O OE O LO’U TAMA?

VAEGA 109

E toe faatalofa atu i a tatou paaga i so’o se tulimanu o le kelope, o lo o maua mai ai lenei faasalalauga, aemaise i nai o tatou laufanua i Amerika Samoa.  E tatou te tau fai si’i faatasi le vi’iga ma le mua i lo tatou Tapa’au Sili i le Lagi ona o Lana pule faasoifua ma lana tausiga alofa ia i tatou taitoatasi, ua mafai ona o tatou toe fesilafa’i ma le manuia i lenei taeao fou, i luga o lenei nusipepa.

Ia ae se’ese’e mai loa i ou se’etaga malu, ae o le a taumafai atu le soso’oga o le tatou Fagogo, O OE O LOU TAMA?

*******************************************************

Na gata mai le tatou Fagogo i le vaiaso ua mavae ina ua fa’ate’ia le aiga o le tamaloa o Alesana ma le fafine o Eseta, ina ua alu atu le alii fomai o Taki i lo latou fale.

Manatua foi, o le alii fomai o Taki lea sa nofo i le fale a le ulugalii lenei o Alesana ma Eseta, ma galue i le falemai lea e faigaluega ai foi le la tama teine o Naomi.

Sa lilo i manatu o le ulugalii le mafua’aga na su’e atu ai se potu e nofo totogi ai le alii fomai o Taki ae na iloa mulimuli ifo ina ua mafana le latou mafutaga, ma na o latou asiasi atu foi i le aiga o le alii fomai, lea e na’o ia ma lona tina e nonofo ai.

O le alii fomai o Taki, o le atalii lea a le uo lelei lava a le tamaloa o Alesana, lea na la feola faatasi ifo i le nofoaga e nonofo ai tamaiti ua matua oti po o tamaiti e tu’ulafoa’i e o latou aiga.

O se faiga uo mafana le mafutaga a Alesana ma le tua’a a le alii fomai, o Taki, lea na igoa ia Tanielu.  Ae ina o talavou Alesana ma Tanielu, na tupu mai se faalavelave sa suia ai o la olaga.

I totonu o le a’oga lea na a’o’oga ai Alesana ma Tanielu, sa lauiloa ai le to’alua lea, e le gata i le atamamai ae faapea foi le talenia tele o nei alii i so’o se fa’agatama.

Atonu o le mafua’aga lea na avea ma tulaga sa le fiafia ai nisi o alii talavou sa o latou a’o’oga faatasi, aemaise lava le vaega o alii talavou e o mai i aiga mau’oa.

O se tasi la o aso, ina ua tu’ua le a’oga, a’o savavali atu Alesana ma Tanielu i le fale, ae osofa’ia i la’ua e nisi o alii mai le latou a’oga, e aofia ai la ma ni alii mai i aiga mau’oa.  E ui ina na’o le to’alua i la’ua, ae sa matua’i le solomuli ai lava Alesana ma Tanielu i le fasiga o le aualii ia na faapoina i la’ua.

I le vevela o fusuaga a Alesana ma Tanielu ma le aualii ia mai i le latou a’oga, na mau ai Tanielu i se ma’a ma lia’i ma lavea ai se tasi o alii mai i se aiga mau’oa.  O iina na uma vave ai loa ma fusuaga ae ua pefu lava le tagata ia i le mea e alu ai, ae ua tu’u ai na’o Alesana, Tanielu ma le tamaitiiti lea ua lavea.

Na va’aia e Alesana le fefe tele o si ana uo ona o ia lea sa togia le ma’a lea ua lavea ai le tamaititi lea.  Ma o iina na fa’atonu ai loa e Alesana ia Tanielu, e alu i le fale ma aua ne’i pisa lava i se tulaga e tasi.  E faatonu atu lava e Alesana ia Tanielu, ae musu mai i o Tanielu e alu ae tia’i Alesana.

O le mafaufau a Alesana ua faapea, i le va o la’ua ma Tanielu, e sili atu le taua o le lumana’i a Tanielu ona ua iloa e Alesana, o ia, e vaivai i totonu o le aoga ma o le talenia o Tanielu lea ua mafua ai ona lauiloa atu ai ma ia.  Ua mana’o Alesana, ina ia fa’asao mai si ana uo, lea ua ia ta’ua o lona uso, mai i so’o se faigata e ono punitia ai le alualu i luma o lona olaga.

O le mea lea na malo ai lava le tauanau a Alesana ma tu’ua ai loa o ia e Tanielu, e fofoina le faafitauli lea ua tula’i mai.

Na saili e Alesana ia se fesoasoani mo le alii lea na lavea ia Tanielu ae paga lea, e ui i togafitiga a fomai ma tausima’i, ae na i’u lava ina maliu lenei alii talavou.  Ae ona o lea alii e sau mai i se aiga mau’oa, sa faapea ona lokaina ai Alesana ma molia i lona maliu.

[E FAIA PEA]