Valaau e se tamaitai ia leoleo ona o sana uo ua fasi e lona toalua

Pago Pago - AMERIKA SAMOA

O le aso 10 o Aukuso, 2024, na faafesootai ai e se tamaitai ia le Ofisa a Leoleo i Tafuna, e ripotia se misaaga o lo’o tupu i le va o sana uo ma lona toalua.

(O le a le lomia e le Samoa News suafa o i latou ua aafia ma molia i lenei faalavelave aua le puipuiga o fanau iti.)

E tusa ai ma faamaumauga a le malo, sa faamatalaina e le tamaitai na valaau i le Ofisa a Leoleo, le valaau atu o si ana uo ia te ia, ma faailoa atu, le sauaina o ia e lona toalua.

Ua molia nei ia lenei alii, i moliaga e fa (4), e aofia ai;

Faitauga 1:  Faatupu vevesi i totonu o le aiga, o se vaega ‘C’, o solitulafono mama, e mafai ona faafalepuipui ai, i le o’o atu i aso e sefululima (15), po o se sala tupé e $300; po o faasalaga uma e lua.

Faitauga 2-4:  Faaoolima i lona tulaga e 3, ose solitulafono e mafai ona nofosala ai i le tai tausaga ma sala tupe e ta’i $150 i le $1000, po o faasalaga uma e lua.

E $1000 sa faatulagaina e mafai ona tatalaina ai i tua, le ua molia, e faatalitali ai lona faamasinoga.

Sa ta’ua i faamaumauga a le malo, le agai atu o leoleo i le nofoaga na tupu ai le faalavelave ma talatalanoa ai ma le tina na aafia i lenei mataupu.

Ma na faamatalaina e le tina na aafia i leoleo, sa le fiafia lona toalua ina ua “message” atu se tasi o ana uo ma faatalofa atu.

Sa ta’ua e le tina le palauvale o le ua molia i lana uo, ae ina fai atu iai le tina i lona toalua, e na te le faia o se tulaga faapea i ana (le ua molia) uo, ae le fiafia ai le ua molia, ma savali mai i fafo o le potu.

Ae o le lagonaina mai e le ua molia o le pa’u o le ‘laptop’, na ia toe fo’i atu ai ma futi le ulu o lona toalua ma tatu’i lona ulu, ma titina lona ua ma palauvale.

O iina na oso atu ai le uso faaletulafono a le ua molia, ma aumai i fafo le ua molia.

Sa ta’ua foi e le tina ia lona aapa atu i lana telefoni e taumafai e valaau leoleo, ae toe oso atu lona toalua ma se’i ese le telefoni ma fai atu o le ia (le ua molia) fasiotia o ia (le tina).

Na faapea ona aapa le ua molia i se pulumu salu fale ma sasa ai le papatua ma le ulu a le fafine.

Na ta’ua e le tina, lona valaau atu i le uso a le ua molia mo se fesoasoani ae sa na o le tu o le uso ma matamata.

E le’i umi ae taunuu atu loa leoleo, ma ave faapagotaina le ua molia.

Ina ua faatalanoaina o ia e leoleo, na faamatala e le ua molia, le faia o se la taugaupu ma le ua molia ma e leai se mea na tupu.  Ae na faamaonia e le ua molia ia lona po ina o lona toalua.