Su’esu’e e le SSIC ia le $4.4 miliona lea na ave’ese mai i le teugatatupe a le malo i le tausaga ua tuanai

Pago Pago - AMERIKA SAMOA

Na auai atu le Tausitupe a le malo, le susuga ia Malemo Tausaga ma nisi o lana aufaigaluega mai i le Ofisa o Tupe, i se iloiloga a le Komiti Su’esu’e Filifilia a le Senate (SSIC), lea na fa’ataunu’uina i le aso Faraile o le vaiaso ua tuanai, ina ia fa’asusulu se malamalama i le tulaga ua o’o iai su’esu’ega sa faia, i le $4.4 miliona lea na ave’esea mai i le tusitupe a le malo a Amerika Samoa, ae teuina i totonu o le faletupe a le Wells Fargo, i le tausaga ua mavae.

Sa o latou taua’aoina atu se ripoti auiliili, na aofia ai faamaumauga taua, kopi o siaki, imeli ma tusi feavea’i ma le falemai a le LBJ faapea ma fa’amaumauga o le aveina atu o tupe i le Wells Fargo.

E pei ona sa ripotia e le Samoa News i se vaitaimi ua mavae, na molimau Malemo i le tausaga ua mavae, le o’o atu o se faatonuga i lo latou ofisa mai i le LBJ ina ia aveina se vaegatupe a le LBJ, e teuina i le faletupe a le Wells Fargo.  Ma sa faapena ona fai.  

Sa fa’amaonia foi e Malemo le tusia o le faatonuga i luga o se pepa o iai le fa’ailo a le LBJ faatasi ai ma saini a sui o le komiti faavae a le LBJ.

Ae peitai, o se taimi mulimuli ane ai, sa nofo malamalama ai le Tausitupe, le le moni ma le faamaoni o lea tusi sa o latou maua ma e le o se tusi na alu atu mai i le LBJ.

I le iloiloga mulimuli a le Senate, ae le’i malolo mo le fa vaiaso, sa pasia ai e le Senate ia se I’ugafono e fa’atonuina ai le SSIC ina ia iloiloina lenei mataupu ma fa’amautu ni puipuiga ina ia le toe tupu lenei faalavelave, i le lumanai.

O lo’o ta’ua i totonu o le I’ugafono le silia ma le tausaga talu ona fa’ailoa mai e Malemo lenei mea sa tupu, i le Senate ae e le’i toe iai seisi fa’amatalaga i le tulaga ua o’o iai lenei mataupu.  Ma o le mafua’aga lea ona faapopoleina afioga Senatoa, ona o tupe feterale ia o le a le toe maua mai, pe afai ae le su’esu’eina.

Ua ta’ua i totonu o le I’ugafono le alagatatau ona fa’ao’oina atu e le Tausitupe i Senatoa se faamatalaga lata mai e tusa ai ma lenei faalavelave.

Ae e le’i amataina le iloiloga i le aso Faraile, sa fa’amanino mai e le Taitaifono a le SSIC, le afioga Senatoa Togiola T.A. Tulafono, le mafua’aga o lenei iloiloga.

Na saunoa Togiola, e le o manao le malo ina ia toe tupu lenei tulaga.  Ma o le taimi nei, o lo’o tele lava ni manatu le mautonu.  Aua e le o manino po o le a tonu le mea sa tupu, o ai na aafia ma pe na fa’apefea ona tupu lenei faalavelave. 

Ae e tasi le tulaga o lo’o mautinoa, e manaomia ona su’esu’eina lenei mataupu ma fa’atulagaina ni pa puipui ina ia le toe tupu se tulaga faapenei i le lumanai.

Faatasi ai ma Malemo, sa faapea foi ona auai atu le sui Tausitupe ia Levi Reese, o Carrie-Lee Magalei (Chief Accountant) faapea ma se tamaitai e suafa ia Akenese (ae e le’i manino mai lona suafa atoa).

Na saunoa Malemo, e tupu lenei faalavelave, ae o lo’o iai o ia i atunu’u i fafo, ae o Reese sa avea ma pule o le ofisa i lena vaitaimi.

Ina ua fesiligia e Togiola ia Malemo pe sa faia se su’esu’ega a lona ofisa i lenei mataupu, sa tali mai Malemo, ioe.  Ae peitai, ina ua toe fesiligia o ia pe sa iai se ripoti o lenei suesuega, sa tali le Tausitupe, e leai.

Na saunoa Magalei, o i la’ua ma lana aufaigaluega na muamua nofo malamalama e tusa ai ma lenei faalavelave ma faapea ona logoina loa le sui Tausitupe.

Sa ta’ua e Togiola, o lo’o manaomia e le latou komiti se taimi e mafai ona Iloilo ai ripoti mai i le Ofisa o Tupe ma o le taeao nei ua fuafua e toe fa’aauau ai lenei  suesuega.

I nisi o iloiloga ua mavae, sa ripotia mai ai e le Tausitupe le ave’esea o se vaegatupe e $4,474,207.09 mai i le teugatupe a le malo ma aveina atu ma teu i se tusitupe a le Wells Fargo.

Ma e o’o mai i le aso, e $4,373,997.02 ua mae’a ona toe fa’afo’i mai, ae totoe ai le paleni e $100,210.07.

Sa molimau foi le Tausitupe, o lo’o latou galulue faatasi ma sui o le FBI ina ia toe maua mai le paleni o totoe.