POU TIUTE A LEOLEO

Pago Pago - AMERIKA SAMOA

MOLIA SE ALII 19 TAUSAGA I LE PALAUVALE MA FAAMISA I LONA TUA’A

O le aso 28 o Iuni, 2024 na fa’afeso’ota’i ai e se tamaloa ia le Ofisa a Leoleo i Tafuna, e ripotia ai le faatupu vevesi o lona atalii, i totonu o le latou aiga, i Faleniu.

O lo’o ta’ua i faamaumauga a le malo, le ‘ona o le alii 19 tausaga o AJ Mailani, ma faapisa i totonu o lona aiga i le afiafi o lea aso.

Ina ua taunu’u atu leoleo i le nofoaga na tupu ai le faalavelave, sa mafai ona faatalanoaina ai ni molimau se to’alua.  O le molimau muamua, o le ‘Aunt’ a le ua molia.  Ma sa ia faamatalaina lona faalogoina o se pisa i fafo o lona fale i le 3:10 i lea aoauli, a’o iai o ia i totonu o le fale.

Ma sa savali mai i fafo ae ona molimauina ai le palauvale o lona ‘nephew’ (lea ua molia), i lona tama.  Na ia ta’ua foi le ‘e’e ma palauvale o le ua molia, i lana tama teine, a’o ia taumafai e fa’ato’ato’a le ua molia ae peitai sa fa’aauau ai ona leotele le ua molia.  

Sa ta’ua foi e le ‘Aunt’, e pei ona ta’ua i faamaumauga a le malo, le u’uina e le ua molia, o se faamalama ma ta ai lona ulu lea na fula ai lona mata tauagavale ma manu’a ai lona muaulu.

Na taumafai le ‘Aunty’ e se’i ese le faamalama mai le ua molia, ae na avea lea ma tulaga na pa’u atu ai le Aunt ma tau lona ulu i se ma’a. Ma na pa’u’u faatasi ma le ua molia.

Sa ta’ua foi e le molimau #1, o le taimi muamua lea ua fa’asuaava ai le ua molia lea na faamaonia e le tua’a o le ua molia.

Sa faamatalaina e le tua’a o le ua molia, lona taumafai e fa’ato’ato’a lona atalii, a’o palauvale solo i lona aiga ma le uso o lona to’alua, ae peitai, sa oso mai le ua molia, ma lu’i o ia la te fufusu.

Na ta’ua foi e le tua’a o le ua molia lona taumafai e taofi lona atalii ae peitai, na a’apa le ua molia ma se’i mai se faamalama ma ta ai lona lava ulu.

O le aso lava lea na lokaina ai e leoleo ia le ua molia ma aveina atu o ia i le latou ofisa i Tafuna ma sa o latou logoina foi le vaega a le EMS mo le togafitia o manu’a a le ua molia faapea lona Aunt.

Ua molia nei lenei alii e 19 tausaga i moliaga e aofia ai;

Faitauga 1:  Faatupu Vevesi i Nofoaga Lautele – o se vaega ‘B’ o moliaga mama, e mafai ona nofosala ai i le falepuipui i le o’o atu i le ono masina po o se sala tupe e $500; po o faasalaga uma e lua.

Faitauga 2:  Tagofia o ava malolosi ae le’i ausia tausaga faatulafonoina – o se vaega ‘B’ o solitulafono mama, e mafai ona nofosala ai i le falepuipui, i le o’o atu i le ono masina, po o se sala tupe e $500; po o faasalaga uma e lua.

LOKA SE TAMALOA I LONA SOLIA O SE FAATONUGA FAALETULAFONO

O le aso 25 o Iuni, 2024 sa o’o atu ai se tina i le Ofisa a Leoleo i Tafuna e ripotia le solia e lona toalua o se faatonuga faaletulafono mo lona puipuiga (CPO-Civil Protection Order), e ala lea i le alu atu o lona to’alua i lo latou fale i Malaeimi.

(Ua le lomia e le Samoa News suafa o i latou o lo’o a’afia i lenei mataupu, ona o le puipuiga o fanau iti.)

E tusa ai ma faamaumauga a le malo, na o’o atu lenei tina ma se kopi o le CPO ma se faamatalaga tusia e faatatau i le solia e lona to’alua o aiaiga o le CPO.  Ma sa ia aveina atu foi ni ata sa pu’eina e lona alo tamaitai, i le mea na va’aia ai le ua molia, i tafatafa o le latou fale i Malaeimi.  

Sa faamatalaina e le tina, e tusa ai ma le CPO, e fa’asa ona latalata atu lona to’alua, po o le ua molia, i le fale, po o ia ma lana fanau iti e to’alua.

Ae o lea aso, na lafo atu ai e lana tama teine ia ata o lona to’alua, o lo’o tu i autafa o lona fale ma sa pu’eina foi e lana tama teine ia le paka o le taavale a le ua molia, i leisi itu o le latou fale, pe a ma le 100 futu le mamao.

E le gata i lea, sa faamatalaina e le tina le taumafai o le ua molia, e talanoa i lana fanau, lea e faasaina mai i totonu o le CPO.

Na lokaina mai e leoleo ia le ua molia, mai lona aiga i Nu’uuli ma fa’ailoa atu ia te ia, lona solia o aiaiga o le CPO.

Ua molia nei o ia i le moliaga e tasi, i lona solia o aiai o le CPO – o se vaega ‘A’ o solitulafono mama, e mafai ona nofosala ai i le falepuipui, i le o’o atu i le tausaga e tasi (1) po o se sala tupe e $1,000; po o faasalaga uma e lua.

E $3,000 le vaegatupe faatulagaina, e mafai ona tatalaina ai o ia i tua e faatali ai lona faamasinoga.