Molia se alii i le fa’ao’olima i se aufaigaluega o le faleoloa

Pago Pago - AMERIKA SAMOA

O le 12:35 i le vaveao o le aso 20 o Iuni, 2024, na valaauina ai e le faatauoloa a le faleoloa o le K&B Mart i Futiga, ia le ofisa a leoleo i Tafuna mo se fesoasoani, ona o se alii ‘ona, sa ia fa’ao’olima i se tasi o a latou tagata faigaluega.

E tusa ai ma faamaumauga a le malo, ina ua taunu’u leoleo i le faleoloa, sa faamatalaina iai e le faatauoloa le alu atu o se alii e faatau pia ae peitai, ona ua te’a le taimi faatulagaina (10 i le po) e faataga ai ona toe faatau ni pia, sa te’ena le talosaga a lea alii.

Ma na ta’ua e le faatauoloa, na alu atu le latou tagata faigaluega ma faatonu le ua molia, e alu ese ma le faleoloa, ae musu le ua molia, ae ua ia tago u’u le mitiafu o le tagata faigaluega a le faleoloa ma tu’i ona foliga ona sola ese ai lea.  Sa ta’ua e le faatauoloa le manogi pia o le ua molia.

Sa faamaonia e le alii faigaluega o le faleoloa, lea na fa’ao’olima iai le ua molia, ia le faamatalaga a le faatauoloa.

Sa le i mafai ona matamata leoleo i ata o le masini pu’e ata a le faleoloa, i lea afiafi, ona e pei ona ta’ua e le faatauoloa, e na o le latou pule e mafai ona tatalaina le masini pu’e ata.

E ui ina e le’i molimauina e leoleo ia ni manu’a i le na a’afia, ae peitai, sa fesiligia pea o ia pe manaomia le auaunaga a le vaega a le EMS.  Na tali le alii faigaluega a le faleoloa, e leai.

Na talosagaina loa e sui malu o le malo ia le aufaigaluega a le faleoloa ina ia faasino atu le mea na agai ai le ua molia, ina ua ia tu’ua le faleoloa.  Sa faasino ifo iai e le aufaigaluega, le aga’i atu o le ua molia i se a’ega e latalata i le faleoloa a le US Mart i Futiga.

Sa fa’aauau suesuega a leoleo, agai i le faleoloa a le US Mart ma fesiligia le alii na va’aia i lea itu, pe sa na ia va’ai i le ua molia, na tali lea alii, ioe, na o la faatasi i le taimi na tupu ai le faalavelave.  Ma sa faamautu ai iina le suafa o le ua molia, o le susuga ia Charlie Ekueta.

Na faamatala e le molimau, na o atu faatasi ma Charlie i le faleoloa a le K&B e faatau ni a la sikaleti.  Ae na alu atu Charlie ma fesiligia le faatauoloa pe mafai ona faatau sana sikaleti e tasi, mo le $1 ae na tali mai iai le faatauoloa e leai, ma faatonuia le ua molia, e alu i fafo ma le faleoloa ona o le la e ‘ona ma o lo’o faalavelave i isi tagata faatau.

O iina na le fiafia ai Ekueta ma ia tago u’u mai le ofu a le faatau oloa ae tu’i e le faatau oloa ma o la misa ai loa.  Sa ta’ua e le molimau lona u’una’i ese o Ekueta ma ia fai iai e alu i fafo.  Ma o iina na la o ese ‘ese’ese mai i le faleoloa.

Na talosagaina e sui malu ia le molimau ina ia faasino atu le fale a Ekueta ma a’o agai atu iai leoleo, na va’aia se alii o savali atu i leisi itu ma na va’aia e leoleo le tutusa o foliga o lea alii ma le latou ata lea o lo’o feavea’i o Ekueta.  Sa faapea loa ona lokaina mai o ia e leoleo ma na fa’alogoina foi e leoleo le malosi o le manogi pia o le ua molia.

Na toe fo’i atu leoleo ma Ekueta i le faleoloa na tupu ai le faalavelave, ina ia mafai ona fa’amaonia e le faatauoloa ma le alii faigaluega, o le tagata moni lea sa fa’ao’olima i le alii faigaluega.  Ina ua faamaonia e le alii faigaluega o le faleoloa ia Ekueta, sa aveina atu loa o ia i le ofisa a leoleo.

Ua molia nei Ekueta i le moliaga e tasi, o le Fa’ao’olima i lona tulaga e tolu – o se vaega ‘A’ o solitulafono mama, lea e mafai ona nofosala ai i le falepuipui mo le tausaga e tasi (1) po o se sala tupe e $1,000 po o faasalaga uma e lua.

E $1,000 le vaegatupe faatulagaina sa mafai ona tatalaina mai ai le ua molia, e faatali ai lona faamasinoga.