O OE O LO’U TAMA?

VAEGA 110

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 110.

*******************************************

A’o fa’aauau pea ona toe tomanatu le tamaloa o Alesana i le la mafutaga ma le tua’a o le alii fomai o Taki, sa ia manatua le taimi na lokaina ai oe.  Sa leai lava seisi na asiasi atu ia te ia, se’ia vagana ai le tua’a a le alii fomai, o si ana uo mafana po o se uso foi ia te ia, o Tanielu.

O le taimi lea na tupu ai lenei faalavelave ia Alesana ma Tanielu, ae o le taimi lena o lo’o faia ai le faigauo a Tanielu ma le tina o Taki.  Ae ona o le tina a le alii fomai, e sau mai i se aiga mau’oa i totonu o le nu’u, sa fa’afaigata ai ona ia fa’ailoa atu i ona matua le la faigauo ma Tanielu, ona o se alii e leai ni matua ma e mativa foi lona olaga.

Sa le’i lokaina Alesana, ona sa fa’agasolo su’esu’ega a leoleo ma o le taimi lea na fai ai se tonu a Tanielu, e alu se la tafaoga i Egelani.  Ua tauanau e Tanielu ia Alesana, e la te o, ona e la te le iloa lava le i’uga o nei mea uma.  Aua o le taimi lea, ua sauni le ulugalii mau’oa ina ia loka Alesana e taui ai le maliu o le la tamaititi.

Ua tonu nei ia Alesana ma Tanielu o le a la o e tafafao i Egelani ona fo’i mai ai lea e tali se faaiuga o su’esu’ega a leoleo. 

Na alu le tafaoga a le to’alua lea, ae e le o iloa e Tanielu, ua ma’itaga lana uo teine (le tina a Taki).  Na fuafua le tina a Taki, e ta’u ia Tanielu lea tulaga, pe a toe fo’i mai le la faigamalaga.

Ae paga lea, sa le taulau faamoemoega a le tina a le alii fomai, ona a’o iai le to’alua lea i Egelani, na tupu ai se faalavelave ma maliu ai Tanielu.

Ae e le’i maliu Tanielu, o le taimi lea o lo’o la ta’o’oto faatasi ai i totonu o le falemai ona o le faalavelave lea na la manunu’a ai.  Ina ua iloa e Tanielu o le a o’o mai le oti ia te ia, ona o le tuga o ona manu’a, sa ia tauanauina ai Alesana ina ia fesuia’i a la pepa falemai ina ia mafai ai ona toe fo’i mai Alesana i lo latou a’ai, i lalo o le igoa a Alesana.  Ma le toe a’afia ai i su’esu’ega a leoleo.

Na umi lava se taimi o tauanau e Tanielu ia Alesana e fai le fesuiaiga lenei ma i’u ai lava ina ioe iai Alesana.  Ma o le mafua’aga lea na toe fo’i mai ai na’o le igoa o Tanielu ae ua fa’amaumauina Alesana, na maliu i le falemai.

Ma o le mafua’aga foi lea, ina ua su’esu’eina e le alii fomai o Taki ia lona tama, ma o’o mai ai lana su’esu’ega i le aiga o Alesana ma Eseta.

[E FAIA PEA]