Molia se alii i lona fa’aaogaina o se naifi i se misa

Pago Pago - AMERIKA SAMOA

O le vaveao o le aso 15 o Iuni, 2024, na fa’afeso’ota’i ai e se tamaitai ia le Ofisa a Leoleo i Fagatogo, mo se fesoasoani ona o ni alii se toalua ua misa, ma o lo’o a’afia ai ma le fa’aaogaina o se naifi.

E tusa ai ma fa’amaumauga a le malo, o i la’ua sa a’afia i lenei mataupu, o le susuga ia Alema Leleiga ma le susuga ia Lupe Faalevao.

O lo’o ta’ua i faamaumauga a le malo le taunu’u atu o sui malu o le malo i le nofoaga na tupu ai le faalavelave, ma na faamatalaina iai e le tamaitai lea sa valaau mai i le ofisa a leoleo, le manu’a o le a’ao o Faalevao, i le naifi a Leleiga ma sa aveina e le uso a Faalevao ia lea alii, i le latou fale ina ia togafitia lona manu’a.

Sa faapea loa ona agai atu leoleo i le aiga o Faalevao ma na fa’ailoa ifo iai e ni alii se toalua o le nu’u, o la ua ave Faalevao i le falemai.

Ona liliu loa lea o sui malu o le malo i le sailiga o Leleiga i lona fale.  Ina ua latalata atu leoleo i le fale o Leleiga, sa va’aia nisi o le nu’u o latou tutu i fafo o le faletalimalo.  Ae peitai, ina ua fesiligia e leoleo ia se tasi o tuaoi (o le ‘uncle’ a Leleiga) po o fea o iai Leleiga, sa le iloa e se tasi po o fea ua alu iai lea alii.

Sa fa’aauau su’esu’ega a leoleo ma maua atu ai loa le ua molia, i tafatafa o le faletalimalo.  Ma lokaina mai ai loa o ia ma aveina atu i le taavale a leoleo.  Ae o le taimi lena, ua mumu mai le toatele o le nu’u e fia pa’i mai i le ua molia.  Sa faatopetope loa ona aveina atu le ua molia i le ofisa a leoleo.

Na faapea ona toe fo’i mai sui malu o le malo i le fale o le tamaitai sa valaauina leoleo, mo le fa’aauauina o a latou suesuega.

Na faamatalaina e le tamaitai i leoleo, na iai sana fanau teine i le taimi na tupu ai le faalavelave.  Ma na faapea loa ona aveina atu e leoleo i latou ia, i le ofisa a leoleo mo le faatalanoaina.

Na faapea foi ona valaauina ia le vaega a le EMT mo le suesueina o manu’a o le ua molia, ona o manu’a i lona ulu ma lona mata.  Sa faapea ona aveina atu foi ma Leleiga i le falemai mo le togafitia o ona manu’a.

I le fa’atalanoaga o le molimau muamua, sa iai o ia i le faletalimalo, ae ona va’aia ia Leleiga ma ona uso, o pasi ifo, ma ia faatopetope atu loa ia i latou.  Na ta’ua e le molimau lona iloa atu o Leleiga o lo’o savali atu i luma ae o lo’o mulimuli atu iai Faalevao.

Na ta’ua e le molimau le tu’iina muamua e Leleiga o Faalevao, ma amata ai loa le la fusuaga.  Ma sa o la taumafai ma lona uso laititi e vaovao le misa.  Ma ina ua manuia a la taumafaiga, sa ia tago loa tu’u atu ia Leleiga ana meatotino.  Ae peitai, sa taumafai Faalevao e mulimuli atu ia Leleiga, ae na taofi o ia e lona uso ma taumafai e tata’i i lona fale.

Sa ta’ua foi e le molimau lona faatonuina o Faalevao e alu sa’o i lo latou fale, ma lona le iloa, o la ua faatali mai Leleiga i luma o le ‘Drug Store’ i Faga’alu, ia Faalevao.  Sa ta’ua e le molimau lo latou mulimuli atu ma ana uo, i le mea o aga’i atu iai Faalevao ma na fa’ate’ia i latou ina ua toe va’ai atu, o lo’o tutu faatasi mai Leleiga ma Faalevao.

Ma na ta’ua e le molimau lona tamo’e atu ia Faalevao ma tu i le va o nei alii e to’alua, e aunoa ma sona iloa o lo’o u’u e Leleiga se naifi.  Ina ua toe amata le fusuaga a alii e to’alua, sa ta’ua e le molimau lona vaaia o le sasau o le lima a Faaleleiga ma manu’a ai le lima a Faalevao.

Sa faamatala e le molimau, lo la taumafai e fesoasoani ia Faalevao, ae o le taimi lea ua sola ese ai ia Faaleleiga.

I le faamatalaga a le molimau lona lua, sa ia ta’ua ai lona va’aia o Leleiga ua fa’ao’o ni manu’a ia Faalevao, i se naifi ma na ia va’aia le toto o le lima a Faalevao, ae ua leiloa le me aua alu iai Faaleleiga.

Ina ua mae’a ona togafitia manu’a a Faaleleiga i le LBJ, sa faapea ona toe fa’afo’i atu o ia i le Ofisa a Leoleo i Fagatogo.

Ma na ia faamatalaina  ai i leoleo, le lu’iina o ia e Faalevao e la te fufusu.  Na ta’ua e Leleiga lona alu i lo latou fale ma aumai ai le naifi.  Sa ia ta’ua foi lona savali ese mai i le ‘Drug Store’ ae mulimuli atu Faalevao ia te ia ma toe lu’iina o ia e la te fufusu.

Na iai seisi molimau sa faatalanoaina e leoleo ma sa ia ta’ua lona agai atu i lo latou aiga, i le afiafi na tupu ai le faalavelave, ae ona va’aia Leleiga o lo’o tu i luma o le ‘Drug Store’ ma ona lima o lo’o tu’u i ona tua.

Sa ia ta’ua foi lona va’aia o Faalevao o savali atu agai ia la’ua ma Leleiga, ma na fesiligia e Faalevao ia le molimau po o sona tausoga ia Leleiga, na tali le molimau ‘ioe’.  Sa faamatala foi e le molimau le amata ona sasau o tu’i a Faalevao i foliga o Leleiga a’o ia (molimau) taumafai e taofiofi ia Faalevao, e aunoa ma sona iloa, ua manu’a Faalevao.

Na ta’ua e le molimau, na fa’ato’a ia malamalama mulimuli ifo, o lo’o totolia ona lima.

A’o togafitia ia Faalevao i le falemai, sa talosagaina e sui malu o le malo ia Faalevao ma lona ‘Aunty’, ina ia aga’i atu i le ofisa a leoleo pe a mae’a ona togafitiga.

I le faamatalaga a Faalevao i leoleo, sa ia ta’ua ai lona agai atu i lona aiga, ae ona vaaia Leleiga o tu mai na o ia i lalo o se ulu.  Ma na alu atu Faalevao i le lu’i Leleiga e la te fufusu ma amata ai loa le la fusuaga, seia o’o ina taofia e molimau e pei ona ta’ua muamua.

Sa ta’ua foi e Faalevao le savali ese atu o Leleiga, ae na ia (Faalevao) valaau atu iai e fa’auma le la fusuaga i le faletalimalo, ae peitai, na taofia e le molimau.  O iina na agai atu ai Faalevao i le fale a Leleiga ma valaau ia Leleiga e sau i fafo, ae peitai, e leai se tasi na tali mai.

Na fa’aauau le faamatalaga a Faalevao, o lona toe agai atu i lo latou fale, na ia vaaia ai Leleiga o tu mai i luma o le ‘Drug Store’ ma ona lima i lona tua ma sa ia (Faalevao) alu atu foi ma toe lu’i Leleiga e la te toe fufusu ma sa ta’ua e Faalevao, e na te le’i lagonaina le taimi na manu’a ai, se’ia o’o ina toso ese o ia e le tausoga a Leleiga.

Sa ta’ua e Faalevao, na o la o i le fale ma lona uso, ae faatonuina o ia e lona ‘uncle’ e alu i le falemai e togafiti ona manu’a.

Ua molia nei Leleiga i moliaga e lua;

Faitauga 1:  Faatupu vevesi i nofoaga faitele – o se vaega ‘C’ o solitulafono mama, e mafai ona nofosala ai i le falepuipui i le le sili atu ma aso e sefululima (15), po o se sala tupe e $300; po o faasalaga uma e lua.

Faitauga 2:  Fa’ao’olima i lona tulaga e lua – o se vaega ‘D’ o solitulafono mamafa, e mafai ona nofosala ai i le falepuipui, i le le sili atu ma le lima (5) tausaga, po o se sala tupe e le silia ma le $5000; po o faasalaga uma e lua.

E $10,000 le vaegatupe faatulagaina mo le tatalaina o le ua molia mai i le falepuipui, e fa’atali ai lona faamasinoga.