Molia se alii 29 tausaga i le Gaoi ma le Faomea

Pago Pago - AMERIKA SAMOA

O le taeao o le aso 3 o Aukuso, e tusa ai ma fa’amaumauga a le malo, na vala’au atu ai se tamaitai i le Ofisa a Leoleo i Tafuna, e lipotia se alii e le masani ai, na tu’itu’i atu i lona faitoto’a i le 6 i le taeao o lea aso.

Sa ta’ua e le tamaitai na valaau atu i leoleo, na osofa’ia e le ua molia, le susuga ia Ishmael Sefo, ia lona fale, e aunoa ma se fa’atagana, ma gaoia lana (tamaitai) ato tupe o lo’o iai se vaegatupe e $300, o se laptop e $1,000 lona tau, o ni ‘credit cards’ e fa ma lana laisene aveta’avale.

Ina ua o’o atu leoleo i le fale o lenei tamaitai, sa ia faamatalaina i leoleo e faapea, sa galo ia te ia, ona loka le faitoto’a pito i luma o lona fale ma ina ua savali atu i le potu malolo, sa ia va’aia le matala o lana ato, ae o lo’o ta’atia lana tusi folau i luga o le nofoa.

Sa faamatala e le tamaitai, na ia manatua le valavala’au atu e le ua molia, ia lona igoa a’o iai i lona fale.

Na fesiligia e leoleo ia le tamaitai, pe e tau i le alii ua molia, sa ta’ua e le tamaitai, sa masani ona alu atu le alii lea i lona fale, ma sana uo mai i le latou lotu, e galulue i le taualuga o lona fale.

Na fa’ailoa ane foi e le tamaitai i leoleo, le fa’aaogaina e se tasi o lana ‘credit card’ i le 11:10 i le taeao lava lea, i se faleoloa e ta’ua o le ‘IFIX’.

Sa faapea loa ona agai atu leoleo i le kamupani a le ‘IFIX’ ma sa faamatalaina ifo iai e le tamaitai faatauoloa, le alu atu o se alii ma faatauina se telefoni feavea’i e $190 ma sa ia fa’aaogaina ia se ‘NavyFed card’.

Ma na ta’ua foi e le fa’atauoloa, le le’i mae’a o le fa’atauga a lea alii ona sa te’ena lana fa’atauga e le masini.

Na faapea ona matamata leoleo i ata vitio a le faleoloa, ma va’aia ai se alii umi ma le lapo’a, o taumafai e fa’aaoga le ‘credit card’ e fai ai sana faatau.

Sa faamautuina ai iina, o le susuga lea ia Sefo, lea o lo’o masalomia foi i le osofaia o ni isi fale o aiga.

Ina ua vala’au leoleo i le fale o Sefo, sa fa’ailoa mai iai e se tamaitai na taliina le telefoni, e le o toe nofo i le latou aiga ia Sefo ma e le o iloa po o fea o iai.

E le o ma’oti mai i totonu o faamaumauga a le malo, le aso na ave faapagotaina ai le ua molia.

Ae o ona moliaga, e aofia ai;

Faitauga 1 & 2  Faomea i lona tulaga e lua ma le Gaoi; o se vaega ‘C’ o solitulafono mamafa, lea e mafai ona nofosala ai se tasi i le falepuipui, i le le umi atu ma le fitu tausaga, o se sala tupe e le silia ma le $5,000; po o faasalaga uma e lua mo le moliaga e tasi.

faitauga 3:  Soli fanua e aunoa ma se fa’atagana; o se vaega ‘B’ o solitulafono mama, e mafai ona nofosala ai i le falepuipui, i le ono masina, po o se sala tupe e $500; po o faasalaga uma e lua.

E $10,000 se vaegatupe na fa’atulagaina e mafai ona tatalaina ai i tua le ua molia, e faatalitali ai lona faamasinoga.