TALA I VAIFANUA

Pago Pago - AMERIKA SAMOA

FAASALA E LE AS-EPA SE FAIFA’ATO’AGA I LE FA’AAOGAINA O VAILAAU FAASAINA

I su’esu’ega masani a le Matagaluega mo le Puipuiga o le Siosiomaga a Amerika Samoa (AS-EPA), i se tasi o fa’ato’aga i totonu o le teritori, o lo’o totoina ai fua o fa’atoaga ma fa’atauina atu i faleaiga, faleoloa ma le mamalu o le atunu’u, sa fa’amaonia ai le fa’aaogaina e faifa’atoaga ia vailaau mo le tineia o manu i luga o vao faapea autafa o faavae o fale (“Complete Insect Killer”).

O le aso 11 o Iuni sa fa’ataunu’u ai e le AS-EPA ia su’esu’ega i ituaiga vailaau o lo’o teuina ma fa’aaogaina e lenei faifa’atoaga.

Ma na faapea ona fautuaina le faifa’atoaga i le fa’aaogaina sese o nei vailaau ma e ao ona ia faitau lelei ia fa’aaliga o lo’o pipi’i i luga o vailaau, ina ia mafai ona fa’aaoga sa’o.  Sa faapea loa ona faapipiina se Pepa o Solitulafono (Notice of Violation) mo le fa’aaoga sese o nei vailaau, e tusa ai ma tulaga o le tulafono tau i Vailaau (A.S.C.A § 24.1222(3), e faamautu ai le solia e le faifa’ato’aga o le tulafono, e ala i lana gaioiga sa faia.

Na faapea foi ona galulue fa’atasi le AS-EPA ma le Matagaluega o le Soifua Maloloina ina ia aoina ma fa’atama’ia ia fua o fa’ato’aga sa fa’aaogaina ai nei vailaau, ina ia taofia le o’o atu i le mamalu lautele ma ono gasegase pe afaina ai se tasi o le atunu’u.

E le gata i lea, sa fa’atonuina foi le faifa’ato’aga ina ia toe tase’i uma i luga fua o fa’ato’aga ua mae’a ona totoina, ma fa’amaonia e le vaega a le AS-EPA, ua afaina ona o nei vailaau.

Ua toe faamamafaina mai ai e le AS-EPA ma le Matagaluega o le Soifua Maloloina (DOH) le taua tele o le mulimulita’i i faatonuga o lo’o pipi’i i vailaau ina ia fa’aaoga sa’o, o le suiga sa’o o vailaau, o le teuina o nei vailaau ma lona tia’iina (disposal) faapea le ituaiga lae’I e ao ona la’eiina e puipui mai le tino, ae le gata i lea o le puipuiga o le mamalu lautele aemaise le siosiomaga.

Ua toe fa’amanatu mai ai foi e ofisa a le malo le tele o le afaina o le soifua maloloina faapea le siosiomaga, pe a le usita’ia nei tulafono uma, i le fa’aaogaina o vailaau ae le gata i lea, o fa’asalaga faaletulafono.  Ma afai o iai nisi o faifa’atoaga o lo’o manaomia se fesoasoani po o nisi faamatalaga e tusa ai ma le fa’aaogaina sa’o o vailaau mo fa’ato’aga, e mafai ona fa’afeso’ota’i le lala a le AS-EPA o lo’o gafa taulimaina lenei mataupu (Pesticide Branch)

Sa fa’aalia e le Faatonusili a le AS-EPA, le susuga ia Fa’amao Asalele le mamafa o lenei mataupu, i le fa’aaoga sese o vailaau ma e a’afia ai le soifua maloloina faapea le saogalemu o tagata ma le siosiomaga.  Ma na ia fa’ailoa mai le fa’aauau pea ona galulue faatasi ia le AS-EPA ma le DOH ina ia faamautuina le mulimulita’i o faifaatoaga i tulafono lotoifale ma tulafono feterale, mo le fa’aaogaina o vailaau i fua o a latou fa’ato’aga.  

Ma na ia fa’aalia lona agaga fa’afetai i le afioga i le Faatonusili o le DOH ia Motusa T. Nua ma lana aufaigaluega e tusa ai ma le latou galuega faifa’atasi aua le puipuiga o le soifua maloloina o le mamalu lautele, faapea le siosiomaga.

$2.6 MILIONA MO NI PASI AOGA FOU MO AMERIKA SAMOA

I se fa’aaliga mai i le Matagaluega mo le Puipuiga o le Siosiomaga a le malo tele (USEPA), ua fa’alauiloa mai ai le filifilia o le Matagaluega o A’oga a Amerika Samoa, mo le faamatu’uina mai iai o se vaegatupe e $2,555,000, o lo’o faatupeina e le polokalama o le “Investing in America” a le Peresetene o le Iunaite Setete, aua ni pasi aoga fou mo aoga a le teritori.

O lenei vaegatupe (rebate) o le a fesoasoani i le fa’atauina o ni pasi a’oga fou e fitu, e alu i le eletise.  Ma o le la’asaga taua lenei i le agai i luma o taumafaiga a Amerika Samoa, i le tausia o le soifua maloloina mo fanau aoga, ae le gata i lea, o le fa’asagatau i le ‘ea leaga lea o lo’o manavaina, faapea ai ma le suia o pasi tuai lea o lo’o fa’aaoga ai le kiso, lea o lo’o ua mafai ona feso’ota’i ma le afaina o le soifua maloloina o fanau aoga ma le mamalu lautele.

Na fa’aalia mai e le fa’auluuluga a le EPA e mataituina mataupu e feagai ma le Pasefika, o Martha Guzman le mitamita o le EPA e la’asia lenei la’asaga mo le faatauina o pasi eletise fou mo Amerika Samoa, ina ia fesoasoani i le faavaeina o se lumanai e mafai ai ona mama le ‘ea e manavaina e fanau aoga.  

Sa ta’ua e Guzman lona va’aia o le aoga o nei pasi eletise, e leai ni kasa leaga e toe manavaina e fanau aoga, faiaoga ma aufaigaluega o aoga faapea le mamalu o le atunu’u.

Na fa’aalia e le sui Faipule a Amerika Samoa i totonu o le Konekeresi, le afioga ia Aumua Amata Coleman Radewagen e faapea, o se tasi nei o polokalama ua loa ona ia taumafai iai i totonu o le Konekeresi, ina ia mafai ona fa’atutusa le tufatufaina o tupe feterale, ma sa ia fa’aalia ai lona agaga faafetai i le Faatonusili o le USEPA ia Michael S. Regan faapea Martha Guzman.

Sa saunoa foi le afioga i le Kovana Lemanu P.S. Mauga, i lona malamalama lelei i le a’afiaga o suiga i tulaga o le tau.  I le siitia o tulaga o le sami faapea matagi ma afa tetele.  Na ta’ua e le afioga i le Kovana, e ui ina e le mafai ona o tatou suia le fa’agasologa o mea e o’o mai, ae e mafai lava ona tatou faia mea e mafai ona tatou faia.

Na ia ta’ua foi, mo le fa’alauteleina o taumafaiga mo le siosiomaga, na saili ai e Amerika Samoa ma ua maua mai ai nei, ia pasi a’oga eletise fou e fitu, ona o le vaegatupe e $2.5 miliona mai i le ‘Bipartisan Infrastructure Law’ i lalo o le polokalama o le ‘Rebate’ mai i le 2023 mo pasi aoga mama.

Ua talitonu le afioga i le kovana, o le a aoga nei pasi aoga fou aua se femalagaiga saogalemu ma le mama, mo fanau aoga.

FA’AE’EINA TOFI TAITAI I TOTONU O LE AMI – COL. ROBERT L. LE’IATO

Sa auai atu le taitai o le aufaigaluega (Chief of Staff) i le ofisa a le afioga i le sui Faipule a Amerika Samoa i totonu o le Konekeresi, le susuga ia Col. Leafaina Tavai, U.S. Army (Ret.), i le fa’ae’eina o le tofiga ta’ita’i fou a le susuga ia Colonel Robert L. Le’iato, lea ua avea ai nei o ia ma ta’ita’i lona 43 i totonu o le a’oga a le  ‘U.S. Army Finance and Comptroller’ ma avea ai o ia ma ta’ita’i’au a le ‘U.S. Army Finance Corps’, i le aso Lua o le vaiaso ua tuanai, i le Fort Jackson, i le setete a South Carolina.

Na fa’aalia e le afioga ia Aumua Amata Radewagen, le sui Faipule a Amerika Samoa i totonu o le Konekeresi, le agaga fa’amalo i le susuga ia Colonel Le’iato, se tasi o lupe fa’alele a Amerika Samoa.

Sa fa’aalia foi e le susuga ia Tavai lona agaga fiafia, i lona auai atu i lea sauniga taua.  Ma ia ta’ua, ona o le mamao o Fort Jackson, South Carolina ma Amerika Samoa, o se agaga fa’agae’etia ia te ia, o se Samoa ma se fitafita tuai a le Ami, ua mafai ona auai atu i lenei sauniga, faatasi ai ma lona aiga ma fa’ao’o atu le agaga fa’amalo i le susuga ia Le’iato.  Na ia ta’ua foi le avea o lenei tofiga fou ma se la’asaga fou, ona o se taimi muamua lea ua umia ai e se tagata Samoa lenei tofiga i totonu o vaega’au.

O le susuga ia Col. Le’iato ma si ona faletua o Rima ma le la fanau e to’afa.  

Sa auai atu o ia i taua i Kosovo, Kuwait, Iraq, Afekanisitani faapea ma ‘Baltic States’ talu ona faapineina o ia i le 1997.  Sa avea foi o ia ma ‘Military Intelligence Officer’, i lala o le ‘Armor’ ae le’i se’e mai i vaega tau tupe.

Sa fa’au’uina mai o ia i le Iunivesite i Hawaii, ma fa’au’uina aloaia mai i le vaega ale ROTC ma o lo’o ia umia nei se fa’ailoga o le ‘Master’ i le ‘Business Administration’ ma le ‘Strategic Studies’.