Molia se alii 20 tausaga i le gaoia o le TV a le latou aiga

Pago Pago - AMERIKA SAMOA

O lo’o ta’ua i fa’amaumauga a le malo, le fa’afeso’ota’iina e se tamaitai o le Ofisa a Leoleo i Tafuna (TPS) i le afiafi o le aso 14 o Iulai, 2024, e lipotia ai le gaoia e se alii ia se TV a sona tua’a mai le latou fale.

Na aga’i atu leoleo ma lokaina mai le alii e 20 tausaga, o Tony Iosua, mai lo latou fale.

E tusa ai ma faamatalaga a molimau, e pei ona fa’amaumauina i lipoti a leoleo, o le ta o le 5 i le afiafi o le aso 14 o Iulai, na alu atu ai le alii o Iosua ma se’i le uaea o le TV a lona tua’a, sa i totonu o le potu malolo a le latou aiga, ma sola ese ma ia.

Sa ta’ua e le tamaitai na valaauina leoleo, e taunu’u atu o ia i le fale, ua leai se TV ma na ia fesiligia lona uso laititi po o fea ua ave ai le TV, ae alu atu le tali, ua ave e Iosua.

Ina o taumafai e lokaina mai le ua molia, sa ia taumafai e tete’e atu i le faatinoina o tiute a leoleo.  Ae ina ua mae’a ona lokaina ona lima, sa ta’ita’i mai o ia e leoleo i le taavale, ae o le taimi lea o lo’o taumafai le ua molia, e tago i le taga pito i tua o lona ofu.

Sa faapea loa ona su’esu’eina e leoleo le tino o le ua molia, ae o le taimi lea ua mau ai le lima a le ua molia i se pusa matatioata.  Na lagona e se tasi o leoleo ia le nuti o le pusa tioata.  Ina ua tatalaina le lima o le ua molia, sa maua ai se pauta pa’epa’e.  

I le taimi atoa na faia ai fetosoaiga a leoleo ma le ua molia, ae o lo o faapea mai le ua molia, i leoleo, e tia’i le pauta.

Sa fa’atalanoaina e leoleo ia se molimau na iai i le nofoaga na tupu ai le faalavelave ma sa ia faamatalaina le alu atu o le ua molia, i totonu o le potu malolo ma se’i le uaea eletise o le TV ma alu ma ia.  Ina ua toe fo’i atu le ua molia, sa faamatala e le molimau, lona fesiligia o le ua molia, po o fea na ia ave ai le TV, ae tali le alii, na ave e lipea.  Sa toe fesiligia e le molimau ia le ua molia, pe aisea e mana’omia ai na lipea, ae la sa ola lelei le TV.

Ina ua taunuu leoleo ma le ua molia, i le TPS, sa faamatalaina ai iina e le ua molia e faapea, na tago ave le TV i totonu o lona potu, ae pa’u ai ma ta’e ma sa taumafai e toe lipea ae peitai, na le toe ola le TV, o le mafuaaga lea na alu ai e ave i sana uo e taumafai e lipea le TV.

Ua molia nei ia Iosua i moliaga e tolu, e aofia ai;

Faitauga 1:  Tete’e a’o faatino tiute e leoleo e ave faapagota ai o ia, o se moliaga ‘A’ i solitulafono mama, e mafai ona nofosala ai i le falepuipui i le tausaga, po o se sala tupe e $1,000; po o moliaga uma e lua

Faitauga 2:  Gaoi (Sauaga-DV), o se vaega ‘C’ o soligatulafono mamafa, e mafai ona nofosala ai i le falepuipui, i le o’o atu i le fitu (7) tausaga, po o se sala tupe i le a o le $150 ma le $5,000; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia mai i le falepuipui, e faatali ai lona faamasinoga.