E FAI O LENEI AE O LENA

O PERENISE E TO’ATOLU

I aso a la ua leva, i le Penisula a Arapi, sa femalaga’i solo ai tagata fa’atau oloa e fefa’atauai ma isi tagata.  Ma o so’o se a’ai lava e malolo ai nei tagata fa’atauoloa, e masani lava ona ola ma tuputupu lea nuu.

Ma sa iai se nu’u faapena sa pulea e se tupu ma se masiofo.  Ma sa iai se la tama teine, po o se purinisese, ua o’o i le tausaga, ua tatau ai ona faaipoipo.

Na o mai ni Perenise se to’atolu mai i se malo latalata ane, e taumafai e faaipoipo atu i le Purinisese.  Ae peitai, sa le fia mana’o ai le Purinisese.

O le tasi o nei perenise, o se alii e fiafia tele e fa’atonutonu tagata, e fai ana galuega.  O leisi perenise, o se alii ua ova le le tumama.  Ma le lona tolu, ua matua’i ova le faamaualuga.

“Faamolemole tama, ou te le fia faaipoipo atu i nei perenise,” o le tagi tautalatala lea a le Purinisese i le Tupu.

Na alofa tele le Tupu i si ona afafine, ae peitai, sa le’i mana’o e faia se tulaga e le fiafia ai Perenise nei e to’atolu, o le mea lea na ia fa’atonuina ai ia Perenise nei e to’atolu, ina ia toe fo’i atu i le aso e soso’o ai.

Ua malama le taeao e soso’o ai, ona toe fo’i atu lea o nei Perenise, ona faapea ane lea iai o le tupu, “Ua agava’a uma outou e avea ma to’alua mo si o’u afafine, le Purinisese.  Ae ina ia faia se filifiliga tonu ma le sa’o, o lea e tatau ai ona outou o atu, i le tausaga ma le aso e tasi, e saili mai le mea pito sili ona maoa’e.  Ona e mafai lea ona faaipoipo atu i le Purinisese.”

Ua fa’aalia le fiafia o le Purinisese, ona o lea ua tu’uina atu e le tupu i Perenise, le tausaga atoa e o ai e su’e mai le mea o mana’o ai.  

Ma sa manatu foi le tupu, e leiloa po o le a le mea e tupu i le tausaga atoa.

Ua faapea loa ona o atu ia Perenise e saili mai le mea o lo’o mana’o ai.  Ua atoa le vaiaso o alu le faigamalaga a nei Perenise, ona tau atu lea i se vai’eli i tafatafa o le maga o le auala.

Ua faapea mai le Perenise muamua lea ua ova le fia faatonutonu tagata, “Ia atonu o i’inei e tatau ona alu ai lava le tagata ia.”

Ua faapea atu le perenise lona lua, “Ioe ua lelei lena tonu.”

Ae oso mai le perenise lona tolu, “E tatau ona tatou toe fetaui uma mai i’inei i le tasi le vaiaso ae e le’i o’o i le aso e tatou te toe fo’i atu ai i le tupu.”

Ua fai loa le tonu a le aualii lenei, o le a alu lava le tagata i le auala o lo’o fa’asaga iai.  Ae a latalata loa i le aso atofaina e tatau ona toe fo’i atu ai i le tupu, e tatau ona fetaui i le magaala lava lea e tasi, ona o fa’atasi ai lea i le maota o le tupu.

Ua atoa le tausaga ma ua toe o le vaiaso ona o’o lea i le aso fa’atulagaina e toe fo’i atu ai Perenise nei ma a latou meaalofa mo le purinisese.

Ma e pei ona sa o latou tu’utala, ua faapea ona o latou taunu’u uma i le magaala lea na mavaevae ai.

Ina ua mae’a ona feiloai i latou, sa fesili atu loa leisi to’alua i le perenise lea e fiafia e fa’atonutonu tagata, po o le a lana meaalofa na maua mai.

Ua fa’aali ifo iai e le perenise muamua ia se polo e mafai ona iloa ai mea o tutupu i so’o se vaega o le lalolagi.

Ona faapea mai lea o le perenise muamua i leisi to’alua, “Aea oulua?”

Ua tago ifo le perenise lona lua, le alii lea e le tumama, ma toso mai fafo ia se kapeta maneta.  O lenei kapenta, e mafai ona feavea’iina so’o se tagata, i so’o se nofoaga o le lalolagi e mana’o ai.

Ona faapea mai loa lea o le perenise lona tolu, le alii fa’amaualuga, “Ou te iloa, o le a piki nei e le tupu la’u meaalofa.”  Ma ia tu’uina mai se vailaau. “O lenei vailaau e mafai ona toe fa’afo’isia ai le malosi i so’o se tasi.  Ma e mafai foi ona toe fa’afo’isia ai le tino talavou o se tagata matua.”

[IA MANUIA TOE FUAFUAGA O LENEI VAIASO]