Faaulu e le kovana le paketi mo le tausaga tupe FY2025

Pago Pago - AMERIKA SAMOA

I le tatalaga o le tauaofiaga lona 38 a le Fono Faitulafono, sa fa’ao’oina atu ai e le afioga i le Kovana, ia Lemanu P.S. Mauga ia le paketi a le malo, mo le tausaga tupe o le 2025, e $733,683,167.  I lena aofa’i, o le paketi lotoifale e $165,907,000 (23%).  Ma o lo’o fa’ailoa mai ai se faaopoopoga e 16%, mai i le paketi o le tausaga tuai.  Ma o se faaopoopoga tele lea, talu le nofoaiga a lenei Faigamalo.

I le faitau aofa’I o le paketi mo le tausaga tupe 2025, e 51% sili atu nai lo le paketi sa mauaina e le kovana i le ulua’i tausaga o lona nofoaiga.  I lona mauaina o le paketi mo le tausaga tupe 2021 mo le tausaga tupe 2022, sa sili atu (6%) le paketi o le tausaga tupe 2023 nai lo le tausaga tupe 2022.  Sa faapea foi ona va’aia le si’itia o le paketi mo le tausaga tupe 2024 (22%).

E masani lava i faigamalo, ona taumafai ina ia o gatasi faaopoopoga o a latou paketi ma le siitaga o le tau o le soifuaga.  Ae peitai, ua sili atu le saoasaoa o siitaga o paketi a le Faigamalo, nai lo le siitaga o le tau o le soifuaga.

E ui ina e le’i mafai ona iloa atu le tulaga o le a o’o iai le siitaga o le tau o le soifuaga i le 2025, ae peitai, e mafai ona faia se fa’atusatusaga i le va o le siitaga o le tau o le soifuaga ma le tuputupu o le paketi lotoifale, i le va o le 2021 ma le 2024.

Mo lenei piliota, ua 30% le faaopoopoga o le paketi ua iai, ae o le siitaga o le tau o le soifuaga a Amerika, sa 15%, e tusa ai ma le ripoti mai i le Matagaluega o Faamaumauga o Leipa (Bureau of Labor Statistics).  O lo’o taumate le BLS, o le siitaga o le tau o le soifuaga i le va o le 2024 ma le 2025, e pe a ma le 3%, e maualalo tele nai lo le 16% faaopoopo lea ua fuafua mo le paketi lotoifale.

Ma e sili laititi atu lava le paketi lotoifale mo le tausaga tupe 2025, nai lo le ripoti o su’ega tusi a le malo, mo tupe maua o le tausaga tupe 2023.  Mo le tausaga tupe 2023, sa aoina ai e le malo o Amerika Samoa, se tinoitupe e $164,253,222.

Ae o lo’o manatu le kovana, o le a tutusa le ‘economy’ i le tausaga tupe 2025, e pei ona sa iai i le tausaga tupe 2023.  Ae o le tausaga tupe 2023 lea na tele se tupe maua a le teritori, ona o le Koviti 19.

Sa talosagaina e le afioga i le Senatoa ia Magalei Logovii ia se lipoti lata mai nei, mai i le Ofisa o Tupe, e fa’amaonia ai tupe maua a le malo, pe a faatusatusa, i tupe fa’aalu.

E tusa ai ma le tala o le tupe a le malo i lana kuata lona lua, o le tausaga 2024, e foliga mai e $4,220,315 tupe e le i aoina, ma o tupe leiloa (deficit), e $11,883,015.

Ma o le a mafai ona maua e le Fono se ata atoatoa, pe a mafai ona o latou taulimaina ia ripoti lata mai nei o le kuata lona tolu, ma faamaonia ai pe mafai ona ausia ia tupe maua o le tausaga tupe 2023 faapea ma le tausaga tupe o loma nei.

Ae peitai, o tala o le tupe faalekuata a le malo, e fai lava sina le atoatoa.

I le tausaga tupe 2023, na ta’ua ai i totonu o le ripoti o le tupe mo le kuata fa, le aofaiga o tupe aoina e $188,407,047.  Ae peitai, na fa’aalia i su’ega tusi o le tausaga tupe 2023, le aofaiga o tupe aoina, sa na o le $164,253,222.  Sa faapena foi i ripoti o ‘income collections’, le sili at unai lo le aofai na maua mai i su’ega tusi.   

Mo le tausaga tupe 2025, o lo’o taumate le kovana o le a mafai ona aoina mai ai se vaegatupe e $87.8 milion i ‘income taxes’ ae $34.1 miliona i ‘excise taxes’.  Ma e 20% le faaopoopoga, o lo’o tulimata’i, mai i tupe faaopoopo o le tausaga ua tuana’i (104% faaopoopo i ‘income taxes’ ae 31% i ‘excise taxes’) talu ona nofoia le Faigamalo o iai nei.