Faamuta nei ona piki S-EBT a fanau aoga

Pago Pago - AMERIKA SAMOA

I se faamanatu mai i le Fa’atonu Sili a le Matāgaluega Tautua ma Alāgamanuia mo Tagata Lautele (DHSS) ia Muavaefa’atasi John E. Suisala, mo mātua o fanau a’oga e le’i

tau’a’aoina penefiti EBT (S-EBT), e mana’omia ona vave piki nei penefiti mo le fanau. 

O nei, Aso Faraile, Aukuso 30, 2024, o le aso mulimuli e mafai ona piki ai pepa taumafa e $177 mo le S-EBT.

E lē mana’omia e mātua po o e ua avea ma mātua tausi ona fa’atumu ni pepa talosaga mo pepa taumafa o le S-EBT mo le fanau. E ao ona fa’amāonia muamua e le Matāgaluega o A’oga (DOE) fanau sa a’o’oga i a’oga o le Mālo ma a’oga e lē o i lalo o le va’ava’a’iga o le DOE (a’oga tua) ma e ao fo’i ona fa’amāonia i lea lisi le suafa o le mātua po o e ua avea ma mātua tausi a le fanau.

 E mana’omia ona susū atu lea mātua po o e ua avea ma mātua tausi ma le ID o lo’o iai le ata, ina ia fa’amautinoa ai suafa o alo ma fanau sa a’o’oga i le tausaga a’oga 2023-2024, ma e  mana’omia, ina ia pu’e ai se ID fa’apitoa mo le S-EBT, ona e mana’omia le S-EBT ID lenei e piki ma fa’aaogā ai pepa taumafa i so’o se fale’oloa o lo’o fa’atagaina mo le ASNAP.

I le tāpunia o galuega i le Aso Gafua, Aukuso 26, 2024, e 883 fanau a’oga e le’i tau’a’aoina a

latou pepa taumafa o le S-EBT. 

E 12,082 le a’ofa’iga o fanau a’oga o le Mālo ma a’oga e lē o I lalo o le va’ava’a’iga o le DOE  (private schools) sa fa’amāonia e le DOE, ae 11,199 ua māe’a ona piki a latou pepa taumafa mo le S-EBT. 

E fa’agata le fa’aaōgaina/ talia e fale’oloa o le S-EBT ia Tesema 28, 2024.

E fa’amanatu atu fo’i, na o fanau a’oga e 5 - 18 tausaga le mātutua na a’o’oga i le Mālo ma a’oga e lē o i lalo o le va’ava’a’iga o le DOE (private schools) ua fa’amāonia mo le tausaga a’oga 2023-2024, mo pepa taumafa S-EBT. 

E lē gata i lea, e ui ina ua fa’atulagaina e le Tulafono a le Mālo Tele (federal law) le Polokalama a le S-EBT mo le $40 i le masina mo le tamaitiiti a’oga, po o le

$120 mo le 3 masina o le tu’uaga, sa suia e le Matāgaluega a le Ofisa o Fa’ato’aga a le Mālo Tele (U.S. Department of Agriculture) le aofa’iga mo Amerika Samoa i le $59 i le masina mo le tamaitiiti a’oga, po o le $177 mo le 3 masina o le tu’uaga.

Afai e iai ni isi fesili, e mafai ona fa’afeso’ota’i le ofisa a le ASNAP mo Lagia Fulu Tuala po o Cleopatra Sio, i le 633-7720/7451 mo nisi faamatalaga.