Pou Toute a Leoleo

Pago Pago - AMERIKA SAMOA

MOLIA NI ALII SE TO’ATOLU I LE FAAO’OLIMA

O le aso 20 o Aukuso, 2024, na vala’au ai se alii i le Ofisa a Leoleo i Tafuna, e tusa ai ma se alii na masalomia i lona osofaia o le fale a le na vala’au i le ofisa a leoleo, i le masina o Iulai.

Ae ‘emo ane le ata, ua loka faatasi le alii na valaau i le Ofisa a Leoleo, ma nisi alii se to’alua, i le fa’ao’olima.

O i latou ua molia, e aofia ai Pio Lito, Tommy Correia ma Unless Lemauga.

O lo’o molia ia Lito ma Correia i le;

Faitauga 1:  Fa’ao’olima i lona tulaga e lua, o se vaega ‘D’ o solitulafono  mamada, e mafai ona fa’afalepuipui ai i le le sili atu ma le lima tausaga, po o se sala tupe e le silia ma le $5,000; po o faasalaga uma e lua.

Faitauga 2:  Fa’ao’olima I lona tulaga e tolu, o se vaega ‘A’ o solitulafono mama, e mafai ona faafalepuipui ai i le le silia ma le tausaga, po o se sala tupe e le silia ma le $1,000; po o faasalaga uma e lua.

Ae o Lemauga, sa molia i Faitauga 1 & 2 - Fa’ao’olima i lona tulaga e tolu, o se vaega ‘A’ o solitulafono mama, e mafai ona faafalepuipui ai i le le sili atu ma le tausaga, po o se sala e le smilla ma le $1,000; po o faasalaga uma e lua.

E $10,000 na faatulaga e tatalaina ai Correia, $5,000 mo Lito ae $1,000 mo Lemauga, e faatalitali ai a latou faamasinoga.

E tusa ai ma fa’amaumauga a le malo, o le po o le aso 20 o Aukuso, sa valait ai le alii o Lito i le Ofisa a Leoleo, e tusa ai ma se alii o lo’o latou masalomia ma ona atalii, na osofa’ia le latou fale, i le masina o Iulai.

Ina ua taunu’u leoleo, sa o latou va’aia ni alii se tonfa, e tosatasi o lo’o saofai i lalo.

Sa faatalanoaina e leoleo le tagata pito i mata na iai o le to’afa lea, o le alii lea o Lito ma sa taqua e Lito, o le alii lea ua latou pu’eina, o se alii na osofaia le latou fale.  Na ta’ua ai e Lito lo latou fasia o lea alii, na aofia ai ma le sasaina e Lito o le ulu o lea alii, i se laupapa 2x4.

Na faapea ona ave faapagotaina e leoleo ia le alii lea na masalomia i lona osofaia o le fale o le aiga a Lito, o lona suafa o James Fitiao.

Ae sa faapea foi ona lokaina atu ai ma Lito, Lemauga ma Correia ma ave ai foi ma latou i le Ofisa a Leoleo.

Ina ua faatalanoaina e leoleo ia Fitiao, sa ia ta’ua le fasiina o ia, ona o se masalosaloga, ma na sasaaina e alii nei ia se kesolini i luga o ia, ma taumafai e susunu o ia.  Sa ia ta’ua foi le sasaina o ia e Lito i le laupapa 2x4.

Ona o le tuga o manu’a o Fitiao, sa faapea ona logoina le EMS mo le togafitia o ona manu’a, ae e le’i aveina atu o ia i le falemai.

Ma o lea lava afiafi, sa fa’atalanoaina ai e leoleo ia Lito, Correia ma Lemauga.

Sa faamatalaina e Correia e faapea, e leai sana vaega i le faalavelave na tupu.  Na ia ta’ua e faapea, e tupu le faalavelave ae o lo’o ia taumafai e kamuta le pusa aisa a lona ‘uncle’, ae fa’ate’ia o ia i le o’o atu o taavale a leoleo.

E ui ina fa’ailoa atu e leoleo ia Correia le ta’uina o lona igoa e Fitiao, o se tasi na fa’ao’olima ia te ia (Fitiao), ae peitai, sa fa’afiti lava Correia, e na te le iloa se mea na tupu.

I le faatalanoaga o Lemauga sa ia ta’ua ai lona lagonaina o le ou a taifau i tafatafa o le latou faletalimalo, ma ia savali mai ai e siaki le mafuaaga o le pisa o taifau.

Ma na ta’ua e Lemauga lona va’aia o se alii o savali ma tulei atu sana uila, mai i le itu o le faletalimalo.  Na savali atu iai Lemauga ma u’u le mitiafu o le alii ma toso atu aga’i i le latou fale.

Sa fa’ailoa mai e lona tama, o le alii lea na osofa’ia le latou fale.

Na fa’amaonia e Lemauga, o ia na tu’iina le mata o Fitiao ma ina ua pa’u i lalo, sa o la kikiina o ia, ma Correia.

Sa fesiligia Lemauga pe airea na mango kesolini ai ia Fitiao, sa tali Lemauga, sa o la sasaaina ma Correia ia se kesolini i luga o lea alii, ma taumafai e susunu o ia.

I le molimau faamatala a Lito sa ia ta’ua ai lona to’atama’i tele, ona o le osofaia o lo latou fale ia Iulai, ae o lea fa’ato’a maua le tagata na faia lea tulaga.

Ma sa le mafai ona taofiofi lona ita, o le mafuaaga lea na ia fesoasoani ai i le fasiga o le ua a’afia.

Sa ta’ua foi e Lito, lona taumafai e ta le taifau i le 2x4 ae misi, ae tau ia Fitiao.

MOLIA SE TAMAITAI 29 TAUSAGA I LONA FAAOOLIMA I LANA UO TAMA

O le po o le aso 19 o Aukuso, 2024 na o’o atu ai se valaau i le Ofisa Leoleo i Tafuna, ona o se misa a se alii ma sana uo tamaitai, lea o lo’o masalomia ai le pa’i lima o le tamaitai i lana uo tama.

E tusa ai ma faamaumauga a le malo, o lo’o ta’ua ai le faamatalaga a le alii na a’afia e faapea, o le toe fo’i atu o le la faatauga ma lana uo teine, o Siniva Bryce (lea ua molia), sa ia fesiligia ai Bryce, pe aisea e le fa’aaloalo ai. 

Ae na ta’ua e le alii na a’afia e faapea, o iina na amata ona ‘e’e ma palauvale ai le tamaitai ua molia, ona ia (tamaitai) e u’u mai se mea mai luge o le laulau.  

Sa ta’ua e le alii na a’afia, lona taumafai e taofiofi le ua molia, ae peitai, ua tago le tamaitai ma ta lona ulu agai i le pa sima o le fale.

Ona tu’i lea e Bryce o le mata o le alii na a’afia.  Toe u’u mai ipu mai totonu o le umukuka, ma tau’ai ai le alii na a’afia, ae faai’u i le u’una’i i lalo o le ogaumu na iai le la mea’i.

Ua molia nei Bryce i faitauga e lua, e aofia ai;

Faitauga 1:  Fa’ao’olima I lona tulaga e tolu (Sauaga i totonu o aiga) - o se vaega ‘A’ o solitulafono mama, e mafai ona nofosala ai i le o’o atu i le tausaga, po o se sala tupe e $1,000; po o fa’asalaga uma e lua.

Faitauga 2:  Faatupu Vevesi i totonu o aiga (Sauaga i totonu o aiga) - o se vaega ‘C’ o solitulafono mama, e mama ona nofosala ai i le o’o atu i aso e sefululima, po o se sala tupe e $300; po o faasalaga uma e lua.

E $1,000 se vaegatupe na fa’atulagaina e mafai ona tatalaina ai le ua molia mai i le falepuipui, e faatalitali ai lona faamasinoga.