Loka se alii 23 tausaga i le tau’ai fale

Pago Pago - AMERIKA SAMOA

O le aoauli o le aso 25 o Iuni, 2024, na fa’afeso’ota’i ai e se alii ia le Ofisa a Leoleo i Tafuna, mo se fesoasoani ona o lona ‘nephew’, le susuga ia David Sagapolutele.  Sa ta’ua e le na valaau i le ofisa a leoleo, le faatupuina e le ua molia, o le vevesi i lo latou fale, e ala i le palauvale ma le tau’aia o le latou, i ni ma’a.

Ua molia nei Sagapolutele i le moliaga e tasi, o le Faatupu Vevesi i nofoaga faitele – o se vaega ‘B’ o solitulafono mama, e mafai ai ona nofosala i le falepuipui, i le ono (6) masina, po o se sala tupe e $500; po o faasalaga uma e lua.

E $1,000 le vaegatupe sa faatulagaina mo le tatalaina o Sagapolutele, e faatali ai ona faamasinoga.

Ina ua taunuu sui malu o le malo i le nofoaga na tupu ai le faalavelave, sa o latou talatalanoa ma le alii na valaau mai i le ofisa a leoleo mo se fesoasoani.

Ma e tusa ai ma faamaumauga a le malo, sa faamatala e le na valaau mai i le ofisa a leoleo, e faapea, e le o se taimi muamua lea ua faia ai e lona ‘nephew’ se tulaga faapea i lo latou aiga.  Sa ta’ua e lenei alii le fa’afia ona fa’atupu vevesi Sagapolutele i totonu o le latou aiga, ma le valaau faafia o leoleo.

Na faamatala e le na a’afia i lenei faalavelave, a’o la nofonofo ma lona to’alua i totonu o le latou potu malolo, sa o la faalogoina le ua molia, o palauvale i fafo o le latou fale.  Ma na ia va’aia le ua molia, o savali ese atu ma le latou fale ae amata tau’ai mai le fale i ma’a.

Na saunoa le na a’afia, e na te le malamalama pe aisea ua faapea ai lona ‘nephew’.

O lo’o taua i faamaumauga a leoleo, le nonofo faatasi o le ua molia ma le na a’afia, i le fanua e tasi, ae ‘ese’ese o la fale.

Sa fa’asino ifo e le na a’afia, i leoleo ia le fale a Sagapolutele ma sa faapea loa ona aga’i atu iai leoleo.  Ina ua taunu’u leoleo i le fale a le ua molia, sa o latou talosagaina o ia e sau i fafo ma le fale.  Ma na faapea loa ona lokaina mai o ia e leoleo ma aveina atu i le Ofisa a Leoleo mo le fa’aauauina o a latou suesuega.

Na fiu leoleo e taumafai e ‘mirandize’ le ua molia ae peitai, sa tete’e i le su’esu’eina o ia.