Loka ni tamaitai se to’alua i le mumusu e tu’ua le malae ta polo

Pago Pago - AMERIKA SAMOA

E tusa ai ma faamaumauga a le malo, o lo’o ta’ua ai le valaau mai o se sikulaki (security guard) mai i le malae ta polo i Iliili, i le Ofisa a Leoleo i Tafuna e ripotia mai ai ni tamaitai se to’alua o lo’o mumu e o ese ma le malae ta polo, e ui ina faatonuina fa’afia i la’ua e sikulaki a le malae ta polo.

Ina ua taunu’u leoleo i le malae ta polo, sa faasino ifo iai e le sikulaki ia nei mafine, o lo’o tutu i luga o le malae ta polo.  Ma na faapea loa ona lokaina mai i la’ua e leoleo ma aveina atu i lo latou ofisa i tafuna.

Ina ua su’esu’eina nei tamaitai e leoleo, sa faamatalaina e Taleni Ma’ai, e moni sa musu e tu’ua le malae ta polo ina ua faalua ona faatonuina ai o ia, on aua mae’a ona tu’uina mai le faatagana mai i le Faatonusili o le malae ta polo, e mafai ona fa’atau a le oloa ma Meipo Fa’alaa, i luga o le malae ta polo, ae ia aua ne’i faalavelave i tagata o lo’o ta’a’alo.

Sa faamatala foi e Taleni lona le fiafia i uiga o le sikulaki, e fai o le le mafaufau ae o lona fia faatonutonu o la’ua.

E faapena foi le molimau a Fa’ala’a, i lona le usita’ia o le sikulaki e la te o ese ma le malae ta polo, ona o le le fa’aaloalo ma le fia faatonutonu o le sikulaki.

Na molia loa nei tama’ita’i e to’alua i le moliaga e tasi, o le Solivale o Fanua – o se vaega ‘B’ o solitulafono mama, lea e mafai ona lokaina ai i le falepuipui, i le o’o atu i le ono (6) masina, po o se sala tupe e $500; po o faasalaga uma e lua.

E le o ta’ua i totonu o faamaumauga a le malo, pe na faamautuina se vaegatupe e tatalaina ai nei tamaitai i tua, e faatalitali ai lo la faamasinoga, pe leai.