Lipotia e se fafine le sauaina o ia e se tamaloa ma fa’afefe lona aiga i se la’au malosi

Pago Pago - AMERIKA SAMOA

E tusa ai ma fa’amaumauga a le malo, o le afiafi o le aso 3 o Aukuso, na valaau atu ai se fafine i le Ofisa a Leoleo i Tafuna e tusa ai ma le fa’ao’olima o se tamaloa ia te ia, faapea ai ma lona (tamaloa) fa’afefeina o lona aiga i se fana.

Sa agai atu leoleo i le fale o le tina ma sa faamatalaina e lenei tina i leoleo e faapea, sa faia se galuega a ia ma lana fanau i le faamamaina o tuafale o le latou fale, ae alu atu ia le susuga ia Manulele Salaivao ma ‘e’e ma palauvale atu ia te ia.

Na ta’ua foi e le tina ia le taina o ia e le ua molia, i se lala teuila ma na tosoina mai foi i fafo e Salaivao, o se la’au malosi, mai i sana ato ma ta’i sa’o atu lava ia te ia, a’o iai lona to’alua ma le la fanau.

Ina ua mae’a ona talanoa le fafine ma leoleo, sa fa’atonuina o ia e leoleo e faasino atu le fale o le ua molia.

Na faapea ona agai atu iai leoleo i le fale a Salaivao ma na fesiligia o ia e leoleo e tusa ai ma le la’au malosi.  Sa faapea loa ona ave faapagotaina e leoleo ia le ua molia, i le Ofisa a Leoleo i Tafuna mo le fa’aauauina o a latou suesuega.

Sa toe fo’i atu foi leoleo i le fale o le tina sa aafia, mo le fa’atalanoaina o molimau po o i latou na iai i le taimi na tupu ai le fa’alave.

O le molimau muamua, o le to’alua lea a le fafine na a’afia ma sa ia ta’ua e faapea, sa iai o ia i le fa’ato’aga lea ua faaleagaina, ae na fa’ate’ia o ia ina ua ia va’aia le ua molia, o ta’i se fana agai i lona to’alua.  Sa faapea foi ona faapea atu le ua molia, o le a ia fanaina uma i latou.

O molimau lona lua ma le lona tolu, o le fanau lea a le tina na a’afia ma e tusa ai ma le faamatalaga a le alii e 15 tausaga le matua, sa ia va’aia le sau o Salaivao ma sasa i lalo fa’i mai i le fa’ato’aga a lona tama.  Ma na ia va’aia foi le tauina mai e le ua molia, o ni lala teuila, ma sasa ai lona tina.  Ona se’i mai lea e le ua molia, se fana ma ta’i agai i lona tina ma lana faamatalaga, o le a ia tafanaina uma i latou.

E faapena foi le molimau a le alii 17 tausaga ma sa ia ta’ua foi se faamatalaga a Salaivao i lona tina, e leai ni o latou fanua.

Ina ua su’esu’eina e leoleo ia le ua molia, sa ia te’ena ia molimau e faapea, sa ia fa’alalaina se fana i le tina na a’afia.  Ma e na te le’i taina foi le tina i se lala teuila.

E 67 tausaga o le soifua o le ua molia, ma e tolu ni moliaga ua fa’asaga ia te ia, e aofia ai:

Faitauga 1:  Faatupu Vevesi i Nofoaga Faitele o se vaega ‘B’ o solitulafono mama, e mafai ona nofosala ai i le falepuipui, i le o’o atu i le ono masina, po o se sala tupe e $500; po o faasalaga uma e lua.

Faitauga 2:  Fa’ao’olima i lona tulaga e tolu, o se vaega ‘C’ o solitulafono mama, e mafai ona fa’asala ai i aso e sefululima i le falepuipui, po o se sala tupe e $300; po o faasalaga uma e lua.

Faitauga 3:  o le Fa’ao’olima i lona tulaga e tolu – o se vaega ‘A’ o solitulafono mama, e mafai ona faafalepuipui ai i le o’o atu i le tausaga, po o se sala tupe e $1,000; po o faasalaga uma e lua.

E $500 se vaegatupe sa faatulagaina e tatalaina ai le ua molia, mai i le falepuipui, e faatali ai lona faamasinoga.