O OE O LO’U TAMA?

VAEGA 117

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

***********************************************************

Sa gata le tatou Fagogo i le vaiaso ua mavae, ina ua ta’ape le talatalanoaga a le aiga o Alesana ma Eseta ma le la fanau o Ruta, Iakopo ma Naomi ma le alii fomai o Taki, mo le faia o se malologa i lea afiafi, ae faapea atu ia Ruta i lona uso laititi o Naomi, “Sau ta o ta talanoa.”

Ua agai atu nei le to’alua lea i lo la potu moe ma ua tapuni mai e Ruta le faitotoa o le potu ma faapea atu ia Naomi, “Na ou alu i le ofisa a Salome ananei.”

(O Salome, o le uo teine lea a le tuagane o le au tamaitai lea).

Ua tu Naomi ma pupula to’a mai i lona uso matua.

Ae ua saofa’i ifo ia Ruta i luga o le moega ma ata leotele ma faapea, “Oka suga Naomi, a e va’ai iai i le tatagi o le tootuli a Salome i totonu o lona ofisa.  Ua ou toe alofa atu iai,” o le tala ata lea a Ruta.

“Ae a ou mafaufau atu i le tele o tausaga na e tigaina ai i le taimi na tou a’o’oga ai,” o le faamatalaga lea a Ruta.

“O le a le mea e te toe popole ai i na mea ua tuanai,” o le tali mai lea a Naomi. 

“E leai, matua’i leaga tele lana mea sa fai.  Vaai ia oe ma lou pae’e lena ua e iai talu ai lava ou mafatiaga a’o e talavou,” o le toe oso mai lea a Ruta.

“Ae ou te alofa i si o ta tuagane,” o le tala lea a Naomi.

“E sa’o lelei oe.  O le a matua’i pe lona fatu pe ona iloa le mea a lana manamea sa fai ia oe,” o le toe faaopoopo atu lea a Ruta.  “Na ou va’aia lava lona loto fa’anoanoa ananei a’o fai le tatou talanoaga.  Ou te iloa, o le la e lafi mai ai ia Salome, aua ua uma ona ou fai ia Salome e na te tago e ta’u le mea sa tupu ia Iakopo. “

“E le mafai ona tatou mafuta faapea ae o lo’o nofo pogisa Iakopo i lenei mea,” o le toe faapea mai lea a Ruta.

“Ua ou popole lava ia Iakopo.  O lea ua leva ona te’a lenei mea ma o lea ua ou okay mai ai.  Ae po o le a se taga a Iakopo pe a ona iloaina.  Aua e leai lava se mea e lilo i lalo o le la,” o le tala popole lea a Naomi.

“Ia tu’u ia na mea se’i toe o’o taeao, ae sau loa e fai sau malologa, o taeao foi e toe usu e faigaluega,” o le faapea atu lea a Ruta i si ona uso laititi.

[E FAIA PEA]