O OE O LO’U TAMA?

VAEGA 100

Taeao Manuia, Taeao Toto’a i le mamalu o le tatou aufaitau nusipepa i lenei taeao fou.  Tatou te tau fai si’i le Viiga ma le Faamanu i le Atua Silisili Ese i lana tausiga alofa ma lana tausiga mamana ia i tatou uma, ua mafai ai ona o tatou toe fesilifai i luma o nu’u, ae le o tua o nu’u, i lenei taeao fou.  E faafeiloai atu foi i tina ma tama matutua ua mafai ona aulia mai lenei taeao matagofie i le pule alofa a lo tatou Tapa’au i le Lagi.  

Ae saga’i mai loa, o le a toe soso’o atu le tatou fagogo “O OE O LO’U TAMA?” i lona vaega 100.

*****************************************************

Sa umi se taimi o saofa’i le tamaitai o Salome ma fa’ataupupula mai ia Naomi, i le tali a Naomi i lana fesili, pe aisea na le fa’ailoa atu ai e Naomi ia te ia, sa la a’o’oga faatasi.

Lea na faapea atu ai Naomi, “Oi, ou te le o iloa e tatau ona ou fa’ailoa atu lo’u tagata i lau susuga, aemaise vaitaimi o tatou a’o’oga, ona o se vaitaimi lea, o lo’o o’u taumafai e aua ne’i toe manatuaina.”

Ua tau mafaufau Salome, po o le a seisi auala e tatau ai ona ui mai ai lana fa’amaualaloga.

Ae oso atu le teine o Naomi ma faapea atu, “Afai o e tau mafaufau i sau faamatalaga i le mea na tupu a’o tatou a’o’oga, ou te le o fia fa’alogo atu iai.  Aua ou te talitonu, i se faamatalaga o le a fai mai ai i le taimi nei, ona ua ou iloa, e na o le tasi le mafuaaga.  E le o sou salamo faamaoni po o sou alofa moni, ae ona o lo’u tuagane.”

E fai a la le tala a Naomi ma tu i luga, ae ia toe faapea atu.  “Aua e te popole, ou te le ta’uina i seisi, e aofia ai ma si o’u tuagane.  Ona ou te le mana’o e fa’atiga ia te ia.   Ou te le mana’o e ta’u atu ia te ia, uiga moni o lana teine.  E le o iloa foi e o’u matua.  Se’ia vagana ai la lo’u uso matua, o ia lena e tatau ona e mafaufau iai.”

Ua savali atu nei ia Naomi ma tatala le faitoto’a ma ulufafo atu i fafo ma le ofisa a le teine o Salome, ae o le taimi lea, ua matua’i sesega foliga a Salome, i le fa’amatalaga mulimuli a Naomi, lea na ia fai atu ai, o la e iloa e Ruta ia le mea sa tupu.

Ua alu ese atu Naomi, ae ua atili ai le ta ta vale o le fatu a Salome ona o lea e iloa e Ruta ia le mea sa tupu ma le tagata sa mafua ai.

Ma o lena afiafi atoa, sa fiu le alii o Iakopo e tu’u valaau mai ia Salome, ae ua le fia taliina e Salome lana telefoni, ona ua matua’i le mautonu ia Salome po o le a lana mea a fai.  Aemaise ai lona fefe tele, ona o le tala a Naomi, o la e iloa e Ruta ia le mea sa tupu.

Ua toe alu foi leisi po, o le lelei le moe a le teine o Salome, i le atu o le loto.  Na usupo mai lava Salome i le taeao na soso’o ai, i lana galuega, ma ona fa’atonuina lana failautusi, e aua ne’i tu’uina atu se telefoni mo ia ma ia toe tolopoina uma ana fonotaga mo lea aso.

Ma sa ia faatonuina foi lana failautusi, ina ia aua nei fa’atagaina seisi e alu atu i lona ofisa.

Ae na matua’i fa’ate’ia Salome ma pei na va’ai i se aitu, ina ua ta tonu lava le 9 i lea taeao, ae matala atu lana faitoto’a, ma va’aia ai le teine o Ruta, o tu atu i le faitoto’a.

[E FAIA PEA]