Fa’aaoga Vaegatupe Lautele a le malo e toe tului ai le silia ma le $100,000 e aunoa ma se fa’atagana mai i le Fono Faitulafono

Pago Pago - AMERIKA SAMOA

I le iloiloga a le Komiti Su’esu’e Filifilia a le Senate (SSIC) lea sa faataunu’uina i le aso Lulu na se’i mavae atu nei, sa molimauina ai e le aufaigaluega a le Ofisa o Tupe, le fa’aaogaina o se vaegatupe e silia ma le $100,000 mai i le Vaegatupe Lautele (General Fund) a le malo, e toe tului ai le tupe lea sa le’i maua mai a le LBJ, mai i le $4.4 miliona lea na ave’eseina mai i le teugatupe a le malo, ae ua ave teu i le faletupe a le Wells Fargo, i le tausaga ua tuanai.

Na faamanino e le tamaitai o Akenese, mai i le Ofisa o Tupe a le malo, ina ua fesiligia e le Taitaifono a le SSIC, le afioga i le Senatoa ia Togiola T.A. Tulafono, o le aofaiga atoa lea na ave’ese atu mai i le teugatupe a le malo mai i le TBAS, e $4,474,207.90, lea na ave tu’u i totonu o se teugatupe i le faletupe a le Wells Fargo, ona o se fa’atonuga, lea na fa’amaonia mulimuli ane, o se faatonuga le moni.

O lea tupe, sa to mai i totonu o le $3.3 miliona o tupe toe totogi mai (reimbursement) a le Medicaid, faatasi ai ma le silia ma le $957,000 o tupe totogi mai (reimbursement) mai i le FEMA, mo le falemai a le LBJ.

Sa molimau foi Akenese, mai i le $4.4 miliona, o lea ua mae’a ona toe fa’afo’i mai e le Wells Fargo ia le $4,373,997.02, ae totoe ai le paleni, e silia ma le $100,000.

Ina ua fesiligia le molimau, po o le a le mea ua o’o iai lea $100,000, sa tali le tamaitai o Akenese, o lo’o i lalo o le pule’aga a le FBI.

Sa fesiligia e Togiola ia le molimau, po o le a le uiga o lea faamatalaga e uiga i le FBI.

Na saunoa ia le tamaitai o Carri-Lee Magalei, o ia lea o le ‘Accountant’ sinia a le Ofisa o Tupe, ma ia faapea mai, ua mafai ona o latou toe mauaina mai se vaega tele o le tupe, seia vagana ai le $100,000 ae ina ua o latou fa’afeso’ota’i ina ia le TBA, lea sa o latou fa’afeso’ota’i ina ia le Wells Fargo, sa le’i manino mai se tali mai i le Wells Fargo, i le mafua’aga ua le toe fa’afo’i mai ai lea tupe.  

O le mafua’aga lea, na o latou a’apa atu loa i le FBI ina ia sailiili le mafuaaga o lea tulaga.

Sa ta’ua foi e Magalei, o le latou feso’ota’iga mulimuli lava ma le FBI, o le vaiaso ua tuanai ma na faailoa mai e le FBI, o lo’o fa’aauau pea a latou su’esu’ega.

Na fa’aalia e Magalei, i le lua vaiaso talu ona tupu le fa’alavelave, na mafai ona toe fa’afo’i mai le $957,192.75.  Mulimuli ane, ia Tesema 2023, na toe maua mai ai le $3.4 miliona, ae e le i maua mai lava le $100,220.

Na saunoa Togiola, e tusa ai ma molimau a taitai sinia o le LBJ, ua mae’a ona maua uma le $4,474,207.

Ae peitai, sa tali Magalei, sa o latou totogia le aofaiga atoa lea, ae e latou te le’i maua mai le aofaiga atoa lea mai i le Wells Fargo.

O lea na fesiligia ai loa e Togiola, po o fea na maua mai ai le $100,000 lea na toe tului ai le tupe a le LBJ.

Sa fa’amalamalama mai e Magalei, na o latou fa’aaogaina le tupe mai i le ‘General Fund’ a le malo, e totogi atoa ai le tupe a le LBJ.

Na faapea loa ona fesiligia e Togiola ia molimau, pe na faapefea ona o latou fa’aaogaina tupe mai i le ‘General Fund’ e aunoa ma se iloiloga a le Fono e fa’asoasoa ai lea tupe.

Sa tali mai le Tausitupe a le malo, le susuga ia Malemo Tausaga, ma ia fa’amaonia lo latou fa’aaogaina o se vaegatupe mai i le ‘General Fund’ e aunoa ma se iloiloga a le Fono e fa’asoasoa ai lea tupe. 

Sa faapea ona fa’aleoina e Togiola sona atugaluga i le le mulimulitai po o le solia e le faigamalo o tulafono faavae o lo’o mulimulita’i ai le ofisa o tupe a le malo, talu ai le le malamalama o le aufaigaluega ua tu’uina atu iai le faatuatuaga e mataituina tupe a le malo.

Na ta’ua e Togiola le iai o tulafono ua mae’a ona fa’atulagaina e taitaia ai le faatinoina o lenei galuega.  Ae peitai, ua talitonu le ofisa o tupe i le imeli na avatu e faatonuina ai le ave o se aofaiga tele o tupe a le malo, e aunoa ma le fa’amaonia pe moni lea fa’atonuga.

Sa fa’amaonia e Magalei le pa’u o lea tulaga ia i latou ma le tele o lenei faafitauli.  Ae sa ia fa’ailoa mai i afioga i Senatoa, talu mai le tupu o lenei fa’alavelave, ua mae’a fa’atulagaina ni suiga i auala e faatino ai la latou galuega, e puipuia ai le toe tupu o lenei fa’afitauli.