E toe tatalaina le ‘Hope Dialysis Center’?

Pago Pago - AMERIKA SAMOA

O le aso 30 o Iuni, 2024 na tapunia ai faitoto’a o le fale talavai faamama toto i Iliili a le ‘Hope Dialysis Center’ (HDC).  Ae i le iloiloga a le Komiti o le Soifua Maloloina a le Senate lea sa faataunuuina i le aso Tofi o le vaiaso ua mavae, sa saunoa ai le Faatonusili o le LBJ, i le iai o se fuafuaga a le latou falema’i ina ia mafai ona toe fa’aaogaina le fale talavai i Iliili, e mafai ai ona aveina atu lenei tautua i aiga ma laoa, e avea ma fa’amama avega i le mamalu o le atunu’u.

Sa saunoa le susuga ia Dr. Akapusi Ledua, i sana imeli i le afioga i le Faipule ia Larry Sanitoa, sa ia ta’ua ai le iai o se faamoemoega a le LBJ, e fa’aaogaina le ‘Hope Dialysis’ ma le faatuina o nisi iunite faamama toto, i Sisifo ma Sasa’e o le atunu’u, e fai ma a latou iunite faamama toto satelite (satellite dialysis unit).

O lea fuafuaga e aofia ai le fa’ataunuuina o talavai i totonu o aiga, e mafai ona faamanuiaina ai le 20% o gasegase o lo’o faamamaina o latou toto.

O le tali mai a Dr. Ledua ia Sanitoa, ina ua a’apa atu le afioga i le Faipule i le Faatonusili o le LBJ, ona o nisi o le atugalu o nisi o a latou gasegase o lo’o fa’aaogaina le HDC, ina ne’i le mafai ona ausia e le LBJ o latou mana’oga, pe a tapunia le HDC, e pei ona fa’ailoa mai i se ripoti a le Samoa News na lomia ia Iulai 1, 2024.

Ae i se ripoti lata mai nei, ua fa’aalia ai le sainia e le falemai ma le kamupani a le ‘Renasolve, Inc.’ ia se Maliliega le tumau (MOU), e mafai ai ona fa’aauauina le tautua mo le faamamaina o toto, i nu’u ma afioaga.  Ma o se taimi muamua lea o le a fa’atino ai lea auaunaga i totonu o Amerika Samoa.

O le kamupani lenei a le Renasolve, Inc., o se kamupani e gafa ma auaunaga patino i le faamamaina o toto, i totonu o le Iunaite Setete ma o le a tatalaina mai le latou auaunaga i le falemai a le LBJ, e mafai ai ona fa’ao’oina atu i tua, i nu’u ma afioaga.

O le aso Lulu na fa’alauiloa mai ai e le LBJ le faatauina o ni isi masini faamama toto, e sefulu (10), e tali ai manaoga i le toatele o gasegase o lo’o mana’omia lenei auaunaga i totonu o le teritori.

I le iloiloga a le Senate ma le pulega a le LBJ i le vaiaso ua mavae, sa ta’ua ai e Dr. Ledua e faapea, e to’a 42 gasegase mai i HDC o lo’o fa’aauauina nei a latou talavai i le potu faamama toto, a le LBJ ma o lo’o taumafai nei le falemai ina ia fa’amautuina se nofoaga tutotonu mo talavai faamama toto, e fai ma a latou nofoaga e ta’ua o le ‘satellite facility’.

Ae peitai, na fa’ailoa mai e se tasi o pa’aga a le HDC i le Samoa News, i se imeli, le leai o se feso’ota’iga ua o’o atu ia i latou e tusa ai ma lenei tulaga.

E le i mafai ona fa’amaonia e le Samoa News pa’aga uma a le HDC, ae o se tagi sa fa’asaga i le HDC i le 2022, o lo’o ta’ua ai suafa o John Wasko ma Jean Letarte, o totino o le komiti faafoe a le HDC, fa’atasi ai ma Chris Fisher o lo’o ta’ua o le Faatonusili ma le Peresetene o le Komiti Faafoe a le HDC, ma e na te umia le 50% o sea a le HDC.  O lo’o ta’ua ai foi le avea o le ‘American Samoa Venture Fund’ ma se tasi o ana pa’aga.

TALA’AGA

O le HDC po o le ‘Hope Dialysis Center’, sa faavaeina i le tausaga e 2018, e le susuga ia Chris Fisher, le Peresetene o le Komiti Faafoe.  Ae peitai, i le tausaga e 2022 na tula’i mai ai se fe’ese’esea’iga i le va o totino o le komiti faafoe a le HDC, lea na ave ai e le komiti faafoe ia Fisher i le faamasinoga, ina ua ia fa’alauiloaina le tapunia o le HDC ina ua le mafai ona toe fa’aauauina la latou auaunaga, e aunoa ma vaegatupe lea o lo’o maua mai i le Medicaid.

I se fa’asalalauga fa’alauaitele ia Aperila 2022, sa fa’aalia ai e Fisher, e na o le pau lava le auala e mafai ona fa’atumauina ai le matala pea o le HDC, o le faia o se tulafono e pasia ai le fa’aauauina o le ‘reimbursement’ mai i le Medicaid i tua mai o le aso 16 o Aperila. 

O seisi auala, o le faatauina lea e le malo o Amerika Samoa ia le HDC ma fa’aaoga o seisi nofoaga faamama toto, mo gasegase i le Falelima i Sisifo.  O le a mafai ona fa’aauau ai pea ona galulue le aufaigaluega ma fa’aauau ai talavai. Ae o le faai’uga sa tu’uina atu i le Faigamalo.  Sa ta’ua ai foi e Fisher lo latou nofo sauni, e galulue faatasi ma le malo aua se lelei mo gasegase faamama toto.

Ae ia Aperila 28, 2022 e pei ona sa ripotia e le Samoa News ia Me 2022, sa faia ai se fa’atonuga faaletulafono (Temporary Restraining Order) e faasaga ia Chris Fisher mai i le Faamasinoga Maualuga a Amerika Sama ma fa’atonuina ai le faia o se iloiloga e taofia ai gaioiga a le Faatonusili a le HDC.

E tusa ai ma le itu tagi, o lea TRO, e taofia ai le tapunia o le HDC, e pei ona sa fa’asalalauina e Fisher, ma tatalaina ai le avanoa i le HDC e totogi ana pili, e mafai ai ona fa’aauauina auaunaga faamama toto.

O i latou o lo’o aofia i le itu tagi, o John Wasko ma Jean Letarte e avea ma sui o le HDC, e fa’asaga ia Fisher.  O le loia a le itu tagi sa iai, o Thomas B. Jones, mai i le ofisa loia a le Jones & Associates, LLC., ae o le afioga ia Togiola T. A. Tulafono, sa avea ma loia a Fisher.

O John Wasko, o lo’o lisiina o le sui Peresetene a le HDC i le taimi sa faatulafonoina ai lenei kamupani i totonu o Amerika Samoa ia Oketopa 16, 2018.  Sa ta’ua foi lona igoa i totonu o se tusi a Fisher na aveina atu i le TBAS ia Mati 20, 2020, o se pa’aga o lo’o ia umia le 10% o se vaega o le HDC, ae o Dr. Letarte e umia le 7%.

Sa ta’ua ai foi e Fisher i lea lava tusi, lona umia o le 50% o le HDC.  O isi pa’aga a lenei kamupani, e aofia ai le ASVF (American Samoa Venture Fund), lea sa faatupeina le amataga o le HDC i se tinoitupe e $300,000.

O le ASVF o lo’o faatupeina e le SSBCI (State Small Business Credit Initiative) lea e pulea e le Malo o Amerika Samoa.

Ia Aperila 2022, sa ave ai e le Ofisa a le Loia Sili ia le HDC i le faamasinoga, faavae i luga o se Maliliega le tumau (MOU) sa faia i le va o le HDC ma le ASVF, talu ai se talosaga mai i le Matagaluega o Fefaatauaiga (DOC), ona ua taofi le DOC, ua solia e le HDC ia aiaiga o le MOU, e pei ona sa fa’aalia mai e le susuga ia Fainu’ulelei Falefatu Alailima-Utu lea sa avea ma Loia Sili i lena vaitaimi.

Ma i lea tagi a le malo e faasaga i le HDC, o lo’o talosagaina ai le HDC e toe fa’afo’i vave mai le tupe e $300,000 lea na maua mai i le Malo o Amerika Samoa – ASVF, ma avea ai le Faatonusili o le DOC – po o so’o se tasi na te filifilia, e avea ma sui i totonu o le komiti faafofe a le HDC, ae le gata i lea, o le fa’ao’oina mai i ofisa o le malo ia tala o tupe e tu’ufa’atasia e se ‘accountant’ ua mae’a ona laisene ma galue i totonu o Amerika, mai i le tausaga e 2018 se’ia o’o mai i lea taimi.

E tusa ai ma su’esu’ega a le Samoa News, e le o toe iai se ripoti lata mai e tusa ai ma le tagi a le malo e faasaga i le HDC, ma e leai foi se faamatalaga e tusa ai ma le TRO na fa’asaga ia Fisher.