’ a le la fanau ma fai atu o lea o le a alu e talepe.  Ma o le mafuaaga lea na ia (tina) a’apa atu ai ma toso mai le mitiafu a lona toalua, ma o la pa’i lima ai loa.