Mu ma magoto se va’a o le Fuava’a a Niu Sila i gatai o Siumu, Samoa

Apia - SAMOA

O lo’o nofo mataala ma tapenapena ia ofisa o le malo faapea ma ofisa o le siosiomaga, i Samoa, talu mai le po o le aso Toonai (vaveao o le aso Sa) na se’i mavae atu nei, ina ua taia se va’a su’esu’e a le malo o Niu Sila, i le amu o le a’au i gatai o le afioaga o Siumu, i le itu i Saute o le motu o Upolu, i Samoa ma mu ai, ma i’u ai ina magoto.

E to’a fitusefulu ma le lima (75) seila sa i luga o le va’a – HMNZS Manawanui – na i luga o le va’a i le taimi sa tupu ai le fa’alavelave.

Ae na mafai ona fa’asaoina uma i latou, ona o le vave o le gaioi a le Matagaluega Tinei Mu a Samoa, faapea ma le to’atele na mafai ona fesoasoani.  

E tusa ai ma se ripoti a le vaega fa’asalalau a le RNZ, na saunoa le Komesina a le Matagaluega Tinei Mu, le afioga Tanuvasa Petone, na mu ma magoto le va’a ae ua mae’a lena ona lavea’i uma mai le auva’a. 

Sa ta’ua e Tanuvasa, e to’alaiti i latou na iai ni nai ma’osia ae peitai, sa mafai ona togafitia uma i latou ma aveina atu i le falemai mo nisi suesuega.

Na fa’aalia foi e Tanuvasa le tulaga na iai le sami i lena po, o le sou o le sami ma le malosi o le savili.

Sa faamatalaina e se alii Samoa sa molimauina le taimi tonu na tupu ai le faalavelave, i le RNZ, e na te le o malamalama pe aisea na o’o mai ai le va’a i le a’au.  Sa ta’ua e le susuga ia Manu, le latalata tele o le va’a i le a’au, ma e tusa lava po o faia ni a latou su’esu’ega fa’asaienitisi, ae sa le tatau ona latalata i le a’au ona e le gata i le sou o le sami, ae o le maualuga o le fati o galu.

Na fa’aalia foi e Manu le tele o se atugaluga i le masa’a o le suauu o le va’a ina ua pa ma magoto, ona o se a’afiaga i le a’au.

 I se ripoti mai i le laumua o le Fuava’a i Devonport, sa fa’aalia e le Minisita o le Militeri, ia Judith Collins, le avea o lenei fa’alavelave ua tupu ma se tulaga fa’anoanoa tele mo la latou Fuava’a.

Ma na ia ta’ua foi le iai o se fuafuaga mo le faavaeina o se Faamasinoga o Su’esu’ega, e sailiili ai le mafua’aga o lenei faalavelave.  Sa fa’aalia e Collins le faamuamua ona faaitiitia o a’afiaga o le siosiomaga ma le fa’asaoina o se vaega o le HMNZS Manawanui, pe a mafai.

Na saunoa foi Collins, ua mae’a ona nofo malamalama le susuga i le Palemia ia Christopher Luxon, e tusa ai ma lenei faalavelave.

O se ripoti mai i le ta’ita’i’au a le Fuava’a, ia Rear Admiral Garin Goldin, e to’alua nisi o le auva’a sa taofia i le falemai ae o leisi to’atele ua na’o ni nai manu’a mitimiti ma tino tiga.

Sa ta’ua e le so’oupu a le Militeri, ia Peeni Henari le agaga faanoanoa tele ona o lenei fa’alavelave ua ripotia mai, ae o se agaga fa’afetai ona o lo’o saogalemu uma le ‘auva’a.

Na ia fa’aalia foi lona agaga fa’afetai ia i latou uma sa fesoasoani i le fa’asaoina o le auva’a ma o lo’o fa’atalitali pea le ofisa o vaega’au mo seisi ripoti lata mai.