Loka se alii ina ua tu’ua’ia i le faia o amioga mataga i se tamaitai 15 tausaga

Pago Pago - AMERIKA SAMOA

O le taeao o le aso muamua o Iuni, 2024, na o’o atu ai se tina i le ofisa o leoleo i Fagatogo, e ripotia ia se fa’afitauli na tupu i le va o lona ‘niece’ e 15 tausaga ma se alii e 22 tausaga, lea e ta’ua e le tamaitai 15 tausaga, o lana uo tama.

(O le a le lomia e le Samoa News suafa o i latou o lo’o a’afia i lenei mataupu, ona o le puipuiga o le tamaitai talavou.)

E tusa ai ma fa’amaumauga a le faamasinoga, sa faamatalaina e le tina na o’o atu i le ofisa a leoleo, lona aumaia o lona ‘niece’ e nofo i lona fale, ina ia latalata i lana a’oga.  

Ina ua fa’atalanoaina e leoleo ia le teineitiiti 15 tausaga (i luma o lona ‘Aunty’), sa ia faamatalaina e faapea, e le i masani i le ua molia, se’ia o’o ina la fetaui i luga o le Api o Foliga (Facebook).  Na ta’ua e lenei tamaitai, o le aso 13 o Me, 2024 sa ia lomia ai sana tala i luga o le Facebook, ae tali atu le ua molia, ‘a e manaomia se fesoasoani, o lea oute i’i’.

O le aso 17 o Me, sa fesiligia ai e le ua molia, ia le tamaitai 15 tausaga, pe mana’o e fai ma ana uo teine, ae peitai, e le’i tali le tamaitai.  Ae o le aso lava lea e tasi, na feiloai ai loa le ua molia ma le tamaitai, ma la talatalanoa ma feasogi i tua o se falesa i totonu o le nu’u.

O le aso 22 o Me na toe fetaui fa’alua ai le ua molia ma le tamaitai i le nofoaga lava e tasi ma toe fa’aauau ai a la talanoaga ma feasogi.

Ae o le po o le aso 27 o Me ma le vaveao o le aso muamua o Iuni, ina ua toe fa’atasitasi i la’ua, na tauanau ai e le ua molia ia le tamaitai ina ia o la faia ni uiga mataga.  Ae na tete’e e le tamaitai.

Sa faamatala e le tamaitai, i le vaveao o Iuni 1, sa fa’alua ona ia fai atu i le ua molia, e leai, ae peitai, sa faamalosia e le ua molia ia le ave’esea o la’ei o le tamaitai ma faia ni amioga mataga.

O le taeao lava lea na fa’afeso’ota’i ai e leoleo ia le vaega a le ‘Social Services’ e ripoti iai le faalavelave na tupu.  I le aoauli o lea lava aso, na taunu’u ai le vaega a le ‘Social Services’ ma fa’ailoa iai e sui malu o le malo ia le fa’alavelave ua tupu.

Ina ua mae’a ona fa’atalanoaina e le ‘Social Services’ ia le tamaitai na a’afia, i luma o lona ‘aunty’, sa aveina atu loa o ia i le falemai mo le fa’ataunu’uina o su’esu’ega a foma’i ma aveina atu ai loa o ia e le ‘Social Services’ i lona tina.

Ua molia nei le alii 22 tausaga i moliaga e lua, e aofia ai;

Faitauga 1:  Faia o uiga faaSotoma – o se vaega ‘B’ i solitulafono mamafa, e mafai ona nofosala ai i le falepuipui, i le va o le lima (5) ma le sefululima (15) tausaga.

Faitauga 2:  Faia o amioga mataga i lona tulaga muamua – o se vaega ‘D’ i solitulafono mamafa, e mafai ona nofosala ai i le falepuipui, i le le silia ma le lima (5) tausaga, po o se sala tupe e $5,000; po o fa’asalaga uma e lua.

 E $5000 le vaegatupe sa faatulagaina mo le tatalaina i tua o le ua molia, e faatali ai lona faamasinoga.