TALA I VAIFANUA

Pago Pago - AMERIKA SAMOA

LUA NI TAGATA FAIGALUEGA FOU A LE LBJ

I se fa’aaliga mo le aufaigaluega faapea fa’auluuluga o ofisa eseese a le LBJ, na fa’alauiloa mai ai e le Faatonusili fou le tumau a le LBJ, le susuga ia Dr. Aitofele J. Sunia ia le filifilia o ni tagata faigaluega fou se to’alua a le falemai, e aofia ai le susuga ia Tommy Gabriel lea ua avea nei ma COO le tumau faapea le susuga ia Frank Palmer, e avea ma sui pule o le ofisa e mataituina le fa’agasologa o tiute ma galuega a le falemai (Deputy Chief Operating Officer-DCOO).

E le’i ma’oti mai i totonu o le fa’aaliga a le Faatonusili le tumau a le LBJ ia galuega sa galulue muamua ai Gabriel ma Palmer, i totonu o le falemai.

I lomiga ua tuana’i a le Samoa News, sa ta’ua ai le avea o Palmer ma Faatonusili o le ofisa o ‘Maintenance ma Facilities’ ae o Gabriel sa avea ma fa’auluuluga o le ofisa e mataituina vaegatupe a le LBJ mai i le malo feterale.

E tusa ai ma le fa’aaliga mai ia Sunia i le aso Lulu na se’i mavae atu nei, o le faia o nei suiga, o lo’o o gatasi ma le misiona a le falemai, o le tu’uto i le fa’aleleia atili o la latou tautua.  Sa ia ta’ua foi, o tiute a le COO e aofia ai le si’itia o auaunaga i totonu o le falemai i so’o se vaega.

E tusa ai ma tiute a le DCOO, ua fa’alauiloa mai e Sunia, o le a gafa ma le galulue so’o tau’au ma le COO i le mataituina o tiute ma galuega uma a le falemai i aso ta’itasi.  Sa faaalia foi e Sunia lona talitonu, o le a avea lenei galulue faatasi ma auala o le a si’itia ai le tautua a le falema’i mo tagata lautele.

Na fa’aalia foi e le Faatonusili le tumau le avea o ia ma sui o le LBJ, e fa’aalia ai le agaga fa’afetai i lana aufaigaluega a’o latou laasia lenei suiga fou.

I le taimi nei, e leai se fa’aamalamalamaga i le mafua’aga o le faamavae ma le tu’ua e le Faatonusili tuai a le falemai, ia lana galuega.

I se ripoti lata mai, na fa’alauiloa mai ai le tu’ua e Dr. Akapusi Ledua ia le teritori i le po o le aso Lulu na se’i mavae atu.

O le aso ananafi sa fa’ataunu’uina ai le iloiloga o le paketi a le LBJ lea sa fuafua e talanoaina ai le paketi a le falemai mo le tausaga tupe 2025 ma le suiga o le faatonusili.

TOE TALIU MAI LE AU SOKA A LE TERITORI NA FAI TOLENIGA I HAWAII

O le vaiaso fou, Setema 6, 2024, o le a faataunu’uina ai ta’amilosaga a le Asosi a le FIFA e tausinio ai kalapu soka a le ‘Oceania’ mo se avanoa e ta’a’alo ai i taamilosaga o le lalolagi.  O nei ta’aloga ua faamoemoe e faia i Apia, Samoa.

O le po anapo na faamoemoe e toe taliu mai ai i laufanua nei ia le au soka alii a Amerika Samoa lea o lo’o fuafua e auai atu i ta’aloga i Samoa.  O lea ‘au sa toleni i Honolulu i ni toleniga faapitoa aua le faamoemoe o loma nei.

O lo’o fa’agasolo pea fuafuaga mo se sauniga lotu ae e le’i faimalaga atu le ‘au soka a le teritori i Samoa.

O le faiaoga o le ‘au, o le susuga ia Thomas Rongen ma o le a fa’alauiloa aloaia e le Peresetene o le FFAS, le afioga Fai’ivae Iuli A. Godent.

I lalo o le taitaiga a Rongen, ua faapea ona ausia ai e Amerika Samoa se ulua’i avanoa e malo ai i ta’aloga a le FIFA, ina ua manumalo mai i le latou ta’aloga faitauina, ma Tonga ma o le lona lua ai lea o a latou ta’aloga faavaomalo, ua manumalo ai.