Molia se tamaloa fa’asuaava i le fa’ao’olima i lona to’alua ma so la alo 8 tausaga

Pago Pago - AMERIKA SAMOA

O le afiafi o le aso 13 o Iulai 2024, na maua ai se e le Ofisa a Leoleo i Fagatogo, se valaau mai i se tina o fia maua se fesoasoani, ona o lona to’alua, ua fa’asuaava ma faapisa i totonu o le latou aiga, ma ona fa’ao’olima ai i le tina ma so la alo e 8 tausaga.

(O le a le lomia e le Samoa News suafa o i latou ua a’afia i lenei mataupu, ona o le puipuiga o fanau iti.)

Ina ua taunu’u leoleo i le nofoaga na tupu ai le faalavelave, sa faasino ifo iai e se tina matua ia le fale o le aiga na tupu ai le faalavelave.  Ma ina ua feiloai ma le tina sa valaau mai i le Ofisa a Leoleo, na fa’amatalaina iai e le tina mea um ana tutupu.  Sa fesiligia foi o ia e leoleo po o manaomia se auaunaga a fomai i le manu’a o le mata a lona alo, ae peitai, sa tali le tina, ua mae’a ona ia togafitia le manu’a i le mata o si ana tama teine.

Sa faamatala e le tina, i leoleo, na faia se inuga pia a lona to’alua ma le to’alua a lona uso.  Ma ina ua sau i le fale, ua fa’asuaava, ma amata ona fa’apa’o solo vaega o le fale ma palauvale leotele, a’o su’e lana sikaleti.

O le pa’o ma le leotele o le ua molia, na feala ai le fanau ma talatalanoa i le faasaina ona toe taliaina le tuagane a le tina na a’afia, i totonu o le latou fale.

Sa ta’ua foi e le tina na a’afia le amata ona tatu’i ona foliga e le ua molia, ae na laki le lelei o lana ‘alo, sa na’o lona ulu na tau ai le tu’i a lona to’alua.

O iina sa ta’ua e le tina na a’afia, na tamo’e ai loa i fafo mai le fale, a’o tuliloa atu o ia e lona to’alua.  Sa ia lagonaina le valaau atu a si ana tama teine ae na faatonu e lona to’alua e toe fo’i atu i totonu o le fale, ma o i’ina na po ai e lona to’alua ia foliga o si ana tama teine.

Sa faamatala e le tina na a’afia, na tamo’e aga’i i le fale a lona tuaoi e fa’aaoga le latou telefoni e vala’au ai le Ofisa a Leoleo mo se fesoasoani.

Sa faasino ifo e le tina na a’afia, i leoleo, le mea sa nofonofo ai le ua molia, i le fale Samoa o lo’o fai ma fale faatali pasi a le nu’u. 

Na aga’i atu loa iai leoleo ma lokaina mai o ia ma aveina loa i le Ofisa a Leoleo.  O lo’o ta’ua i fa’amaumauga a le malo le lagonaina e leoleo, le manogi malosi o le pia mai i le ua molia, faatasi ai ma le mumu o ona mata.

E tolu tu’ua’iga ua faia faasaga i le ua molia, e aofia ai;

Faitauga 1&2:  Fa’ao’olima i lona tulaga e tolu (Sauaga i totonu o Aiga) – o se vaega ‘C’ i solitulafono mama, e mafai ona nofosala ai i le falepuipui mo aso e 10, po o se sala tupe e $300; po o faasalaga uma e lua.

Faitauga 3:  Faatupu Vevesi i totonu o lona aiga (Sauaga i totonu o aiga) – o se vaega ‘C’ i solitulafono mama, e mafai ona nofosala ai i aso e sefulu (10) po o se sala tupe e $300; po o faasalaga uma e lua.

E $2,000 le vaegatupe sa faatulagaina e mafai ona tatalaina ai le ua molia, e faatalitali ai lona faamasinoga.