TALA I VAIFANUA

Pago Pago - AMERIKA SAMOA

FA’APAIAINA LE LAU’ELE’ELE MO LE FALEA’OGA FOU A LE AOGA TULAGA MUAMUA I MASEFAU

E $754,995 le konakarate ua manumalo ai nei le kamupani faufale a le ‘Golden State Investment (Golden Island Services), mo le fausiaina o le falea’oga fou a le aoga tulaga muamua i le afioaga o Masefau, e pei ona sa fa’ataunuuina ai le sauniga faapitoa mo le suatia ma le faamanuiaina o le ‘ele’ele o le a faatuina ai lenei fale fou, i le aso Tofi, Aukuso 8, 2024.

Na aofia potopoto le afioaga o Masefau i le taeao o le aso Tofi, mo le fa’ataunuuina o lenei faamoemoe faapitoa, lea sa ta’ita’ia e le susuga ia Fa’afetai Tasha Atio’o, e ala i le fa’afeiloaiga o malo fa’aaloalogia, na aofia ai le afioga i le Kovana Lemanu P.S. Mauga ma le faletua ia Ella Mauga, o sui o le Fono Faitulafono, faapea le kapeneta ma ta’ita’i ‘ese’ese.

O le susuga i le Faifeau Toeaina ia Sefa Sio mai i le Ekalesia AOG (Assembly of God) a Masefau sa molia le talosaga amata ma sa ia tautalagia le tala ia Noa ma lona usiusitai i le Atua, ina ia fausia se va’a.  Na saunoa le susuga i le Faafeagaiga, o le usiusitai o Noa i le Atua sa mafai ai ona ia fausia le va’a.  Ma o le a faapena foi i lea taeao, ona e pei o Noa, o lo’o mulimuli le afioaga o Masefau faapea le Malo o Amerika Samoa, i le finagalo o le Atua ina ia sailia ma fausia fale mo alo ma fanau.

I lana saunoaga faapitoa, sa fa’aleoina ai e le afioga i le Kovana, lona agaga fa’afetai i le afioaga o Masefau ona o lo latou tu’uto i lenei galuega, ua mafai ai ona fausia lenei fale taua, e le gata mo alo ma fanau o le afioaga o Masefau, ae faapea foi Masausi ma Sailele.

Na fa’aalia e Lemanu le fiafia tele o le Faigamalo e lagolago i poloketi e aoga mo aiga ma nu’u ae faapea foi le teritori.  Ma sa saunoa foi Lemanu, e ui i le mamao o Masefau ae peitai, e fa’aalia lona agaga fa’afetai i le nu’u ona o la latou galulue punoua’i ua mafai ai ona tini taunu’u lenei faamoemoe.  Sa ia ta’ua foi sona faamoemoega, o le a aoga lenei fale mo a’oa’oga a fanau ae faapea foi le nu’u ma le afioaga.

O lenei galuega, e pei ona sa fa’aalia e le Faatonusili o le Matagaluega o Galuega Lautele (DPW) ia Faleosina Voigt, e 80 futu lona umi ae 60 futu lona lapo’a.

I le saunoaga a le Faatonusili o A’oga (ASDOE), le susuga ia Talauega Dr. Samasoni Asaeli,  sa ia faamamafaina ai le taua o le soifua maloloina faalemafaufau, aemaise i alo ma fanau, lea na a’e ai se manatu i le ASDOE ina ia fa’atupeina lenei fale aua se auaunaga mo le a’oga i Masefau ma le tausiga o le soifua maloloina faalemafaufau o alo ma fanau.

I lana saunoaga i lea taeao, sa fa’aleoina ai e le afioga Maga le agaga fa’afetai i le alii kovana ma le malo, i lo latou talimana’o ma sa ta’ua e Maga, e ui i nei taimi faigata, ae fa’afetaia lava e Masefau le fa’amuamuaina o mana’oga o fanau, ona e taua tele a latou aoaoga. 

O le aso 12 o Aukuso, 2024 ua faamoemoe e amataina ai lenei galuega ma e valu masina lea ua talitonuina o le a faamae’aina ai.

FAAMA’I PIPISI PE A TOE FO’I FANAU I AOGA – AUALA E MAFAI ONA FOFOINA AI

Ua tulata foi vaitaimi e toe fo’i ai alo ma fanau i potu a’oga mai i la latou malologa umi lea ua lamalama faai’u.  Ma o le a le gata ina o latou toe fo’i i le aumaia o meaaoga i aiga, ae faapea foi siama ma faama’i.

O nei faama’i ma siama, e aofia ai le tele o vaega o le ‘flu’(influenza, norovirus, common cold), o fa’a’i inifeti ae faapea ma le Koviti19.  Ma o le mafuaaga foi lea ua tele ina va’aia ai i lisi o sapalai a fanau a’oga, ia pusa ‘kleenex’.

Ma o nisi nei o ala e mafai ai ona fa’aitiitia o le pesi o faama’i po o le aumaia e fanau a’oga o  siama, mai i totonu o aoga, i aiga.

I tulafono fou a le CDC (Centers for Disease Control), o lo’o fautuaina ai so’o se tagata po o se fanau a’oga, e gasegase, aemaise le ‘flu’, e tatau ona nofo lelei i le fale, se’ia toe maua lelei lona malosi.

O fanau e tele lava ina feavea’iina le vairusi lenei o le Koviti19, e aunoa ma le va’aia o ni auga o le ma’i ia i latou.  Ma o le tasi lea o mafuaaga e pesi vave ai lenei faama’i.

I le masina o Me, 2024 sa tufatufaina ai e le CDC ta’iala mo auala e mafai ai ona taofia le pepesi o faama’i pesia, e pei o le Koviti19 ma isi ituaiga flu, e aofia ai le fa’a’i inifeti, e ala i le faamalosia o le manava sa’o, faamamaina o lima faapea le faia o tui puipuia.

E taua tele le a’oa’oina o auala sa’o e tale ma mafatua ai, ina ia mafai ona fa’aitiitia le pepesi o le flu, lea e aofia ai ma le Koviti19.  A tale pe mafatua, liliu ese pe pupuni fofoga, po o le fa’aaoga o se pepa solo ona tia’i vave lea o le pepa solo i le lapisi.  Afai e leai se pepa solo, e lelei le fa’aaoga o le lima o le mitiafu po o le ofutino, e tale iai i totonu pe mafatua foi.

Ae i nei mea uma, e taua tele le faamamaina lelei o lima pe a mae’a ona mafatua pe tale.