Tofu i le falepuipui ona o le fa’aumu i totonu o le nu’u

Pago Pago - AMERIKA SAMOA

E tusa ai ma fa’amaumauga a le malo, o le aoauli o le aso 19 o Aukuso, na maua ai e le Ofisa Leoleo i Fagatogo, ia se valaau mai i se tama matua e tusa ai ma le alii e suafa ia Gibson Siafau, o lo’o pisapisao ma faatupu vevesi i totonu o le nu’u.

Na ta’ua foi e le tama matua na valaau atu i le ofisa a leoleo, le palauvale leotele ma le fa’aumu o Siafau i totonu o le nu’u, ma ona lu’i ina so’o se tasi o le nu’u, e la te fufusu.

Sa agai atu leoleo i le nofoaga na tupu ai le fa’alavelave, ma sa faamatalaina ifo iai e le tama matua na uma loa ona pisa le ua molia, na toe fo’i loa i lona fale.  Ae na ia savali iai ma fesiligia po o le a le mea ua malomalo a ai.

Ae na savali mai i fafo ia le ua molia, ma se pate pesipolo ma palauvale mai ia te ia, ma faatonu o ia (tama matua) e alu ma lona (le ua molia) fale.

Na faapea loa ona agai atu leoleo e saili le ua molia ma ina ua taunuu leoleo i le fale o le ua molia, sa valaauina le ua molia, e sau i fafo ma le fale.  Sa faapea ona faia e le ua molia, e aunoa ma sana faamatalaga.

Sa faapea loa ona lokaina mai le ua molia, e leoleo, ma tuuina i totonu o le taavale leoleo.

Ae e le’i malaga ese atu leoleo ma le ua molia, sa alu atu se alii (o se molimau) ma fa’amatalaina i leoleo lona lagonaina o se tagata o lo’o palauvale leotele mai i le falesa LMS.  

Na ta’ua e le molimau, lo la molimauina ma lona atalii le fa’alavelave na tupu ma sa fa’ailoa atu e le molimau i leoleo, o le a malaga atu ma leoleo i le ofisa a leoleo, e faia se la faamatalaga tusitusia.

Ua mae’a ona molia Siafau i le moliaga o le Faatupu Vevesi i Nofoaga Faitele, o se vaega ‘B’ o solitulafono mama, e mafai ona nofosala ai i le ono masina, po o se sala tupe e $500; po o faasalaga uma e lua.