TALA I VAIFANUA

Pago Pago - AMERIKA SAMOA

FESOASOANI LBJ I SU’ESU’EGA A’AFIA AI FUALAAU FA’ASAINA

O le aso Faraile o le vaiaso ua mavae, na lokaina ai e leoleo ia le tamaitai o Ollie Schuster ma molia i lona umia faasolitulafono o vaega o fualaau faasaina, o le Aisa, ma se faamoemoe e fa’atauina atu i tagata, ina ua alu atu Schuster ma piki mai sana afifi i le falemeli.

O le tamaitai o Schuster, e faigaluega o se leoleo po (security guard) i le falema’i autu a le malo, i Faga’alu (LBJ Tropical Medical Center).

Ma i se fa’aaliga mai i le pulega a le LBJ, ua fa’alauiloa mai ai e le susuga ia Stanley T. Iakopo, lea o lo’o fa’auluulu i le Ofisa o Tagata Faigaluega a le falemai (Human Resources), le fa’aauau pea ona tumau le fa’asagatau o le falemai i fualaau faasaina ma ava malolosi.

Na ia ta’ua ai le iai o le faamoemoega a le pulega o le LBJ, o le a faapea foi ona tausisi ai tagata faigaluega uma a le falema’i i ia tulaga.

Sa fa’aalia mai foi e le pulega a le LBJ i la latou fa’aaliga, lo latou faamuamuaina o le soifua maloloina o gasegase o le falemai faapea ai le mamalu lautele.

E ui i lea, ua fa’aalia e le LBJ lo latou talitonuga i le mamafa o tu’ua’iga ma ua o latou saunia e galulue faatasi ma le Ofisa o Leoleo faapea le Ofisa o le Loia Sili, e tusa ai ma su’esu’ega o lo’o faataunu’uina.

Sa faapea foi ona faamamafaina mai e le Pulesili o le falemai, ia Dr. Akapusi Ledua ia le mulimulita’i o le falemai i a latou tulafono, e faasaga tau i fualaau faasaina ma ‘ava malolosi.

Sa fa’amamafaina e le fa’atonusili ia le faasaina o so’o se tagata faigaluega ona gaosia, fa’atauina atu, tufatufaina, umia po o le fa’aaogaina o ‘ava malolosi faapea fualaau faasaina, i laufanua o falemai po o so’o se gaioiga a le falemai e faia i fafo atu.

E tusa ai ma fa’amaumauga a le falemai, o le aso 7 o Aukuso, o le a toe fa’aauauina ai le mataupu a Schuster i le Faaasinoga Faaleitumalo.

E le o iai se faamaoniga i se so’otaga o lenei mataupu ma le mataupu lea na maua ai foi ia fualaau faasaina, o le Aisa, i le meli a le LBJ, ia Me o le tausaga e 2018, lea o lo’o fa’aauau pea su’esu’ega o lea mataupu.

LUA MU TETELE I LE AFIOAGA O NU’UULI I LE VAIASO E TASI

O le vaveao o le aso Gafua, Iulai 29, 2024, na mu ai le falesa a le Ekalesia a Iesu Keriso o le Au Paia o Aso e Gata Ai, i le afioaga o Nu’uuli.

Ae o le vaveao o le aso Lulu, Iulai 31, 2024, na mu ai le fale sa masani ona iai le faleoloa tuai a le Transpac, lea o lo’o i leisi itu auala o le pamu a le MHJ.  

E tusa ai ma se faamatalaga a se molimau e nofo latalata i le fale na mu, o lo’o iai se talitonuga, na mafua le afi i le aso vaveao o le aso Lulu, mai i le umukuka o le fale’aiga a le MC Restaurant.

Sa faamatalaina e le susuga ia Kilisi Poasa, a’o ia agai atu i le fale faatali pasi lea e i autafa o le pamu kesi, e faatali ai lana pasi mo lana galuega, i lea vaveao, ae ona fa’alogoina le manogi o se mea o mu, ma ia va’aia ai le afi i leisi itu auala.

Na ia ta’ua lona va’aia o le sasao mai o le afi mai i tua o le fale’aiga ma amata ona sosolo atu i isi vaega o le fale.  Ma e lua ni ta’avale tinei mu mai i Fagatogo na taunu’u atu ma taumafai e tineia le mu, ae peitai, ua fai sina vave o le sosolo o le afi.

Na ta’ua foi e Poasa lona va’aia o le manaomia e le vaega tineimu, o se fesoasoani ma le leai o ni pamu vai tu lata i le fale na mu, ma o le mafuaaga lea na fa’aaoga ai e le vaega tinei mu ia pamu vai mai i leisi itu auala, lea e tu i autafa o le pamu kesi faapea ma pamu vai i tafatafa o le Shoe Tree ma le Western Union.

Sa iai foi leoleo mo le tau fa’afoeina o le femagalaiga o taavale, i lea taeao.

AUAI LE SUI PERESETENE O LE ‘FINAFINAU’ E AUAI I FONOTAGA A LE NOAA MO AUTALAVOU

Na auai atu le tamaitai o Ghaydah Amazing Grace Mageo Salave’a mai i le afioaga o Pago Pago, i se fa’atasiga a fanau talavou e to’a 15 na filifilia mai i setete eseese, lea sa fa’ataunu’uina i le laumua i Uasigitone, D.C.

O lenei fonotele sa fa’afoeina e le vaega a le NOAA, ma sa faataunu’uina ia Iulai 23-27, 2024.

O le tamaitai o Ghaydah, o le sui peresetene o le faalapotopotoga o le ‘Finafinau’, o se faalapotopotoga o lo’o galulue malosi i le tausiga o le siosiomaga.  Ma sa maua e ia lenei avanoa taua e fefa’asoai ai ma isi fanau talavou mai i setete ma teritori a le Iunaite Setete, aua mataupu taua e fa’atatau i le sami ma le siosiomaga.