Molia ni tamaitai se to’alua i le fa’ao’olima i se fusuaga na tupu i le pakaga a se fale kalapu i Tafuna

Pago Pago - AMERIKA SAMOA

E tusa ai ma fa’amaumauga a le malo, ua molia nei ia Frieda Fonoti Alexia Young, i le fa’ao’olima, ina ua manu’a seisi ia i la’ua, i se latou fusuaga  sa faia i le pakaga ta’avale a le falekalapu o le Flame’s, i Tafuna, i le vaveao o le aso 10 o Aukuso, 2024.

O moliaga a Fonoti, e aofia ai;

Faitauga 1 & 2 – Fa’ao’olima i lona tulaga e lua – o se vaega ‘D’ o solitulafono mamafa, e mafai ona faafalepuipui ai i le le silia ma le lima tausaga, po o se sala tupe e le silia ma le $5,000; po o faasalaga uma e lua.

Faitauga 3 – Fa’ao’olima i lona tulaga e tolu – o se vaega ‘A’ o solitulafono mama, e mafai ona fa’afalepuipui ai i le le silia ma le 12 masina, po o se sala tupe e le silia ma le $1,000; po o faasalaga uma e lua.

Faitauga 4 – Faatupu Vevesi i Nofoaga Faitele – o se vaega ‘B’ o solitulafono mama, e mafai ona fa’afalepuipui ai i le le silia ma le ono masina, po o se sala tupe e $500; po o faasalaga uma e lua.

 E $10,000 se vaegatupe na faatulagaina e tatalaina ai i tua Fonoti, e faatalitali ai lona faamasinoga.

Ae mo Young, e lua ona moliaga;

Faitauga 1 – Faatupu Faalavelave i Nofoaga Faitele – o se vaega ‘B’ o solitulafono mama, e mafai ona nofosala ai i le le sili atu ma le ono masina, po o se sala tupe e $500; po o faasalaga uma e lua.

Faitauga 2 – Fa’ao’olima i lona tulaga e tolu – o se vaega ‘A’ o solitulafono mama, e mafai ona faafalepuipui ai i le le sili atu ma le 12 masina, po o se sala tupe e le silia ma le $1,000 po o faasalaga uma e lua.

E $1,000 se vaegatupe sa faatulagaina e tatalaina ai Young mai i le falepuipui, e faatalitali ai lona faamasinoga.

E tusa ai ma fa’amaumauga a le malo, sa mauaina e le Ofisa a Leoleo i Tafuna se valaau mai i se tagata i le vaveao o le aso 10 o Aukuso, e tusa ai ma se fa’alavelave ua fa’amanu’alia ai se tagata, i se naifi.

Na aga’i atu leoleo i le nofoaga na tupu ai le faalavelave, i le pakaga taavale a le fale kalapu a le Flame’s ma amataina a latou su’esu’ega.

E tusa ai ma se faamatalaga a le molimau #1, o sana uo sa osofa’ia e le tamaitai o Freida Fonoti.  Ma o le taimi lea, sa ‘e’e mai ai le ua molia ma taumafai e oso mai e fufusu ma le molimau #1 ma ana uo.  Sa faapea loa ona lokaina o ia e leoleo ma tu’uina i totonu o le taavale a leoleo.

Sa faapea foi ona fa’atopetopeina atu e leoleo ia se tasi o leoleo po o le falekalapu i lo latou ofisa, ina ia mafai ona fesoasoani mai le vaega a le EMS, ona o le tuga o lona manu’a i lona lima tauagavale.

Na faapea foi ona fautuaina e leoleo ia molimau uma sa iai, ina ia o latou aga’i atu i le Ofisa Leoleo i Tafuna mo le fa’aauauina o su’esu’ega i lenei mataupu.

Sa ta’ua foi i totonu o fa’amaumauga a leoleo le kikiina e Fonoti o le fatafata o se tasi o leoleo a’o taumafai le leoleo e fa’amau lana moli uila.

Ina ua fa’atalanoaina e leoleo isi molimau i le Ofisa a Leoleo, sa faamatalaina e le molimau #2 le amata mai o lenei faalavelave i totonu o le falekalapu, ina ua alu atu Fonoti i le latou laulau ma po le gutu o se tasi o tamaitai sa i le laulau.

Ma o iina na ave ai loa i fafo ia Fonoti.  Ae  peitai, ina ua tapuni le falekalapu ma ua aga’i mai i latou (molimau) i le latou taavale, sa alu atu Fonoti ma tu i tua o le taavale ma amata ona palauvale atu ia i latou ma taofi le sau i fafo o le latou taavale.

Na faamatala e le molimau lona lua, le latou toe feosofi mai i fafo ma le latou taavale e taumafai e fa’ato’ato’a le mataupu.  Ae peitai, sa o latou va’aia le u’uina e Fonoti ma ana uo ia ni atigi fagu, ma o le mafua’aga lea na le’i fia latalata atu ai ia i latou.

O le taimi lea, e pei ona ta’ua e le ‘au molimau, sa oso atu ai se tasi o alii e taofiofi le ‘au molimau mai i le latalata mai ia Fonoti ma ana uo.  Ae oso atu Young (lea o lo’o molia faatasi ma Fonoti) i le tatu’i foliga o le molimau #3, lea na a’afia.

Sa faapea loa ona oso mai Molimau #2 ma taofiofi ia Molimau #3 ma Young, ae fa’alogoina ai e Molimau #2 se maini i lona lima taumatau, ina ua lavea, ma o le mafua’aga lea na toe so so ai i tua.

Na faamatalaina foi e le molimau #1 (le leoleo po) lona ave’esea o se tamaitai mai i totonu o le falekalapu, ma o le tagata lava lea e tasi, na amataina le fusuaga i luma tonu lava o le fale’aiga a le Oasis.  Ae o le taimi lea ua tapunia ai le falekalapu.

Na ta’ua e le molimau #1, ina ua ia oso atu e vaovao le misi, na tui o ia e Fonoti i se atigi fagu ma o le mafua’aga lea na ia toe alu ese ai ma valaau loa leoleo.

I se faamatalaga a seisi molimau, sa ia ta’ua ai lona molimauina o le faalavelave na tupu i totonu o le falekalapu, ae peitai ona sa fofoina e leoleo po o le fale kalapu, sa le’i manatu iai.  Ae tapunia le falekalapu ma o latou agai mai i le latou taavale, o iina na o latou va’aia ai Fonoti, o lo’o taumafai e poloka le latou taavale, a’o latou taumafai e solomuli mai i fafo ma le pakaga.

Ma sa faamatalaina foi e lenei molimau le taofiofi gata o Fonoti i lea afiafi ma lona taumafai e osofa’i i latou i se atigi fagu.  Ae o le taimi lena, na ‘e’e ma palauvale mai ai Young ma tu’i se tasi o a latou uo.  Ina ua atili ona vevesi le faalavelave, sa oso mai loa se leoleo po ma taumafai e vaovao le misa.

Na iai foi seisi molimau sa na molimauina lava le tulaga e tasi ona ua le fiafia Fonoti ina ua va’ai mai o atu se alii sa la fa’auo muamua, ma seisi tamaitai.

Ina ua suesueina e leoleo ia Fonoti, sa ia faamatalaina lona to’atama’i ina ua va’aia se tasi o alii na la fa’auo muamua ma seisi tamaitai.  Ma na ia alu atu i le uo teine fou a le alii sa la fa’auo muamua, ma fai iai e la te o i fafo e la te fufusu.

Ma ina ua suesueina e leoleo ia Fonoti e tusa ai ma le faalavelave na tupu i fafo o le falekalapu, sa tali Fonoti e na te le iloa se mea na tupu.

E lua ni molimau tusia sa fa’amaumauina e leoleo e tusa ai ma lenei mataupu.  O le tasi e mo Fonoti ae o leisi e mo Young.