Molia se alii i le gaoia o le ‘ato a se tamaitai fa’atau fualaau ‘aina i le maketi i Fagatogo

Pago Pago - AMERIKA SAMOA

E tusa ai ma faamaumauga a le malo, o le taeao o le aso 11 o Iulai, na valaau ai se tamaitai sa faatau ni ana fualaau ‘aina i le maketi i Fagatogo, i le Ofisa Leoleo i Fagatogo, ina ua sola se alii ma lana ‘ato tupe.

Na faamatalaina e le tamaitai le tamo’e o lenei alii agai i leisi itu auala, i le nofoaga o iai le fale’aiga a le Sweetie’s.

Na agai atu leoleo e fesoasoani i le tamaitai o lo’o tuliloaina le alii ua sola ma lana ato tupe.  Ma na maua atu e leoleo le tamaitai, o tu tu i autafa o le falesa Metotisi lea e i autafa o le fale’aiga a le Sweetie’s.  

Sa faamatalaina e le tamaitai i leoleo mea na tupu ma ia faamatalaina foi la’ei a le alii ua sola ma lana ‘ato tupe.

O lo’o ta’ua foi i totonu o fa’amaumauga a le malo e faapea, a’o talatalanoa leoleo ma le tamaitai ua leiloa lana ato tupe, sa o latou va’aia le alii lea na sola ma le ‘ato o tu mai i le pito i tua o le falesa ma tuliloaina ai loa ia e se tasi o leoleo, ae peitai, e le’i mauaina le alii.

O se taimi mulimuli ane, na fa’ailoa ifo e tuaoi ma aiga o lenei alii i leoleo, lona suafa, o Anaconda Luteru ma e 19 ona tausaga.  Ae sa ta’ua e se tasi o aiga a Luteru, e le o se tagata o le latou nu’u.

Sa malaga atu leoleo ma le tamaitai na gaoia lana ato tupe i le Ofisa a Leoleo mo le faia o sana molimau tusitusia e tusa ai ma le faalavelave na tupu.

Na ta’ua e le tamaitai, a’o fa’atau ana fualaau ‘aina i le maketi, sa aga’i atu ni alii se to’atolu ma tu tu i luma o ana oloa.  Se fesiligia o ia e le alii muamua, pe mana’o e faatau sana moa, ae le tautala le alii lona lua, ae o le alii lona tolu lea na se’i ina lana ‘ato, o lo’o iai se tinoitupe e $200, o se siaki pepa e $300, o ki mo se taavale faapea ai lana taulima auro, e pe a ma le $700 lona tau.

O le aoauli o lea lava aso, sa toe alu atu ai le tamaitai na a’afia i lenei mataupu ma se ata vitio mai i le faleoloa o le ABC Fax, lea o lo’o i tua o le fale faamasino.

Ma na va’aia ai i le ata vitio mai i le faleoloa ia Luteru o nofonofo i luma o le faleoloa ma su’e totonu o le ‘ato tupe, ma ave ia le tupe na iai i totonu, ae tu’u le ‘ato ma pepa taua sa i totonu.

Ina ua toe fo’i atu leoleo e toe fa’aauau a latou su’esu’ega i le faleoloa, sa maua atu ai se tasi o alii ia na iai faatasi ma Luteru, lea na maua lona ata i luga o le vitio mai i le faleoloa.  Ma na aveina loa lenei alii e leoleo i le Ofisa a Leoleo mo le su’esu’eina.

E tusa ai ma le faamatalaga a lenei alii, sa o la fetaui ma Luteru i le faleoloa ma na ia va’aia foi i le tupe lea na ave’ese e Luteru mai totonu o se ato.  Ma sa ia aisi ia Luteru, lea na tago ai Luteru i le tu’u atu ia te ia se $10, ae na te le’i iloa o se tupe gaoi.  Sa ta’ua foi e lea alii, lona le iloa po o fea o iai Luteru.

E le o ta’ua i totonu o faamaumauga po o le a le taimi na pu’eina ai Luteru ma po o fea foi sa maua mai ai o ia.

Ua molia nei Luteru i le moliaga o le Gaoi, o se vaega ‘C’ o solitulafono mamafa, e mafai ona nofosala ai se tasi i le le sili atu ma le fitu (7) tausaga, po o se sala tupe e $5,000; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia, mai i le falepuipui, e faatali ai lona faasalaga.