Fa’aauau suesuega a le Loia Tuto’atasi i le $36 miliona na fa’aaoga e le Faigamalo ae e le’i pasiaina e le Fono

Pago Pago - AMERIKA SAMOA

O le amataga o le masina na se’i mavae atu nei, sa faao’oina atu ai e le Loia Tutoatasi lea na filifilia e le Faamasinoga Maualuga e su’esu’eina le fa’aaogaina e le Faigamalo o le $36 miliona, e aunoa ma se fa’atagana mai i le Fono, ia se vaega muamua o lana su’esu’ega, i le Senate.

O le susuga i le alii loia tuto’atasi o Aaron Warren, sa filifilia ia Mati, e galue o ia i le ofisa loia a le Mooney Wieland Warren ma ua lima tausaga talu ona fa’amautu i totonu o le teritori.

O le aso 10 o Iulai, 2024, na ia fa’ao’oina atu ai se vaega muamua o lana ripoti e tolu laupepa, i le afioga i le Peresetene o le Senate ia Tuaolo Manaia Fruean, lea na tufatufaina atu ai i le mamalu o le Senate ia Iulai 12, ae e le’i malolo le Fono mo le fa vaiaso.

Na ta’ua e Warren i lana ripoti le iai o le suesuega i ona tulaga amata ma sa ia ‘oto’otoina tulaga ua ia faataunuuina, talu le filifiliga o ia e suesueina lenei mataupu.

Ua ia iloiloina fa’amaumauga ma ripoti sa ia maua mai i le ofisa a le Peresetene o le Senate, e tusa ai ma le $36 miliona.  E le gata i lea, o le faia o fonotaga ma fetusitusiaiga ma le loia a le Senate e tusa ai ma lenei mataupu, o faamaumauga ma puna’oa o lo’o mafai ona fa’aaogaina i ana su’esu’ega.  Ua faapea foi ona ia feiloai ma sui o le ofisa a le Loia Sili e tusa ai ma le lagolagosua o lea ofisa, i lana su’esu’ega.  Ma ua mae’a foi ona ia talosagaina le Loia Sili mo nisi e latou te galulue faatasi i le faatinoina o lenei su’esu’ega.

Sa ia talosagaina foi le Loia Sili mo le fa’aavanoaina mai o faamaumauga ma tulaga uma, e patino i lenei mataupu.

Sa ia ta’ua foi lona tali atu i ni su’esu’ega a vaega fa’asalalau e tusa ai ma le filifilia o ia, ma sa ia te’ena le tu’uina atu o se faamatalaga e tusa ai ma lenei mataupu, se’ia mae’a lelei su’esu’ega o lo’o faia.

Na ta’ua foi e le Loia Tutoatasi i totonu o lana ripoti, lona fa’afeso’ota’iina o tagata faigaluega a le Ofisa Su’etusi a le Teritori (TAO-Territorial Audit Office), na aofia ai ma le Su’etusi a le Teritori (Territorial Auditor) mo le talanoaina o lenei mataupu faapea ai ma lisosi o lo’o manaomia mo ana suesuega, faatasi ai ma faai’uga o a su’esu’ega a le TAO sa faia po o nisi su’esu’ega o loma nei.

Sa faapea foi ona ia soalaupuleina ma le TAO sa latou vaega o le a mafai ona fesoasoani ai i totonu o ana suesuega ae le gata i lea, o ni fautuaga e tusa ai ma ni suiga e ono manaomia i tulafono tau su’etusi mo le teritori.

Na ta’ua foi e Warren lona fa’afeso’ota’ia o le faufautua a le fono faitulafono e tusa ai ma molimau ma faamaumauga/ripoti, o tupe fa’aaluina, lea na fa’ao’oina atu e le Ofisa o Tupe a le malo, i su’esu’ega sa faia e le Maota Fono, ma o lo’o ia iloiloina nei faamaumauga.

Sa ta’ua foi e Warren lona saunia o se tusi mo le Tausitupe a le malo, mo sa la feiloaiga faapea ai ma sana fesoasoani i le mauaina o fa’amaumauga/ripoti, pe a talosagaina.

Na fa’aalia e Warren lona iloiloina pea pe ono tatau ona faia se iloiloga su’etusi (expert audit review) o tupe ua fa’aaogaina, ina ia mafai ona fa’asaoina ai le taimi ma tupe fa’aalu.

 Sa faapea foi ona ‘oto’otoina e le Loia Tutoatasi ia isi laasaga o lana su’esu’ega, lea e aofia ai le faamautuina o i latou o le a o latou galulue faatasi, talosagaina o faamaumauga ma ripoti mai i le Ofisa o Tupe, ma a mana’omia, uia ala o le faamasinoga.

O le a amataina foi ona ia su’esu’eina molimau ma fa’amaumau a latou faamatalaga, iloiloina le lautele o le a manaomia ai le faaaogaina o le faamasinoga, ina ia mafai ona maua mai faamaumauga, ripoti ma molimau.  E le gata i lea, o le faia o se faaiuga i se ‘expert audit review’ i tulaga o tupe fa’aalu ma sailia se fesoasoani, pe a manaomia.

Sa ia ta’ua le nofo sauni o le TAO e fesoasoani i vaega o le suesuega o lo’o manaomia vave, ae e manaomia ona talosagaina aloaia e le maota fono lea tulaga.  

Na fa’aalia foi e Warren lona fa’aauau pea ona mataituina pili ma tupe fa’aaluina i le fa’agasologa o lana su’esue’ga, ma ia ta’ua ai le le’i totogia o pili ua mae’a ona fa’aulu.

Sa aofia i totonu o le I’ugafono Aufa’atasi a le Senate, lea na talosagaina ai le Loia Sili ina ia talosagaina le Faamasinoga Maualuga mo le filifilia o Loia Tutoatasi na se su’esu’eina le fa’aaogaina e le Faigamalo o le $36 miliona e aunoa ma se fa’atagana mai i le Fono, o lo’o ma’oti mai ai le faate’aina, ave’esea ma le moliaina o so’o se tagata po o se taitai o le malo, sa ia solia tulafono tau i tupe fa’asoasoa a le malo, ma lona iloa.

E ui ina sa te’ena e le Fono i le tausaga ua mavae ia le ulua’i i’ugafono sa faauluina e le Faigamalo, ina ua mae’a ona fa’aaogaina le $36 miliona o tupe faaopoopo sa aoina, e fa’aopoopo i le tausaga tupe 2023, ae na toe pasia e le Fono lea lava pili ina ua toe fa’auluina i le Tauaoafiaga o se Fono Faapitoa i le masina o Mati.

I lana saunoaga i le tatalaga o le Fono Faapitoa, sa saunoa ai le afioga i le Peresetene o le Senate, ia lona taliaina o le talosaga a le kovana, e pasia le pili ina ia mafai tapunia tusi o le tausaga tupe o le 2023, aua ua mae’a ona taliaina e le Faamasino Sili ia le Iugafono Aufaatasi a le Senate, mo le filifilia o se loia tutoatasi, e na te suesueina lenei mataupu.