Loka se tamaloa ma molia i lona taumafai e titina sona atalii fai

Pago Pago - AMERIKA SAMOA

O le 9 i le taeao o le aso 10 Aukuso, 2024, e tusa ai ma faamaumauga a le malo, na fa’afeso’ota’i ai e se tina ia le Ofisa a Leoleo i Tafuna, e lipotia ai lona to’alua, i lona taumafai e fasi lana tama.

(O le a le lomia e le Samoa News ia igoa o i latou ua a’afia ma molia i lenei mataupu, aua le puipuiga o fanau iti.)

E tusa ai ma le faamatalaga a le atalii e 12 na a’afia, ina ua fa’atalanoaina e leoleo, sa ia ta’ua ai lona ave’esea se $20 mai i le ato tupe a le tama o le aiga, e faatau ai sana aisikulimi.  

Ae ina ua fesiligia e le tama ia lona atalii e uiga i le tupe, sa pepelo le atalii ma fai atu e na te le’i tago i se tupe.  Ae peitai, na alu le tamaloa i le faleoloa ma toe fo’i mai ma u’u le ua o le atalii ma sisi i luga o le ‘ea.

Na ta’ua e le atalii lona fefe tele aua e le o se taimi muamua na faia ai le tulaga lea e lona tama.

Sa faamatalaina e le tina lona ala ifo i lea taeao ma ia va’aia le su’eina e lona toalua o lana $20 ma na la iloaina, sa ave e le la tama ae peitai, na pepelo atu lo la alo, e na te le’i avea se tupe.  

Ma o le to’atama’i tele o lona to’alua, sa ia taumafai ai e titina le atalii ma o lea na ia valaau ai i leoleo, ona o lona fefe tele i le lamatia o le soifua o si ona alo.

Sa leai foi se ‘ese’esega o le molimau a le ua molia, mai i isi molimau ae sa ta’ua foi e le ua molia, sa ia iloa lelei lava le pepelo o lona atalii fai ma o le mea lea na ia alu ai i le faleoloa i tafatafa o le latou fale, ma ia matamata ai i ata vitio sa pueina o le faleoloa, ma na ia vaai ai i lona atalii fai o faatau sana aisikulimi i le $20.

I lona ita tele, sa ia toe fo’i atu ai i le fale ma po le gutu o le atalii.  Ae peitai, na tete’e le ua molia, i le molimau a lona toalua e faapea, sa ia taumafai e titina le ua a lona atalii fai.

Ua molia ai nei lenei alii i moliaga e tolu, e aofia ai;

Faitauga 1&2: Fa’ao’olima i lona tulaga e tolu, o se vaega ‘C’ o solitulafono mama, e mafai ona nofosala ai i le to’ese, i le o’o atu i aso e sefululima (15), po o se sala tupe e $300; po o faasalaga uma e lua.

Faitauga 3:  Faia o se tulaga e ono a’afia ai le saogalemu o fanau iti – o se vaega ‘A’ o solitulafono mama, e mafai ona nofosala ai i le le sili atu ma le tausaga, po o se sala tupe e le sili atu ma le $1,000; po o faasalaga uma e lua.

E $2,000 se vaegatupe na faatulagaina e mafai ona tatalaina ai le ua molia, e faatalitali ai ona faamasinoga.