Molia se auuso e toalua i le faiaiga ma se teineititi 15 tausaga

Pago Pago - AMERIKA SAMOA

O le aso 20 o Iulai, 2024 na fa’afeso’ota’i ai e se tina loto mafatia ia le Ofisa a Leoleo i Fagatogo, e ripotia ai le tu’ua e sona alo tamaitai e 15 tausaga le matua, ia lo latou aiga e aunoa ma se fa’atanaga ae i se taimi mulimuli ane, na va’aia ai le momoli atu e se alii, o lo’o masalomia, o lo’o fa’auo ma lenei tamaitai.

(O le a le lomia suafa o i latou o a’afia i totonu o lenei mataupu, aua le puipuiga i fanau iti.)

E tusa ai ma fa’amaumauga a le malo, o le 11:20 i le po na fa’afeso’ota’i ai e le tina ia le ofisa a leoleo e tusa ai ma le alu ese atu o lona alo tamaitai mai i le latou fale.  Ae i le lima minute na soso’o ai, na toe fa’afeso’ota’i ai e le tina ia le ofisa a leoleo ma ripotia le momoli ina mai o lona alo, e se tasi o alii ua molia.

Ina ua aga’i atu leoleo i le fale o le tina na valaau mai i le ofisa a leoleo, sa faamatalaina ifo iai e le tina, le faia o se faigauo a lona alo ma se alii sa nofo muamua i le latou aiga.

Na aveina e leoleo ia le tamaitai 15 tausaga ma le tina i le ofisa a leoleo i Tafuna mo le fa’aauauina o a latou su’esu’ega.

Ma o lo’o ta’ua i totonu o fa’amaumauga a le malo e faapea, o le ua molia, sa nofo i le aiga o lenei tina ma sa fa’auo ma le uso matua o le tamaitai 15 tausaga.  Ae peitai, na tulieseina o ia mai i le aiga, ina ua maua le la faigauo ma le tamaitai 15 tausaga.

Sa faamatalaina e le tamaitai i leoleo, na amata ona o la faiaiga ma le ua molia (alii #1), talu mai le masina o Setema o le tausaga ua tuanai seia o’o mai lava i le po o le aso 19 o Iulai.

Ae sa le gata i lea, na faamatalaina foi e lenei tamaitai i leoleo, lo la faiaiga foi ma le uso (alii #2) o lana uo tama po o le alii ua molia.  Ma o lea tulaga, na amata mai ia Aukuso 2023.

O le aso 22 o Iulai na fa’afeso’ota’i ai e leoleo ia le alii #2 ma sa su’esu’eina o ia i le ofisa a leoleo i Tafuna, lea na ia faamaonia ai lo la faiaiga ma le tamaitai ma sa ia ta’ua e faapea, o se tulaga na malilie uma iai i la’ua.

E tusa ai ma le faamatalaga a le alii #2, o le masina o Aukuso 2023 na la o ai ma le tamaitai i le fale o sana uo ma la tafafao ai, ma o la faia ai gaioiga faaleulugalii.  Ma sa amata mai i le amasina se’ia o’o mai ia Novema 2023 le la faigauo.

O le vaveao o le aso 23 o Iulai, na feso’ota’i ai leoleo ma le alii #1 ma sa fa’atalanoaina foi o ia i le ofisa a leoleo i Tafuna.

Na fa’amaonia e le alii #1 le faia foi o sa la’ua faigauo ma le tamaitai ma o se tulaga foi na o la malilie uma ai.  Ma sa ta’ua e le alii #1, le amataina mai o le la faigauo ia Setema 2023, seia o’o mai lava ia Iulai 2024.

Sa faamatalaina foi e le alii #1i leoleo, nofoaga uma sa faapea ona o la faiaiga ai ma le tamaitai.  E le gata i lea, o taimi na sola ese ai le tamaitai mai lona aiga, ae sau o la momoe i lona fale.

Ua molia nei le alii #1 i moliaga e lima, e aofia ai faitauga e 1, 3 ma le 4, o le Faamalosi Tamaitai (sauaga i totonu o aiga) faapea ma le faitauga lona lua, o le faia o uiga faaSotoma, o ni moliaga i le vaega ‘B’ o solitulafono mama, e mafai ona faafalepuipui ai i le va o le lima ma le sefululima tausaga, po o se sala tupe e le i lalo ifo ma le $150; po o faasalaga uma e lua.

Faapea ma le faitauga e 5, o le faia o ni tulaga e ono a’afia ai le saogalemu o fanau iti (sauaga i totonu o aiga), o se vaega ‘A’ o solitulafono mama, e mafai ona fa’afalepuipui ai i le le silia ma le tausaga, po o se sala tupe e $1,000; po o faasalaga uma e lua.

E $20,000 se vaegatupe na faatulagaina, e mafai ona tatalaina ai le ua molia, e faatalitali ai lona faamasinoga.

O moliaga o le alii #2, e aofia ai;

Faitauga 1:  Faamalosi tamaitai (sauaga i totonu o aiga), o se vaega ‘B’ o solitulafono mamafa, e mafai ona faafalepuipui ai i le va o le lima le sefululima tausaga, po o se sala tupe e le silia ma le $150; po o faasalaga uma e lua.

Faitauga 2:  Faia o ni tulaga e ono a’afia ai le saogalemu o fanau iti (sauaga i totonu o aiga), o se vaega ‘A’ o solitulafono mama, e mafai ona nofosala ai i le le sili atu ma le tausaga, po o se sala tupe e $1,000; po o faasalaga uma e lua.

E $1,000 se vaegatupe na fa’atulaga mo le tatalaina i tua o le ua molia, e faatali ai lona faamasinoga.