Faamasino se alii ma molia i le sauaina o sana uo tamaitai a’o si’i sana pepe

Pago Pago - AMERIKA SAMOA

O le aso 17 o Aukuso, na faafesootai ai e se tamaitai ia le Ofisa Leoleo, ma ripoti ai Lona tuagane, i le faatupu misa ma le masalomia i lona sauaina o lana uo tamaitai.

Ina ua taunuu leoleo i le nofoaga na tupu ai le faalavelave, na feiloai ai ma ni alii se toalua, o loo taumafai e faato’ato’a ia le ua molia.

Na faatalanoaina e leoleo ia le tamaitai na valaau i le ofisa a leoleo ma sa ia ta’ua le faasuaava o Lona tuagane, le susuga ia Siaki Penehuro.

Sa ta’ua e le tamaitai le lu’iina e le ua molia, o lona to’alua e la te fufusu, ae na masalomia e le tamaitai na valaau i leoleo, le mua’i sauaina e le alii o lana uo teine.

Sa faamatalaina foi e le tamaitai na valaauina leoleo, e le gata i lona toalua, ae sa faapea foi ona lu’iina e le ua molia ia ni ona tausoga se toalua.

Ma na taumafai le ‘Uncle’ o le tamaitai ina ia faafilemu le ua molia, ae peitai na le mafai, o le mea lea na ia (tamaitai) valaau ai loa i le Ofisa a Leoleo.

E tusa ai ma faamaumauga a le malo, ina ua taumafai leoleo e ave le ua molia, sa faapea mai iai le ua molia, e leai se mafuaaga e ave fua ai o ia.

Ona tago lea o le ua molia i le una’i se tasi o leoleo.

Ina ua mafai ona lokaina e leoleo ia le ua molia, sa faapea loa ona aveina atu o ia i le ofisa a leoleo.

Ae o le taimi foi lea, na o’o atu ai le uo tamaitai a le ua molia i le ofisa a leoleo, ma faila sana ripoti e faasaga i le ua molia.

Sa faamatalaina e le uo tamaitai a le ua molia, na alu atu le ua molia i totonu o lona potu ma se meaai.

Ma o iina na masalomia ai e le tamaitai le faasuaava o le ua molia, ina ua ita Ona ua na ia (tamaitai) le taumafaina le meaai sa alu atu ma ia.

Na ta’ua foi e le uo tamaitai le po ina o ia e le ua molia a’o ia si’i ina lana pepe e lua masina.  Ma Ina ua ia tuuina i lalo lana pepe, sa tago le ua molia ma titina lona ua.

Ina ua alu ese atu ia le ua molia mai i le potu, na ta’ua e le uo tamaitai lona valaau i lona Uncle e sau e avatu i la’ua ma lana pepe.

Ina ua faatalanoaina e leoleo ia le ua molia, sa ia ta’ua lona ita ina ua le ‘ai e lana uo teine le meaai sa alu atu ma ia.

Ma na ia faamaonia lona po ina ma lona taumafai e titina lana uo teine.

E le gata i lea, o lona ita ina ua ia alu i fafo ma le potu, ae fetaui ma le toalua a lona tuafafine.

E tolu moliaga o le ua molia, e aofia ai;

Faitauga 1:  Faatupu vevesi i totonu o aiga (DV); o se vaega ‘C’ o solitulafono mama, e mafai ona nofosala ai i le o’o atu i aso e sefululima po o se sala e $300; po o faasalaga uma e lua.

Faitauga 2: Faao’olima i lona tulaga e tolu, o se vaega ‘A’ o solitulafono mama, e mafai ona nofosala ai i le tasi tausaga po o se sala tupe e $1000; po o faasalaga Uma e lua.

Faitauga 3:  Tete’e I leoleo a’o taumafai e ave faapagota (DV) - O se vaega ‘A’ o solitulafono mama, e mafai ona nofosala ai i le tausaga po o se sala tupe e $1,000; po o faasalaga uma e lua.

E $1,000 se vaega tupe na faatulagaina e tatalaina ai le ua molia, e faatalitali ai lona faamasinoga.