Molia se alii 27 tausaga, ma tu’ua’ia i le faaleagaina o le fale a lona tina

Pago Pago - AMERIKA SAMOA

O le taeao o le aso 25 o Iuni, 2024, na fa’afeso’ota’i ai e le susuga ia Nauru Tea, ia le Ofisa a Leoleo i Tafuna, e lipotia ai lona uso matua o Gavin Tea, o lo’o fa’atupu vevesi i le latou aiga ma ia fa’aaogaina se pate pesipolo, e fa’aleaga ai meafale i totonu o le fale.

E tusa ai ma faamaumauga a le malo, ina ua taunu’u sui malu o le malo, sa o latou talanoa ma Nauru ma lona tina, i le fale o se tuaoi.

Na faamatalaina e le tina i leoleo le fa’alavelave na tupu ma ia faasino foi i leoleo le tagata sa faatupuina le fa’alavelave, ae o le taimi lea o lo’o tu ai Gavin i fafo o le fale, ma le pate pesipolo.

Sa fa’aali foi e Nauru i leoleo ia ata o meatotino na fa’aleagaina e Gavin, i totonu o le fale faapea ma le taavale. 

O mea na fa’aleagaina, na aofia ai le faitoto’a o le fale a Nauru, o se pu i le pa puipui (wall) i totonu o le potu malolo o le fale, faapea ma le ‘omo i le tino o le ta’avale.  E ui ina e le’i ma’oti mai se faitau aofa’i o meatotino na fa’aleagaina, ae i se taumatega, e sili atu ma le $300.

O le ta’avale lea na fa’aleagaina e Gavin, o le ta’avale a lona tina ma lona to’alua.

Na faapea loa ona agai atu leoleo ma faatonuina Gavin e tu’u i lalo le pate pesipolo, ma sa faapea ona togi e le alii le pate, i lalo.  Ma lokaina mai ai loa o ia e leoleo, ma aveina atu i le Ofisa a Leoleo mo le fa’aauauina o a latou suesuega.

E tusa ai ma se faamatalaga a Nauru, sa to’atama’i lona uso lea ua molia, ina ua musu lona tina e tu’u iai se tupe, lea na mana’o e ave i le tamaloa e masani ona la ula aisa (vaega o fualaau faasaina) fa’atasi.

Sa faamatala e Nauru, o le le fiafia o lona uso lea ua molia, na ia ‘e’e ma palauvale i lona tina, ona savali lea agai i le potu moe a Nauru ma kiki le faitoto’a o le potu moe, lea na leaga ai.  Ona tago lea o le ua molia, ma u’u mai le pate pesipolo ma amata loa ona fa’aleagaina totonu o le fale.

Ona o le fefe tele o le tina, sa tago atu ai loa Nauru i le u’u mai lona lima ma ave’ese mai o ia mai totonu o le fale.

Sa faapea ona valaau mai le ua molia i lona uso, o le a ia fasiotia o ia pe a toe vaai ai, a’o agai atu Nauru ma lona tina i le afle o le tuaoi ma valaau ai loa leoleo.

E tusa ai ma le faamatalaga a le tina na a’afia, a’o faia le latou ti o le taeao, na alu atu le ua molia ma aisi mai sana tupe, e ave i le tamaloa e masani ona la ula aisa (vaega o fualaau faasaina) faatasi.  Ae ina ua tali atu le tina e leai, sa faapea loa ona amata ona leotele le ua molia ma amata ona fa’aleagaina meatotino i totonu o le fale.  Sa ta’ua e le tina, le fa’aaogaina e le ua molia, o le pate pesipolo e fa’aleagaina ai le fale.

Sa ta’ua foi e le tina lona agaga mafana ina ua ave’ese mai o ia e si ana tama lea na valaau i leoleo, ae a’o la savavali ese mai ma le fale, sa ia faalogoina le ta’ei mai o meatotino mai i totonu o le fale.  Ma o’o mai ai le sauniga a le ua molia, i le taavale o lo’o  i fafo.

Na fa’ailoa e leoleo le finagalo uma o le tina ma lona alo lea na valaauina leoleo, ina ia faila sa la tagi e faasaga i le ua molia, ona e le o se taimi muamua lea ua ia faia ai lea tulaga.

Ae na fa’amatala e le ua molia i leoleo e faapea, sa le fiafia o ia, ina ua musu lona tina e ave se tupe i se ulugalii o le nu’u, lea na fesoasoani e faila le lafoga a lona uso.

Ua molia nei Gavin i moliaga e lua, e aofia ai;

Faitauga 1:  Faatupu Vevesi i totonu o aiga po o sauaga i totonu o aiga (DV) – o se vaega ‘C’ o solitulafono mama, lea e nofosala ai i le falepuipui, i le o’o atu i le sefululima (15) aso, po o se sala tupe e i le va o le $150 ma le $300; po o faasalaga uma e lua.

Faitauga 2:  Faaleagaina o Mea Totino – o se vaega ‘A’  o solitulafono mama, e mafai ona nofosala ai i le falepuipui, i le tausaga e tasi (1) po o se sala tupe e $1,000; po o faasalaga uma e lua.

E $1,000 le vaegatupe sa faatulagaina e mafai ona tatalaina ai le ua molia, e faatali ai lona faamasinoga.