Fa’aalia i Iloiloga o tupe faasoasoa le leai o se fuafuaga mautu mo le toe faaleleia o le EOB

Pago Pago - AMERIKA SAMOA

I le iloiloga a Komiti o Tupe Faasoasoa a le Senate ma le Maota o Sui i le taeao o le aso Lulu o le vaiaso ua tuanai, lea na auai atu ai sui o le Matagaluega o lo’o mataituina meatotino a le Malo (Dept. of Administrative Services – DAS), sa fa’alauiloa ai le leai o se fuafuaga mautu mo le toe faaleleia o le fale tele a le malo (EOB) lea  o lo’o i Utulei.

Sa amataina le iloiloga o lenei mataupu e uiga i le EOB, ina ua fesiligia e le sui Fofoga Fetalai, le afioga i le Faipule ia Fetui Fetu, Jr., ia le Faatonusili o le DAS, le susuga Afalava Eliki Afalava, pe aisea ua le faia ai se fuafuaga e faatatau i le EOB ona o le tele o fa’asea mai i tagata faigaluega a le malo, e tusa ai ma isumu faapea ai ma le afaina ai o le soifua maloloina.

Na faamalamalama e Fetu, o lona atugaluga o iai, ona o le a’afiaga o le soifua maloloina o tagata faigaluega a le malo ona o le toatele ua latou ripotia mai lo latou va’aaia o isumu i totonu o latou ofisa, pe a taunuu atu i taeao mo galuega.

Sa saunoa mai le susuga ia Afalava, o lo’o iai se fuafuaga a le malo e toe faaleleia le EOB e ala i le toe faia o se taualuga fou, e puipui ai aseti a le malo, ma o lo’o iai se faamoemoega e faamautuina i se taimi lata mai ia fuafuaga mo lenei poloketi.

Na toe faamanino mai e le sui Fofoga Fetalai le iai o sona popolega tele i le soifua maloloina, e le gata o tagata faigaluega a le malo, ae faapea foi le mamalu lautele o lo’o aga’i atu i le EOB.  Ma sa fa’aalia e Fetu, e tatau ona ave le faamuamua a le DAS i lea tulaga, ae le o le faatalitali se’i amata galuega mo le toe faaleleia o le EOB.

Sa saunoa Afalava, e tolu ni kamupani lotoifale e gafa ma le tineia o manu (pests) i totonu o fale, lea o lo’o galulue faakonakarate nei, e latou te faamamaina ma fofoina lenei faafitauli i totonu o ofisa uma a le EOB, ae ua iai foi ma nisi kamupani konakarate o lo’o gafa ma le faamamaina o foloa ma fale ta’ele.

Na ia ta’ua foi, o le aofaiga o le vaegatupe o lo’o totogi ai nei konakarate, e $231,000, lea o lo’o aofia i totonu o le tupe faasoasoa a lana matagaluega, ae o tupe totoe, o le a fa’aaogaina e faatau ai sapalaia mo le tausiga o le EOB ma ona siosiomaga.

Sa ta’ua foi e Afalava e faapea, o nei kamupani, na amata mai lava i le tausaga e 2021 ona faafouina a latou konakarate i tausaga taitasi.

Ina ua maua le avanoa a le afioga i le Senatoa ia Togiola T.A. Tulafono, sa ia fesiligia po o ua iai se fuafuaga a le malo mo le toe faaleleia o le EOB, po o le a se ata o le galuega o lo’o manaomia ona faia, o le a le umi e faia ai lea galuega, o le a le tau po o le tupe o le a fa’aaluina mo lenei galuega, ma pe faapefea foi ona faataunuuina lenei galuega.

Sa saunoa Togiola, e pei ona ta’ua e Afalava, o le galuega toe faafouina o le EOB, o le a amata mai i le faafouina o le taualuga o le fale, ae sa ta’ua e Togiola, i sona iloa, e le’i leva atu nei ona toe faafou le taualuga po o apa o le fale lea o lo’o iai, i le 2012 po o le 2013.

Na tali mai Afalava, o lo’o iai se ‘civil engineer’ mai i atunu’u i fafo, o lo’o galulue so’otau’au ma inisinia a le malo, i lenei poloketi mo le toe faafouina o le EOB, talu mai le tausaga e 2021.

Sa fesiligia e Togiola le suafa o le inisinia mai i atunu’u i fafo, ma pe ua na ia fa’ao’oina mai ni fuafuaga mo le poloketi i le EOB.  Sa tali Afalava, o le inisinia lava lea e tasi lea na tusia le fale Fono fou, lea o lo’o fa’aauau lava ona fausia, o le susuga ia Mark Lively.  Ma ua tele ni ata ma ana pili (invoices) ua mae’a ona fa’ao’oina mai.

Na fia malamalama le afioga i le Senatoa mai i le itumalo a Sua, pe ua totogia pili a Lively, ae na tali Afalava, e o’o mai i le aso Tofi lea na faia ai le iloiloga, e leai se tupe ua totogia ia Lively.

Sa toe fesili Togiola, pe fia se tupe o lo’o nofo aitalafu ai le DAS ia Lively, sa tali Afalava, e latalata i le miliona tala.

I le fa’aauauina o fesili a Togiola, sa ia fesiligia ai pe faapefea ona totogi Lively ae e leai se vaegatupe ua ma’oti mai mo lea tulaga, ma e leai foi se konakarate e faamautu ai le taimi e faamae’aina ai le poloketi, e tusa ai ma aiaiga o galuega faapenei.

Sa fa’aalia mai e Afalava, o lea e latou faatalitali mo vaegatupe mai i le ARPA e totogi ai lenei pili.

Sa fa’aalia le le fiafia o Togiola i lea tulaga ma ia fesiligia ai le tele o lenei vaegatupe o le a fa’aaogaina e totogi ai se galuega, e leai se konakarate e mafai ai ona sala ai se ‘contractor’ pe afai e na te solia se tulafono po o aiaiga o le galuega (building code) ma faamautu ai le faamae’aina o le galuega i le taimi faatulagaina, i le taimi e na te sainia ai le konakarate.

Na faapea ona toe faaleo e le afioga i le Senatoa lana fesili muamua – po o iai se fuafuaga a le malo e tusa ai ma lenei poloketi – aua e taua tele lenei galuega, ona o lo’o a’afia ai le fale lea o lo’o fale ai le tele o ofisa a le malo, e aofia ai ma le Ofisa a le Kovana.

Sa tali Afalava, e leai se fuafuaga.

O lea na toe fesili ai Togiola, po o iai se fuafuaga a le malo mo seisi fale e mafai ona fale iai ofisa a le malo lea o lo’o i le EOB, mo sina taimi pu’upu’u, a’o feagai ai ma le toe faaleleia o le EOB.

Na saunoa Afalava, o ia lea o lo’o gafa ma le matafaioi mo le sailiga o se nofoaga e mafai ona lisi e fale iai ofisa uma a le malo lea o lo’o i le EOB.

Sa toe fesili Togiola, o lo’o iai le fale o lo’o fausia nei lea o lo’o faatalitali ai le malo.  Lea na tali mai ai Afalava, ioe ma ua mae’a ona o la feiloai ma le pule o le fale lea i Tafuna i tafatafa o le auala e agai atu i le malaevaalele, e tusa ai ma lea tulaga.

Na fesili Togiola, po o ai le suafa o le tagata e ana le fale lea.

Sa tali Afalava, o Lauli’i, ma o lo’o tauanau mai Laulii, ua toeititi mae’a ona fau lona fale.

Sa fia malamalama Togiola i le upu a Afavala, o le ‘tauanau’.

Sa faamanino mai e Afalava, na ‘faamanatu’ atu e Lauli’i ia te ia, o lea ua toeititi mae’a ma avanoa lona fale fou, e lisi mo ofisa a le malo.

Sa saunoa Togiola, e le tau sailia i se fale tele, ae e mafai ona saili ni fale se tele e mafai ona lisi e se ofisa po o matagaluega e tasi.  

Na fia malamalama foi Togiola, pe le o galuega faapenei, e tatau ona auala atu i tauofoga, e mafai ona ofo mai ai tagata e iai a latou fale tetele e mafai ona ofi ai ni ofisa se tasi pe lua a le malo.

Sa saunoa Togiola, afai ae mae’a vave le fale a Laulii, ma ave uma iai ofisa a le malo lea o lo’o i le EOB, o le matua’i tele lava o le tupe a le malo, o le a alu i se ‘landlord’ e tasi.  

Na fa’aauau le saunoaga a Togiola e faapea, o lona uiga, o masina uma o le a totogi e ofisa ta’itasi ia a latou ‘rent’ i le ‘landlord e tasi’.  Ma o se tupe tele lea, e mafai ona faatau ai se vaalele.  Ma o le a sili atu foi lea tupe, i lo le tau atoa o le galuega lea o le a faia e toe faaleleia ai le EOB.

Sa tali mai Afalava, o lo’o latou faatalitali nei mo le ‘moli lanumeamata’ mai ia Mark Lively e mafai ai ona amata galuega toe faaleleia ina ia mafai ona amata se’e atu ofisa a le malo i o latou nofoaga fou, ona fa’ato’a amata lea ona totogi a latou ‘rent’.

Ae peitai, sa finau mai Togiola, e tatau ona ave le faamuamua i le a’afiaga o soifua maloloina o tagata faigaluega a le malo ae o le o le taumafai o le faigamalo e sefe a latou tupe mai i le totogia o ‘rent’.

Na ia toe faaleoina mai foi le mafai ona eseese fale e mafai ona fale iai ofisa eseese a le malo, e pei ona iai ni isi o ofisa a le malo i le ‘Fagatogo Square’ faapea isi nofoaga i le taulaga.

Ae sa faai’u lana saunoaga i lona toe faapea mai, ae atonu o lo’o faatalitali le DAS i le fale tele lea ua toeititi uma ona fauina, e mafai ona ofi uma ai i totonu ofisa eseese a le malo.

(O lo’o maitauina foi e le Samoa News ia le fa’aauauina pea o galuega mo le toe faaleleia o le fale lea na iai le faletupe a le ANZ i Fagatogo, lea ua fuafua e fale ai le Ofisa a le Kovana.  E le gata i lea, o lo’o iai foi le fale tu’ufua lea sa iai le ANZ i Tafuna, lea ua pulea e le malo, talu ona tula’i ese atu le faletupe.)

O isi matagaluega sa iloiloina a latou tupe fa’asoasoa i le aso Lulu o le vaiaso ua tuanai, na aofia ai le matagaluega a le DMWR, o Paka ma Malae Ta’alo, TAOA, Ofisa a le KVZK, Matagaluega a le Soifua Maloloina faapea le vaega a Faatoaga.

O le aso Tofi na faataunuuina ai iloiloga mo tupe faasoasoa a le Ofisa o Loia mo le Mamalu Lautele, TEO, Faletusi a le malo, Arts Council, Matagaluega mo Galuega Lautele faapea le Ofisa o Aoga.