Molia se tamaloa i lona fasi to’alua ae o lo’o si’i e le fafine le la pepe 6 masina

Pago Pago - AMERIKA SAMOA

E tusa ai ma faamaumauga a le malo, ua molia nei se tamaloa e 44 tausaga, i le fa’ao’olima, ina ua vala’au e lona toalua ia le ofisa a leoleo ma ripotia ai o ia.

O lenei fa’alavelave na tupu i le po o le aso 26 o Aukuso.

(O le a le lomia e le Samoa News igoa o i latou na a’afia ma le ua molia, ona o le puipuiga o fanau iti.)

Ina ua taunu’u leoleo i le fale o le ulugalii, sa faapea ona talatalanoa ma le tina lea na valaau mai i le Ofisa a Leoleo.  

Ma na fa’amatalaina e le tina e faapea, na manava atu le tama o le aiga, o lo’o si’i mai e le tina ia le la pepe e ono masina.  Sa alu atu le tama ma i’ini ia le vae o le pepe, ma tagi ai le pepe.  Ona faapea atu lea o le tina i lona toalua, “Aua le aia fua [t] o le teine.” (Se’i tulou).

Ae faasaga mai le tama o le aiga, i le tu’i faalima foliga o le tina, a’o ia si’iina pea le pepe.

Na ta’ua foi e le tina le lagona mai e lona tina le la pisa, ma sa faapea ona tago atu le ua molia, ma si’i ese mai le pepe mai i le tina na a’afia.  Sa fa’aauau le faamatalaga a le tina na a’afia, i lona tago atu i le u’u mai lana telefoni ma savali loa i fafo o le fale ma valaau loa leoleo.

Sa faapea loa ona ave faapagotaina e leoleo ia le ua molia.  Ae peitai, ina ua o latou taunu’u i le ofisa a leoleo, na musu le ua molia, e fai sana faamatalaga e tusa ai ma le faalavelave na tupu.

Ua molia nei le tama o le aiga i;

Faitauga 1:  Faatupu Vevesi i totonu o Aiga (Sauaga i totonu o Aiga), o se vaega ‘C’ o solitulafono mama, e mafai ona nofosala ai se tasi i le falepuipui, i le o’o atu i aso e sefululima, po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e tolu (Sauaga i totonu o Aiga), o se vaega ‘A’ o solitulafono mama, e mafai ona faafalepuipui ai se tasi i le o’o atu i le tausaga e tasi, po o se sala tupe e $1,000; po o faasalaga uma e lua.

Faitauga 3:  Faia o se gaioiga e ono a’afia ai le fanau iti (Sauaga i totonu o Aiga), o se vagga ‘A’ o solitulafono mama, e mafai ona faafalepuipui ai se tasi i le tausaga atoa, po o se sala tupe e $1,000 po o faasalaga uma e lua.

E $1,000 le vaegatupe na fa’atulagaina, e mafai ona tatalaina ai le ua molia mai i le falepuipui, e faatali ai lona faamasinoga.